Магазин

Претставување на Galaxy XR: Отворање на нови светови

Создаден врз отворена, скалабилна платформа со мултимодален АИ во своето јадро, Galaxy XR го означува почетокот на Android XR екосистемот, ослободувајќи иднина исполнета со истражување, забава и работа.

Скопје 22 Октомври 2025 – Samsung Electronics денес го претстави Galaxy XR за пазарите на Јужна Кореја и САД воведувајќи нова категорија на АИ-родени уреди, создадени за да овозможат имерсивни искуства во форма оптимизирана за мултимодален АИ. Како прв производ изграден врз новата Android XR платформа, заеднички развиена од Samsung, Google и Qualcomm Technologies, Galaxy XR го претставува идниното единство на откривање, забава и работа, овозможувајќи на корисниците да уживаат во природни и длабоко имерсивни искуства, од секојдневни задачи до нови хоризонти. Ова е првиот чекор во долгорочното XR патување на Samsung, со идни иновации што ќе го опфатат целиот спектар на XR форми, вклучувајќи AI очила.

“Со Galaxy XR, Samsung претставува сосема нов екосистем на мобилни уреди,“ изјави Вон-Џун Чои, главен оперативен директор на одделот Mobile eXperience (MX) при Samsung Electronics. „Изграден на Android XR, Galaxy XR ја проширува визијата за мобилен АИ кон нова граница на имерсивни и значајни можности, овозможувајќи XR да премине од концепт во секојдневна реалност – и за индустријата и за корисниците.”

“Android XR е првата Android платформа целосно создадена за ерата на Gemini, и навистина сме возбудени што денес правиме голем чекор напред со претставувањето на Galaxy XR,“ рече Самир Самат, претседател на Android Ecosystem при Google. „Преку нашето партнерство со Samsung, Android XR ќе отвори сосема нови начини за истражување, поврзување и создавање, градејќи отворена и обединета платформа за следната еволуција на компјутерите.”

“Galaxy XR ја отелотворува нашата визија за иднината, каде синергијата меѓу АИ и XR ги трансформира можностите на персоналните компјутери,“ изјави Алекс Катузијан, генерален менаџер на одделот Mobile, Compute & XR при Qualcomm Technologies, Inc. „Возбудени сме што соработуваме на оваа иницијатива, бидејќи Galaxy XR ќе донесе нови употребни случаи во разни индустрии и ќе отвори пат за возбудливи мулти-уредни искуства, овозможени преку нашата работа со Samsung и Google.

Дизајниран да ја ослободи целосната моќ на мултимодалниот АI

Galaxy XR отвора нови можности со мултимодален АИ, трансформирајќи го начинот на кој луѓето се поврзуваат со технологијата во секојдневниот живот.

За да ја оживее заедничката визија на Samsung, Google и Qualcomm, Galaxy XR е првиот производ изграден на новата Android XR платформа, која има Gemini вграден уште од почетокот. Со интеграцијата на Gemini на системско ниво, Galaxy XR не изгледа како алатка што ги следи командите на корисникот, туку како нов тип АИ-компаньон, кој му помага да ги управува своите задачи, нудејќи природна и интуитивна интеракција преку глас, вид и движење. Во форма на хедсет, Galaxy XR го разбира опкружувањето на корисникот – гледа што гледа тој и слуша што слуша тој. Ова му овозможува да реагира на природен и човечки начин, нудејќи сосема нови можности за интеракција со технологијата.

Отворена соработка што создава скалабилен Android XR екосистем

Како дел од својата долгорочна визија за XR, Samsung изгради нов XR екосистем во партнерство со Google и Qualcomm, отворајќи нови можности за индустријата.

Совместно развиениот Android XR е моќна платформа што го става АИ во центарот на искуството. Таа е дизајнирана да се скалира низ различни форми, од хедсети до АИ очила и понатаму, а Galaxy XR ја користи силата на овој отворен и скалабилен екосистем.
Сите апликации изградени врз Android платформата функционираат веднаш на Galaxy XR, овозможувајќи им на корисниците да уживаат во познатите мобилни искуства што веќе ги сакаат, правејќи го уредот истовремено корисен и револуционерен.
Бидејќи платформата е изградена врз OpenXR стандардите, програмерите кои користат OpenXR, WebXR или Unity можат лесно да ги пренесат своите искуства на Galaxy XR, нудејќи повеќе начини за раст и повеќе избори за потрошувачите.

Истражувај, работи и забавувај се без граници

Galaxy XR е внимателно дизајниран со човек во фокусот, нудејќи удобност при долготрајна употреба. Благодарение на обликот, напредните материјали и структурната оптимизација на секој дел, уредот постигнува идеална рамнотежа меѓу лесен дизајн и цврстина.
Ергономската рамка ја распределува тежината меѓу челото и задниот дел на главата, минимизирајќи непријатност на лицето и обезбедувајќи стабилна поддршка. Батеријата е одделена од хедсетот, што го прави уредот покомпактен, полесен и поудобен. Galaxy XR исто така има отстранлив штитник за светлина, кој нуди дополнителна удобност кога е отстранет, или подлабока имерзија кога е прикачен.

