Република

Коњановски повика на еднаков медиумски простор за сите кандидати во Битола

Актуелниот градоначалник на Битола и кандидат за нов мандат, Тони Коњановски, на вчерашната дебата во организација на телевизија „Тера“ ја повика медиумската куќа да овозможи еднаков простор за сите осум кандидати за градоначалник на Битола.

Коњановски истакна дека е важно граѓаните да ја слушнат визијата, проектите и ставовите на сите кандидати, а не само на дел од нив, бидејќи тоа претставува суштина на демократскиот процес и транспарентната јавна дебата.

„Би било фер сите кандидати да бидат дел од ваквите дебати, за граѓаните да донесат информирана одлука врз основа на аргументи и програми,“ нагласи Коњановски.

На дебатата учествуваа четворица кандидати – Тони Коњановски од ВМРО-ДПМНЕ, Методија Куновски од СДСМ, Габриела Илиевска од Поинаку и Зоран Николовски, независен кандидат поддржан од Левица.
Не присуствуваа Мирјана Мирчески (Македонска Ера Трета), Васко Делоски (независен), Ќире Димов (ТМРО) и Јорго Огненовски (Демократи).

Од телевизијата „Тера“ објаснија дека изборот на учесници бил направен според претходна уредувачка политика, која предвидува покана до претставници на партии и групи што имаат советници во Советот на Општина Битола.

Со својот настап, Коњановски испрати порака за фер и отворен изборен процес во кој, како што рече, граѓаните се тие што треба да ја слушнат секоја идеја и сами да одлучат кому ќе ја дадат довербата.

Република

Битола го одбележа Денот на својот заштитник: Литургија и литија во чест на Св. Нектариј Битолски

Со света архиерејска литургија и свечена литија, денес во Битола беше одбележан Денот на Свети Нектариј Битолски, заштитник на градот. Верници од Битола се собраа во храмот „Свети Великомаченик Димитриј“, каде што се одржа Светата Божествена Литургија во чест на преподобниот Нектариј, кој се упокоил на 5 декември 1500 година.

На литургијата присуствуваа градоначалникот на Битола, Тони Коњановски, како и претседателот на Советот на Општина Битола, Бојан Бојкоски, заедно со бројни верници.

По завршувањето на богослужбата, голем број присутни верници пристапија кон Светата Причест. Потоа, согласно долгогодишната традиција, низ повеќе битолски улици се одржа свечена литија, во која учествуваа бројни граѓани.

По повод празникот, градоначалникот Тони Коњановски упати честитка до битолчани, посакувајќи Свети Нектариј Битолски постојано да биде нивен духовен заштитник и водилка.

„На сите сограѓани им го честитам Денот на Заштитникот на градот – Свети Нектариј Битолски. Неговата заштита нека биде постојано со нас. Секојдневието да го исполнуваме со љубов, меѓусебно почитување и добрина, вредности со кои ќе ја градиме иднината на Битола и на генерациите што доаѓаат“, порача градоначалникот Коњановски.

Република

УТРЕ БЕЗ СТРУЈА ДЕЛ ОД ТЕТОВО И СЕЛОТО ДОБРОШТЕ

Утре, 19 декември 2025 година, поради планирани работи на електродистрибутивната мрежа, без електрична енергија ќе останат дел од град Тетово и едно тетовско село.

Во периодот од 09:00 до 14:00 часот, прекин во снабдувањето со струја ќе имаат корисниците на улица 114 кај СИЗ во Тетово.

Во исто време, од 09:00 до 14:00 часот, без електрична енергија ќе биде и дел од селото Доброште, поточно објектите кои се наоѓаат во близина на старата џамија.

Од надлежните информираат дека прекинот е поради планирани интервенции со цел подобрување на сигурноста на електроснабдувањето.

Република

Три децении пријателство: Македонија слави 30 години дипломатски врски со 14 земји

Во свечена атмосфера во Министерството за надворешни работи и надворешна трговија, денес беа одбележани три децении од воспоставувањето на дипломатските односи на Република Македонија со 14 земји, меѓу кои Соединетите Американски Држави, Грција, Австралија, Саудиска Арабија, Романија, Молдавија, Индија, Естонија, Украина, Казахстан, Монголија, Азербејџан, Литванија и Израел.

Свои обраќања на настанот имаа заменик-министерот за надворешни работи и надворешна трговија, Зоран Димитровски, како и амбасадорката на Романија, Адела Моника Аксинте.

Во своето обраќање, заменик министерот Димитровски истакна дека денес се слави „триесетгодишно патување на просперитет и взаемно почитување“ кое започнало во 1995 година. „Во тие рани години на нашата независност, секое воспоставување на дипломатски односи беше вистински камен-темелник во градењето на нашата државност. Тие први чекори го одбележаа нашиот непоколеблив пат кон западноевропските вредности и нашите аспирации за интеграција во евроатлантското семејство“, нагласи Димитровски.

Свечениот настан беше прилика да се потсети на значењето на долгорочната соработка и пријателството меѓу Република Македонија и земјите партнери, како и на заедничките вредности кои ги градат меѓусебните односи во изминатите три децении.