Балкан

Србија енергетски колапс: Бугарија го блокира транзитот на руски гас

Србија се соочува со сериозна енергетска неизвесност по најавите дека Бугарија нема да дозволи проток на руски гас преку гасоводот „Балкански поток“. Српската министерка за рударство и енергетика, Дубравка Ѓедовиќ Хандановиќ, изјави дека ситуацијата е „речиси безнадежна“ и дека Србија ќе биде директно погодена од одлуката на Софија.

„Суштината е дека Бугарија нема да дозволи проток на руски гас, што ќе и наштети и на Србија. Се надеваме дека ќе најдеме решение и правиме се што е во наша моќ, но ситуацијата е речиси безизлезна, имајќи ја предвид моменталната состојба во врска со српската нафтена индустрија“, наведе Ѓедовиќ Хандановиќ во писмена изјава.

Таа додаде дека Србија, иако не е дел од конфликтите што ја предизвикале оваа енергетска криза, сепак „е погодена без никаква вина“.

Советот на ЕУ подготвува регулатива со која од 1 јануари ќе се забрани транзитот на руски гас кон трети земји, а конечниот текст ќе биде усвоен по консултациите меѓу Европскиот парламент и Претседателството на Советот. Според предлогот, нови договори за увоз на руски гас нема да може да се склучуваат по почетокот на 2025 година, а постојните ќе мора да бидат раскинати најдоцна до крајот на 2027 година.

Претседателката на српскиот парламент, Ана Брнабиќ, изјави дека ова е „катастрофална вест за Србија“ и додаде дека се надева дека претседателот Александар Вучиќ ќе најде решение за да се избегне енергетски колапс.

Балкан

Заглавен европскиот пат: БиХ останува без одлука за старт на преговори со ЕУ

Советот на министри на Босна и Херцеговина денес не успеа да донесе одлуки што би овозможиле отворање на преговорите за членство со Европската Унија пред седницата на Европскиот совет закажана за 18 и 19 декември. Причина за тоа беше повторното одбивање на министрите именувани од Милорад Додик да се дискутира за два клучни реформски закона.

На дневниот ред, објавен минатата недела од претседателката на Советот на министри Борјана Кришто, беа предлог-законите за Судот на БиХ и за Високиот судски и обвинителски совет, како и одлуката за формирање канцеларија на главниот преговарач со ЕУ. Сепак, по ултиматумот од министрите за надворешна трговија и за финансии, овие точки воопшто не беа разгледувани.

Тие се заканија дека ќе го блокираат дневниот ред доколку се отвори расправа за реформските закони, што практично би значело и неодржување на седницата. Поради тоа, Кришто ги повлече спорните точки, а Советот разгледуваше само помалку значајни информации и технички прашања.

Властите на Република Српска не ги прифаќаат нацрт-законите подготвени од Министерството за правда, иако тие се изработени согласно препораките на Европската комисија. Дополнително, инсистираат главниот преговарач со ЕУ да доаѓа од СНСД, барање што партиите од бошњачко-граѓанскиот блок категорично го одбиваат.

Засега нема најава кога клучните реформски закони ќе се најдат повторно на дневен ред на Советот на министри или во државниот парламент. Сè поизвесно е дека Босна и Херцеговина ќе ја дочека 2026 година без јасна перспектива за започнување преговори со Европската Унија.

Иако земјата доби условно зелено светло за отворање преговори уште во март 2024 година, оттогаш нема конкретен напредок. Заедно со Косово, БиХ во моментов се наоѓа на дното од процесот на европска интеграција меѓу земјите од Западен Балкан.

Балкан

Грчките земјоделци повторно блокираа премин: Богородица ограничен за патнички возила

Граничниот премин Богородица од 18 часот попладнево е блокиран за сите видови сообраќај поради протест на грчките земјоделци, соопшти Автомото сојузот на Македонија.

Засега, на преминот можат да влегуваат само товарни возила од Грција кон Македонија, додека излез од Грција е дозволен само за товарни моторни возила. Патнички возила и автобуси засега не можат да ја користат граничната линија.

Автомото сојузот апелира на внимателност и следење на сообраќајните информации пред патувањето кон граничниот премин Богородица.

Балкан

Турски Ф-16 собори дрон над Црното Море

Турските воени сили соборија неидентификуван дрон кој се приближувал кон турскиот воздушен простор над Црното Море, соопшти Министерството за одбрана. Објектот бил „надвор од контрола“, а соборувањето се извршило на безбедна локација, надвор од населени места, за да се избегне потенцијална штета.

Инцидентот се случува во услови на зголемени регионални тензии, по нападите на украинските поморски дронови врз руски танкери во близина на турскиот брег. Турските воздухопловни сили реагирале со подигање на ловци Ф-16 откако дронот бил детектиран.

Претседателот Реџеп Таип Ердоган претходно ги осуди украинските напади, оценувајќи ги како сериозна закана за безбедноста на пловидбата, човечките животи и животната средина. Министерството за одбрана не соопшти дополнителни детали за точната локација и времето на инцидентот.