Galaxy XR отвора сосема нови димензии на откривање, нудејќи голем број XR-оптимизирани искуства како Google Maps, YouTube, Circle to Search и Google Photos.

Патувај и истражувај со Google Maps: Користи го Gemini како водич за навигација и добиј персонализирани препораки за блиски локации во 3D опкружување.

Истражувај содржини со АИ: Прашај го Gemini природно за видеа на YouTube или информации за она што го гледаш, за побогато образовно и забавно искуство.

Види повеќе со видео passthrough и Circle to Search: Во passthrough режим, гледај го реалниот свет околу себе и со едноставен круг од рака пребарај информации за објекти пред тебе.

Претвори видеа и фотографии во 3D: Претвори 2D слики во 3D искуства и оживеј спомени на сосема нов начин.

Благодарение на напредните сензори, камери и моќен хардвер, Galaxy XR прецизно ги следи движењата на главата, рацете и очите, нудејќи вистинска имерзија. Микрофоните се стратегиски поставени и поддржани од софтвер што ги филтрира надворешните звуци и го снима гласот на корисникот јасно.

Galaxy XR нуди и ново ниво на имерзија во забавата, спортот и гејмингот, благодарение на своите врвни перформанси:

Имерсивно гледање: Гледај омилени серии на 4K Micro-OLED екран што наликува на лично кино.

Спортски искуства: Следи повеќе натпревари истовремено, како да си на стадион.

АИ гејминг поддршка: Разговарај со Gemini за совети, тренинг и подобрено искуство во реално време.

Креирај и уредувај во 3D: Со Project Pulsar од Adobe, лесно уредувај видеа, додавај 3D длабочина и елементи зад субјекти на огромно платно.

Поттикнат од Snapdragon® XR2+ Gen 2, Galaxy XR нуди следна генерација имерсивни искуства со извонредна визуелна јасност и напреден вештачки интелект (AI) преку Qualcomm® Hexagon™ NPU. Дополнително, автономијата од 2,5 часа користење на батеријата им овозможува на корисниците целосно да уживаат во омилените содржини во тотална, непрекината имерзија. Во комбинација со импресивниот звук и ултра-високата резолуција на дисплеите, Galaxy XR ги става корисниците во центарот на проширените светови, оптимизирани за XR.

Samsung исто така е посветен на исполнување на различни потреби на корпоративните и индустриските клиенти, како што се виртуелни обуки во тешката индустрија и градежништвото, вклучително и партнерство со Samsung Heavy Industries за користење на Galaxy XR при виртуелна обука за бродоградба, со цел зголемување на продуктивноста и безбедноста при работа.

Компанијата соработува и со Qualcomm Technologies, користејќи ја нивната Snapdragon Spaces™ технологија за пристап до Enterprise ISV екосистем, кој им обезбедува на развивачите потребни алатки за пренесување на нивните апликации на Galaxy XR и создавање нови можности за деловниот свет да усвои бизнис решенија оптимизирани за Android XR.

Заедно, овие соработки создаваат XR можности подготвени за корпоративна примена, кои овозможуваат напредна обука, ко-дизајн на решенија и безбедна далечинска соработка.

Како дел од својата поширока XR стратегија, Samsung развива повеќе форм-фактори, вклучувајќи AI очила. Во соработка со Google, компанијата работи со иновативниот lifestyle бренд Warby Parker, познат по користење на технологија за создавање естетски дизајнирани очила и исклучителни искуства за клиентите.

Истовремено, Samsung соработува и со Gentle Monster за да донесе модерни, стилски очила што обединуваат врвна AI технологија, културно влијание и дизајнерско лидерство.

Беспрекорно поврзани со Android XR екосистемот, овие уреди ќе ја комбинираат напредната XR функционалност со стил, удобност и практичност, носејќи истражување, работа и забава без граници во секојдневниот живот.

Достапност

Galaxy XR ќе биде достапен почнувајќи од 21 октомври во САД и 22 октомври во Кореја.
За повеќе информации, посетете ги: Samsung Newsroom, SamsungMobilePress.com or Samsung.com.

Магазин

Рим воведува наплата на билети за една од своите најголеми атракции

Градските власти во Рим размислуваат за воведување наплата за посетите на една од најпознатите туристички атракции во градот – Фонтаната Треви, поради сè поголемиот број туристи и проблемите со пренатрупаност во централното градско подрачје.

Фонтаната Треви, сместена во истоимениот кварт, со децении е симбол на Рим и место каде посетителите традиционално фрлаат парички за среќа. Обичајот стана светски познат по филмот „Три парички во фонтаната“, а според проценките, од фонтаната дневно се собираат околу 2.800 евра, односно повеќе од 900.000 евра годишно. Собраните средства се донираат на католичка добротворна организација.

