Скопје

ОСