Скопје

ОСЛОБОДУВАЊЕ НА ТЕРИТОРИЈА КАРПОШ

Хумано решение за безбеден живот

Личен став на Сотир Лукровски, кандидат за градоначалник на Општина Карпош

Граѓаните на Скопје, а особено на Општина Карпош, со години живеат со чувство на страв и несигурност поради сè поголемиот број на улични кучиња. Многумина избегнуваат вечерни прошетки, родителите се плашат да ги пуштат децата сами надвор, а постарите лица се затвораат во своите домови. Ова не е начин на живот што го заслужуваме ние, граѓаните на Карпош. Крајно време е, со конкретни мерки, да се реши овој проблем, а не како досега, да се игнорира!

Јас, Сотир Лукровски, во мојата програма имам хумано и одржливо решение за сите бездомни кучиња во Карпош. Хуманото и ефикасното решение e перманетно засолниште за уличните кучиња! Овој проблем не се решава со игнорирање или со сурови мерки. Во текот на мојата кампања ги слушнав сите можни предлози, но малкумина понудија вистинско, долгорочно решение – перманентно и хумано отстранување на сите бездомни кучиња од територијата на Карпош.

Јас лично имам две кучиња и не дозволувам никакво нечовечно постапување кон животните. Меѓутоа, моето решение е јасно, спроведливо и фер. Тоа се темели на ангажман на приватно прифатилиште, каде што секое куче ќе биде третирано со грижа, почит и човечност.

Во прифатилиштето, кучињата ќе бидат првенствено стерилизирани и вакцинирани. Секое кутре ќе имаат редовна исхрана и чиста вода, ветеринарна грижа и хигиенски услови за престој, и најважно, можност за вдомување и нов живот.

Клучот на успехот лежи токму во вдомувањето – преку соработка со странски организации, љубители на животни и доброволци, особено туристи од северно европските земји, со кои ќе овозможиме многу од овие животни да најдат свои нови семејства. Ова е четиригодишен проект, со јасен план, контрола и одговорност. Со ваков четиригодишен пристап, обезбедуваме двоен бенефит – граѓаните повторно ќе се чувствуваат безбедно затоа ппто кутрињата ќе се дислоцираат уште во првите 6 месеци, а животните ќе имаат достоинствен и убав живот.

Мојата визија и решение за Карпош е општина без страв, општина со љубов кон животните и почит кон човекот. Општината мора да биде пример за европско управување – со хуман, модерен и одговорен пристап кон секој проблем. Карпош е далеку од некаква Паланка и не смее да дозволи сегашното (дваесет години глутници по улиците) да стане нормално. Тоа јас нема да го дозволам!

Преку партнерство со приватно засолниште за кучиња – повеќегодишен договор за деловна соработка, и редовна контрола од општинските служби, ќе воспоставам транспрентен систем кој е и одржлив, и етички исправен.

Партиципацијата на граѓаните е суштински дел од овој проект. Ги повикувам сите жители на Карпош да ми се придружат во оваа мисија. Да покажеме дека еднаш можеме, да живееме во безбеден и нормален Карпош. Да создадеме општина каде што децата повторно ќе играат на улиците без страв, старите лица ќе шетаат со спокој, а секое улично кутре ќе има место каде ќе биде згрижено, нахрането и сакано.

Јас сум убеден сум дека примерот што Карпош ќе го постави, брзо ќе биде прифатен и од останатите општини – и во Скопје, и низ цела Македонија.

Овој проект не е само мерка – ова е визија за безбеден и хуман Карпош.
Со правилен пристап, транспарентност и грижа, можеме да го решиме проблемот кој повеќе од две децении создава страв, поделби и непријатност.

Карпош без страв. Карпош со љубов!

Скопје

Од денес се плаќа паркинг во „Дајмонд мол’“

По повеќе од две години институционален застој, подземната гаража на „Дајмонд мол“ конечно влегува во режим на наплата. Новиот состав на Советот на Град Скопје ѝ даде зелено светло на компанијата „Лимак“ да започне со комерцијално управување со паркингот, со што од 1 јануари завршува периодот на практично бесплатно паркирање за посетителите.