Во првата половина од 2025 година, повеќе од 5,3 милиони туристи ја посетиле Фонтаната Треви, што предизвика бројни поплаки за преголеми гужви, долги редици и појава на џепчии. Како одговор на состојбата, од јануари се планира воведување два одделни влеза – еден за жителите на Рим и еден за туристите.

Италијанските медиуми објавија дека се разгледува можност од 7 јануари туристите да плаќаат билет од две евра за посета на фонтаната, што, според неофицијални проценки, би можело да донесе значителни приходи во градскиот буџет. Сепак, Градскиот совет на Рим соопшти дека засега нема конечна одлука и дека станува збор само за опција која е предмет на анализа.

Фонтаната Треви е доцнобарокно архитектонско дело, изградена во 18 век, со ширина од 20 и висина од 26 метри, и претставува најголемата фонтана во градот. Таа неодамна беше прогласена за една од најдобрите туристички атракции според изборот на патниците за 2025 година.

Поради пренатрупаноста, од минатата година бројот на посетители е ограничен на максимум 400 лица во исто време, а воведен е и систем за организирано чекање во ред. И покрај тоа, гужвите остануваат сериозен проблем, а не е јасно дали евентуалната наплата на билети ќе придонесе за негово решавање, со оглед на континуираниот раст на туризмот во Рим.

Магазин

САД се закани со жестоки мерки поради острата казна на ЕУ за X на Маск

Администрацијата на американскиот претседател Доналд Трамп упати предупредување за можни протумерки кон европските компании поради „дискриминаторни“ мерки против американските услуги.

Во објава на платформата X, Уредот за трговски претставници на САД (USTR) го обвини Европскиот сојуз и некои членки за „дискриминаторни и проблематични тужби, даноци, казни и директиви против американските услуги“. Во исто време, USTR посочи дека европските компании како Accenture, DHL, Siemens и Spotify „слободно работат“ во САД.

„Ако ЕУ и земјите членки инсистираат на продолжување со ограничувањата и дискриминирачките мерки, САД нема да имаат друг избор освен да користат сите расположливи алатки за да се спротивстават на овие неправедни мерки“, се наведува во соопштението.

Ова следува по казната од 120 милиони евра што Европската комисија ја изрече на платформата X на Елон Маск за кршење на правилата за транспарентност според Актот за дигитални услуги. По казната, X го укина акаунтот за реклами на Европската комисија, а Маск спореди ја Унијата со нацистичка Германија.

ЕУ нагласи дека казната е изречена поради обесхрабрување на корисниците, оневозможување на истражувачите да дојдат до податоци и недостаток на транспарентност во документацијата за реклами. Трамп претходно ја критикуваше казната, велејќи дека „Европа се движи во погрешен правец“.

Магазин

Влад Илиќ од Куманово: Најдобар стенд ап комичар во Велика Британија за 2025

Во „бастионот“ на светската комедија, култниот Comedy Store во Лондон, македонското знаме симболично се развеа на највисокото скалило. Во конкуренција на дури 700 комичари од целото Обединето Кралство, на 3 декември 2025 година, Македонецот Влад Илиќ ја понесе престижната титула „Најдобар стенд-ап комичар во Велика Британија за 2025“.

По првиот голем блесок на ББС пред три години, овој успех е круна на една десетгодишна фасцинантна транзиција. Патот на Илиќ започна како актер во Кумановскиот театар, каде што под влијание на домашните мајстори како Сашко Коцев и Тони Михајловски, почна да го бруси својот талент за подоцна да се лансира меѓу светските ѕвезди.

„Среќен сум што годините поминати на сцена се крунисани со ова признание. Тоа е потврда за сиот влог, но најмногу за хуморот кој е специфичен и веќе препознаен. Она што ме издвојува е нашиот менталитет – тој уникатен македонски ген кој ни овозможува на животот да гледаме малку понесериозно и пообјективно. Можеби во фудбал секогаш ќе губиме од Англичаните, ама во хуморот не ни можат ништо!“, вели расположениот Илиќ веднаш по триумфот.

Зад блескавиот пехар стојат илјадници непроспиени ноќи, аматерски настапи во зачадени клубови и неуморно пишување материјали. Влад денес е вистински полиглот на сцената, изведувајќи ги своите шоуа на четири јазици: македонски, англиски, српски и италијански.

„Ништо не е случајно во ваков натпревар,“ објаснува тој. „Ме грее љубовта кон професијата, поддршката од семејството и гордоста што ја претставувам мојата татковина. Тој пламен е посилен од студот на овој дождлив остров.“

Покрај статуетката, Илиќ доби и парична награда од 10.000 фунти. На прашањето каде ќе завршат средствата, тој во свој препознатлив стил одговори: „Ќе ги дадам во хуманитарни цели – на братучедите.“