Интервју за Булевар.мк со Дејан Митески, кандидат за градоначалник на Општина Аеродром

Булевар:

Граѓаните веќе неколку пати слушнаа за вашата визија за Аеродром. Кои се првите конкретни чекори што ќе ги преземете ако ја добиете довербата?

Митески:

Првата седница на Советот ќе биде посветена на воведување на едно системско решение – за секои 10 квадрати новоизградена површина, инвеститорот ќе мора да засади по едно дрво. Тоа е мерка со која веднаш даваме сигнал дека Аеродром не е место само за бетон, туку за здрав живот со зеленило.

Паралелно со тоа, заедно со ЈП Комунална хигиена и новиот градоначалник на Скопје – Орце Ѓорѓиевски, ќе започнеме акција за темелно чистење на улиците, парковите и дивите депонии. Верувам дека редот и чистотата се првото нешто што граѓаните го гледаат и чувствуваат во секојдневието.

А потоа следуваат и крупните проекти – топлификацијата во Лисиче, можноста за фотоволтаици на секој покрив и олеснувањата за младите семејства. Тоа се мерки што оставаат трајна разлика.

Булевар:

Често зборувате за капитални инвестиции. Кој проект сметате дека ќе има најсилно влијание врз квалитетот на животот во Аеродром?

Митески:

Секако, тоа е спортскиот центар од 100.000 квадрати покрај Вардар. Овој проект не е само спортска сала или игралиште – тоа е целосен здравствено-рекреативен комплекс за сите генерации.

Таму граѓаните ќе добијат место за спорт, прошетка, културни настани и дружење. Кога градите ваква содржина, не вложувате само во објект, туку во здравјето, духот и иднината на луѓето. Верувам дека токму ваквиот проект ќе биде симбол на Аеродром како модерна општина и пример за цело Скопје.

Булевар:

Една од вашите иницијативи е поддршката за младите семејства и децата. Што точно ќе добијат родителите и дечињата од овие мерки?

Митески:

Мојата најголема цел е во Аеродром да нема ниту едно дете на листа за чекање за градинка. Веќе се работи на нови објекти како „Изворче“ и „Пчелка 1“, кои ќе обезбедат стотици нови места. Но тука не застануваме – во план е изградба на помали локални градинки во повеќе населби, за родителите да имаат капацитет блиску до дома.

Истовремено, ќе се модернизираат постојните објекти и ќе се обезбеди подобра поддршка за воспитувачите. Со овие вложувања, родителите ќе бидат послободни и посигурни, а децата ќе имаат еднакви услови за развој. Тоа е инвестиција што не дава резултат само денес, туку ги обликува генерациите што доаѓаат.

Булевар:

Жителите често се жалат на загадувањето и на Вардариште како голем проблем. Дали имате јасен став и решение?

Митески:

Вардариште е болна точка за сите жители, иако формално не е под надлежност на општината. Но ние нема да се криеме зад тоа – ќе бидеме најгласниот партнер во барањето конечно решение.

Досега поднесувавме кривични пријави против несовесни лица што го палеа ѓубрето и организиравме патроли. Во иднина ќе бараме трајна санација со поддршка од Владата и Градот. Во исто време, со проектот за гасификација и топлификација на Лисиче ќе им помогнеме на домаќинствата да не користат несоодветни горива. Со тоа ќе го намалиме загадувањето и ќе обезбедиме пониски сметки за греење.

Булевар:

Аеродром е млада општина која брзо расте. Како ќе се погрижите да не стане само бетон, туку и место со доволно зелени и културни содржини?

Митески:

Аеродром мора да биде општина на зеленило и здрав живот, а не само на згради. Секој нов урбанистички план ќе има минимум 30% зеленило. Тоа значи нови паркови, игралишта и дрвореди, но и уредување и проширување на постојните.

Дополнително, секој инвеститор ќе има обврска да засади дрвја за да остави трајна вредност зад себе. Подготвуваме и културни содржини – како мултимедијалниот центар со кино, театар и галерија. Културата е еднакво важна како и инфраструктурата, затоа што само кога луѓето имаат каде да се релаксираат и уживаат, општината станува вистински дом.

Булевар:

Еден од вашите најважни приоритети е проектот „Секое дете во градинка“. Кои се конкретните чекори за да се обезбеди место за секое дете и каде точно ќе се градат новите објекти?

Митески:

Во следните четири години предвидуваме изградба на пет нови градинки со вкупен капацитет од над 700 дечиња: една во Долно Лисиче, нова градинка во Населба Лисиче, објект во Јане Сандански, во Мичурин и во Острово. Со овие вложувања целосно ќе ја елиминираме листата на чекање и ќе создадеме услови родителите да бидат мирни, а децата згрижени во современи и безбедни објекти. Ова е најголемата инвестиција во нашата иднина – во децата и во семејствата на Аеродром.

Булевар:

Многу жители бараат повеќе културни содржини во општината. Што предвидува проектот „Култура дома“ и како тоа ќе ја промени општината?

Митески:

Со проектот „Култура дома“ конечно носиме култура и уметност во срцето на Аеродром. На површина од 1.400 квадратни метри ќе изградиме модерен мултимедијален центар кој ќе биде дом на театарски претстави, кино проекции, концерти, изложби и разни културни настани.

Центарот ќе има и современо уредена библиотека со читална, достапна за сите генерации. За првпат аеродромци ќе имаат свое место каде што ќе можат да се инспирираат, да учат и да се дружат – тоа е новата енергија што ја носиме во нашата општина.

Булевар:

Со проектот „Нула комуналии – прв дом за млади“ најавувате силна поддршка за младите. Како точно ќе функционира оваа мерка и што ќе значи таа за младите семејства во Аеродром?

Митески:

Секое лице до 30 години кое ќе реши да изгради, догради или надгради куќа ќе биде целосно ослободено од плаќање комуналии кон Општина Аеродром. Тоа е големо олеснување на патот до сопствен дом. Со оваа мерка им помагаме на младите да останат во својата општина, да создаваат семејства и да ја гледаат својата иднина токму тука.

Булевар:

Што ќе донесе новиот спортски центар покрај Вардар и на кој начин ќе придонесе за здравјето и социјалниот живот на аеродромци?

Митески:

Спортскиот центар ќе биде вистински бисер на нашата општина. На површина од 100.000 квадрати ќе изградиме простор каде што секој ќе може да го најде своето место – од професионални спортисти до рекреативци и семејства. Центарот нема да биде само спортска сала, туку целосно уреден комплекс со повеќе спортови, со зони за рекреација и дружење.

Со тоа им нудиме на граѓаните здрав начин на живот, повеќе активности на отворено и можност да се зближуваат. Уверен сум дека овој центар ќе стане симбол на нов, активен и модерен Аеродром.