Балкан

Хрватскиот парламент враќа задолжителен воен рок за младите

Хрватскиот Сабор донесе одлука за враќање на задолжителната воена служба, која беше укината во 2008 година и од тогаш се извршуваше само доброволно со мал интерес.

Според новите измени на законот, воениот рок ќе трае два месеци, а лицата што ќе го отслужат ќе добиваат месечна нето-плата од 1.100 евра. Покрај тоа, службата ќе се смета за работен стаж.

Задолжителниот рок ќе важи за мажи на возраст од 19 до 30 години, додека жените се ослободени, но можат да аплицираат за доброволна служба. Лицата што го завршиле воениот рок ќе имаат приоритет при вработување во органите на државната и локалната администрација, доколку ги исполнуваат истите услови како и другите кандидати.

Законот предвидува и можност за цивилна служба за оние кои имаат приговор на совеста. Тие можат да служат во Цивилната заштита на Министерството за внатрешни работи или во локалните единици на нивното место на живеење. Обуката во Цивилната заштита ќе трае три месеци секој ден, додека службата во локалните единици, на позиции како противпожарна заштита, управување со животната средина или одржување на јавни патишта, ќе трае четири месеци, односно пет работни дена по осум часа.

Оние што ќе се одлучат за цивилна служба ќе добиваат помал надомест, а висината на надоместокот ќе ја одреди Владата.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.