Свет

ЕУ разгледува користење дополнителни 25 милијарди евра од рускиот имот за заем на Украина

Европската унија планира да искористи околу 140 милијарди евра замрзнат руски државен имот за финансирање на голем заем за Украина, но Европската комисија сака да ја прошири иницијативата и понатаму.

Според документ до кој дошол Politico, најголемиот дел од замрзнатиот руски имот се наоѓа во белгискиот финансиски депозитар Euroclear, додека дополнителни 25 милијарди евра се чуваат на приватни банкарски сметки низ ЕУ.

Извршното тело на Унијата сака да разгледа можност да се искористат и тие средства за издавање заем за Киев.

„Потребно е да се утврди дали иницијативата за Репарациски заем може да се прошири и на другиот блокиран имот во рамките на ЕУ“, се наведува во документот кој Комисијата го дистрибуирала до европските престолнини пред состанокот на амбасадорите во петок.

Сепак, правната изводливост на оваа идеја сè уште не е детално оценета и мора да се утврди пред да се преземат конкретни чекори.

Документот содржи „дизајн-принципи“ за Репарацискиот заем за Украина, кој ќе биде разгледуван на следниот самит на ЕУ во Брисел. Се очекува лидерите на Унијата да ј повикаат Комисијата да подготви официјален предлог.

Министрите за финансии ќе ја разгледаат нацрт-иницијативата во ноември. Според документот, заемот би бил поддржан со национални гаранции од земјите членки – барање што особено го поставува Белгија, која стравува дека Москва би можела правно да се обиде да го врати имотот под санкции.

Во документот се наведува дека треба да се воспостави „цврста структура на гаранции и ликвидност“, за да ЕУ секогаш може да ги исполнува своите обврски кон Euroclear.

Планирано е создавање систем на билатерални гаранции помеѓу земјите членки и Унијата, кои би овозможиле пристап до потребна ликвидност кога е тоа неопходно.

Новиот седумгодишен буџет на ЕУ, што ќе започне во 2028 година, ќе ги преземе националните гаранции и ќе обезбеди финансиско покритие во рамките на буџетската резерва.

По одобрувањето на заемот, средствата би биле насочени кон развој на украинската одбранбена и технолошка индустрија, нејзино интегрирање во европската одбранбена структура и поддршка на државниот буџет на Украина.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.