Свет

Мицкоски од Пробиштип: Во недела масовно на избори – бројот 9 е изборот за развој и промени

Лидерот на ВМРО-ДПМНЕ, Христијан Мицкоски, на вечерашниот мини-митинг во Пробиштип повика на масовна излезност на вториот круг од локалните избори што ќе се одржат во недела, на 2 ноември. Тој порача дека седењето дома е најлошата опција и дека секој глас е важен за иднината на општините и државата.

„Во првиот круг коалицијата што ја предводиме освои 33 градоначалници, а со двата што се приклучија потоа, бројката достигна 35. Во уште 24 општини ќе се одлучува во недела, и сигурен сум дека по изборите ќе имаме 59 градоначалници“, изјави Мицкоски, додавајќи дека коалицијата има убедливо мнозинство во 58 општински совети, вклучувајќи го и Градот Скопје.

Тој истакна дека победата во Скопје, каде што кандидатот на ВМРО-ДПМНЕ Орце Ѓорѓиевски води со убедлива предност, ќе значи историски успех – 60 општини под водство на партијата.

„Такво нешто досега не се случило во независна Македонија“, рече Мицкоски, нагласувајќи дека овие избори покажуваат и пораз на Демократската унија за интеграција, партија која, како што рече, две децении била дел од сите влади.

Тој потенцира дека во вториот круг граѓаните имаат три избори: „Првата е победничката коалиција на ВМРО-ДПМНЕ, втората е СДСМ, која ја враќа државата назад, а третата, најлоша опција, е да се остане дома.“

Мицкоски ги повика граѓаните на Пробиштип да излезат масовно на гласање и да го поддржат кандидатот за градоначалник Тони Тоневски.

„Кога ќе го слушате разумот и срцето зад параванот, ќе видите дека таму стои бројот 9 и името на Тони Тоневски – избор за развој, за иднина и за вистински промени“, порача Мицкоски.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.