Според новиот ценовник, првите два часа ќе чинат по 50 денари, а секој нареден час 60 денари. „Преноќено“ паркирање ќе се наплатува 1.500 денари, иста сума е предвидена и како казна за непрописно паркирање, како и за изгубен или оштетен паркинг-билет.

Од „Дајмонд мол“ информираат дека бесплатно паркирање ќе биде можно само со приложување фискална сметка во износ над 400 денари, и тоа исклучиво од Веро маркетот, Dream zone или автопералната. Во соопштението не се појаснува дали сметки од рестораните и продавниците во трговскиот центар ќе важат за оваа поволност, што веќе отвора простор за реакции кај посетителите.

Одлуката беше донесена на последната седница на Советот, со поддршка од советниците на ВМРО-ДПМНЕ и коалицијата, како и со гласови од советничката група на СДСМ. Така, по долг период на негласање и политичко калкулирање, „Лимак“ ја доби дозволата што со години ја бараше.

Компанијата и претходно се обидуваше да воведе наплата, па дури и кратко време наплаќаше без дозвола, сè додека градските инспектори не интервенираа. Иако формално постоеше правило за бесплатно паркирање во првите два часа и продолжување со сметка над 400 денари до девет часа, во пракса наплата речиси и немаше, а поставените паркомати останаа нефункционални.

Со новата одлука, овој „сив“ режим завршува. Од јануари, паркирањето во „Дајмонд мол“ станува уште една пресметлива ставка во трошоците на скопјани и на посетителите на еден од најголемите трговски центри во градот.

Скопје

Меџити ја пречека Елиса Спиропали во Чаир – фокус на регионалната соработка

По официјалната посета, градоначалникот на Општина Чаир, Изет Меџити, ја пречека и Елиса Спиропали во просториите на општината.
Средбата се одржа во пријателска и конструктивна атмосфера, при што беа разгледани актуелните регионални случувања, улогата на албанската дипломатија во јакнењето на меѓународните односи, како и значењето на подлабоката меѓуинституционална соработка во насока на заедничките интереси.

Според Меџити, посетата на Спиропали во Чаир испраќа јасна порака за политичка блискост, институционална поддршка и директно внимание кон Албанците во Северна Македонија. Воедно, таа претставува потврда за заемната волја за интензивирање на соработката меѓу двете земји.
Фокусот на разговорите бил ставен на развојот, интеграцијата и јакнењето на вредностите кои ги поврзуваат двете држави, при што беше нагласена потребата од продолжување на отворената комуникација и партнерскиот пристап во иднина.

Скопје

Жителите на Општина Аеродром сега можат директно да ја оценат работата на општината

Во обид да ја направи локалната самоуправа поотворена, поефикасна и поблиска до граѓаните, Општина Аеродром воведува нов, транспарентен и целосно анонимен начин на давање оцени и мислења за квалитетот на работењето на Општината и на секој вработен поединечно.

Целта на оваа иницијатива е директно вклучување на граѓаните во процесот на унапредување на локалната самоуправа, преку препознавање на позитивните практики, како и идентификување на областите каде постои простор за подобрување.

Анкетата е кратка, трае помалку од една минута и не собира лични податоци, а граѓаните можат лесно да учествуваат преку скенирање на QR-кодот поставен на официјалните банери на Општината. Со неколку клика, секој може да го изрази своето мислење и да даде оценка за работата на Општината.

„Секоја оцена и секое мислење од граѓаните ќе ни помогне да ги подобриме услугите и да ја зголемиме ефикасноста на нашето работење“, велат од Општина Аеродром, додавајќи дека активното учество на граѓаните е клучно за создавање на поодговорна и сервисно ориентирана локална самоуправа.

Општината ја изразува својата благодарност до граѓаните за довербата и за ангажманот во процесите кои го обликуваат идниот развој на заедницата.