Република

Проданоски: ВМРО е кодот на Македонија – нека ни е честит и вековит 23 Октомври

Новoизбраниот градоначалник на општина Прилеп, Дејан Проданоски, по повод 23 Октомври – Денот на македонската револуционерна борба, упати честитка до граѓаните, истакнувајќи дека овој ден е симбол на почетокот на организираната борба на македонскиот народ за слобода и државност.

„Нека ни е честит и вековит 23 Октомври – Денот на македонската револуционерна борба! Овој голем ден го славиме како симбол на почетокот на организираната македонска борба за слобода, автономија и создавање на самостојна држава“, порача Проданоски.

Тој потсети дека токму на 23 октомври 1893 година, во куќата на книжарот Иван Хаџи Николов во Солун, шестмина млади македонски патриоти – Христо Татарчев, Даме Груев, Петар Поп Арсов, Иван Хаџи Николов, Антон Димитров и Христо Батанџиев – ја основале Македонската револуционерна организација, со што ја запалиле искрата што го осветли патот кон македонската слобода.

„Овој датум е темелот на нашето државотворно наследство и потсетник дека македонскиот народ низ вековите се бореше со достоинство и вера во својата слобода. Од Солун 1893, преку Илинден 1903 и Крушевската Република, па сè до Народноослободителната борба, оваа идеја живееше и прерасна во реалност – во самостојна и независна Македонија“, истакна Проданоски.

Во пораката тој додаде дека денес, повеќе од кога било, е важно да се негува духот на револуционерите, чиј идеал за обединета, горда и силна Македонија останува траен завет.

„Со длабока почит се поклонуваме пред делото на нашите револуционери, чии идеали и денес нè обединуваат. Да живее Македонија! ВМРО е кодот на Македонија!“, порача Проданоски.

Република

Шестоседот на Попова Шапка од денес повторно во функција

Жичницата шестосед на Ски центарот Попова Шапка од 26 декември, ќе биде отворена за прошетки и скијачки активности, соопштија од центарот. Сепак, за целосно уживање на ски-патеките се очекуваат свежи снежни врнежи кои ќе го овозможат официјалното отворање на зимската сезона.

„Со подобрување на условите, планираме официјално отворање на зимската сезона и со нетрпение очекуваме да ве пречекаме за сезона исполнета со спорт, забава и незаборавни искуства“, велат од Ски центарот Попова Шапка.

Климатските услови засега остануваат стабилни, но скијачката заедница со нетрпение ја очекува првата сериозна снежна покривка.

Република

Тоневски: Ново кошаркарско игралиште за учениците во Злетово

Заврши асфалтирањето на кошаркарското игралиште во подрачното основно училиште „Кирил и Методиј“ во Злетово. Со овој зафат е создадена основата за целосно уредување на спортскиот простор кој ќе биде наменет за учениците и младите од населбата.

По стабилизирање на временските услови, предвидено е поставување мултифункционална спортска подлога, нови кошеви, клупи за одмор, како и уредување на пристапни патеки до теренот.

Проектот е финансиран од страна на ООУ „Браќа Миладиновци“, во соработка со Општина Пробиштип.

Градоначалникот Тони Тоневски истакна дека вложувањата во спортската инфраструктура се директна инвестиција во здравјето и правилниот развој на децата, нагласувајќи дека општината ќе продолжи со поддршка на вакви проекти во сите населени места.

Република

Повеќе села во тетовско утре ќе останат без електрична енергија

Поради планирани интервенции на електродистрибутивната мрежа, утре (26 декември) без струја ќе останат делови од повеќе села во тетовскиот регион.

Според најавата, прекинот е планиран во периодот од 09:00 до 14:00 часот во селото Желино, и тоа објектите од центарот кон Горната џамија. Во истиот временски интервал без електрична енергија ќе бидат и делови од селото Гајре, особено објектите во близина на џамијата.

Во селото Ново Село (Желино) прекинот ќе трае од 09:00 до 14:30 часот и ќе ги опфати објектите на влезот во селото, кај училиштето, како и објектите кон горниот дел од селото.

Исто така, од 09:00 до 14:30 часот без струја ќе бидат и делови од селото Групчин, додека во селото Цепчиште прекинот е најавен од 09:00 до 14:00 часот.

Надлежните служби апелираат до граѓаните навремено да ги прилагодат своите обврски и да имаат разбирање додека траат планираните работи на мрежата.