Црна Хроника

Продолжува процесот за „Штекли“ – Детали од судењето

Во Кривичниот суд денеска започна главната расправа за случајот „Штекли“, кој се однесува на организирана група за недозволена трговија со дрога. Првообвинетиот Раде Трајковски – Штекли, на прашањето на судот дали се чувствува виновен, изјави дека „не го разбира обвинението“, додека останатите обвинети рекоа дека не се чувствуваат виновни за делото што им се става на товар.

Покрај Трајковски, обвинети се и Петар Златановски, Стефан Китанов, Александар Вучевски, Стојан Иванов и Филип Таневски. Сите пред судот потврдија дека го разбираат обвинението, но дека не се виновни.

Обвинителката Верица Бержетска Крстевска од Обвинителството за гонење на организиран криминал, во воведниот збор истакна дека групата била добро организирана и се занимавала со набавка, транспорт и продажба на кокаин и марихуана, преку мрежа на посредници под контрола на Штекли.

„Раде Трајковски – Штекли бил организатор и координатор на групата, во контакт со странски и домашни посредници. Во неговиот дом, возило и мобилен телефон се пронајдени бројни докази што укажуваат на неговата централна улога во набавката и продажбата на дрога“, рече обвинителката Крстевска.

Одбраната на Трајковски, предводена од адвокатот Сашко Дуковски, ги негираше обвиненијата, наведувајќи дека „Трајковски ниту формирал, ниту организирал група, ниту давал наредби“. Дуковски додаде дека доказите од посебните истражни мерки не содржат ништо што би ја потврдило вината на неговиот клиент и ја доведе во прашање надлежноста на Обвинителството за ГОКК во случајот.

Според одбраната, не може да се зборува за организирана група бидејќи дел од обвинетите меѓусебно не се познавале, а кај некои биле пронајдени минимални количини дрога – под еден грам.

Следното рочиште е закажано за 15 октомври, кога ќе продолжи изведувањето на доказите на Обвинителството.

Случајот „Штекли“ опфаќа вкупно 10 лица, а истрагата траела речиси една година, со спроведени посебни истражни мерки. Првично биле обвинети 16 лица, од кои седум веќе склучиле спогодби и добиле затворски казни од 3 до 3,5 години.

Дел од обвинетите дрогата ја продавале по 4.500 до 6.000 денари за грам кокаин, а марихуаната по 200 до 300 денари за грам. Комуникацијата, според Обвинителството, се одвивала преку апликацијата Snapchat, а клучните докази биле добиени преку системот Cellebrite, донација од САД.

Црна Хроника

Уапсени лихвари – Полицијата со детали

Кривична пријава против двајца кавадарчани за сторено кривично дело “лихварство”

ОВР Неготино, до Основното јавно обвинителство Кавадарци, поднесе кривична пријава против Н.С.(59) и Р.С.(34), двајцата од Кавадарци, поради постоење основи на сомнение дека сториле кривично дело „лихварство“ по член 260 од Кривичниот законик. Според пријавнеото, тие во периодот од јуни 2023 до ноември 2025 година на лице од Неготино му давале пари на заем со писмени и усни договори, а за себе договарале несразмерна имотна корист во вкупна вредност од 167.000 денари. за што оштетениот доставил и докази. Со наредба од Основен суд Кавадарци извршен е претрес во нивниот дом и помошни простории, при што се пронајдени и одземени мобилни телефони, а од Н.С. се одземени тефтери со забелешки, по што двајцата се лишени од слобода.

Црна Хроника

Кривична пријава за поранешен градоначалник – МВР со детали

Кривична пријава за „несовесно работење во службата“ и „злоупотреба на службената положба и овластување“ против поранешниот градоначалник на Струмица и двајца вработени во општината

СВР Струмица, до Основното јавно обвинителство Струмица, поднесе кривична пријава против К.К.(35) и Б.Ш.(64), двајцата од Струмица, поради постоење основи на сомнение дека сториле кривично дело „несовесно работење во службата“ и против И.Г.(54) од Струмица поради постоење основи на сомнение дека сторила кривично дело „злоупотреба на службената положба и овластување“.
Пријавената И.Г., во својство на раководител на Одделението за администратирање на приходи при општина Струмица, постапувајќи спротивно на одредбите од Законот за даноците на имот, во четири наврати ги пречекорила своите овластувања со тоа што изготвила решенија за даночно ослободување од данокот на промет на недвижен имот при продажба на станови од станбена куќа со наменска класификација А1. Ваквото ослободување од плаќање било направено повикувајќи се на член 25 од Законот за даноците на имот, меѓутоа одредбите за таквото даночно ослободување се однесувале само за станбени згради и станови кои согласно класата на намени се со номенклатура А2.1, но не и за станбени куќи со номенклатура А1.1, за кои и биле изготвени решенијата. Исто така, И.Г. во три од четирите решенија, во отсуство на пријавениот Б.Ш., се потпишала и во полето Потврдил-контролирал.
Пријавениот Б.Ш., во својство на Раководител на Секторот за финансиски прашања при општина Струмица и пријавениот К.К., во својство на градоначалник на општина Струмица, постапиле несовесно при вршењето на своите службени овластувања и пропуштиле должен надзор при постапувањето по тие предмети и ги потпишале изготвените решенија за даночно ослободување изготвени од И.Г.. Со ваквите дејствија пријавените лица го оштетиле буџетот на општина Струмица за износ од 668.388 денари.

Црна Хроника

77-годишна жена жртва на измама – изгубила 8.000 евра!

Лишен од слобода измамник од охридско, измамил жена од струшко за сума од 8.000 евра

На 17.12.2025 во 11.40 часот во Струга, полициски службеници од Надворешната канцеларија за криминалистички работи Струга го лишија од слобода Н.С.(40) од с.Горно Лакочереј, охридско.
Тој се сомничи дека на 11.12.2025 измамил 77-годишна жена од струшко село за сума од 8.000 евра. Според пријавеното, на 11.12.2025 тој телефонски ја побарал жената, лажно се претставил и ѝ рекол дека нејзината ќерка прегазила дете на пешачки премин и дека ќе треба да плати за да ја пуштат, односно да ја ослободат од наводно обвинение. Откако се договориле жената му ги дала парите и тој заминал.
По преземени мерки и активности во соработка со Одделот за криминалистичка полиција-Сектор за општ и насилен криминал, тој е пронајден и лишен од слобода, а по целосно документирање на случајот, против него е поднесена кривична пријава поради постоење основи на сомнение за сторено кривично дело “измама”.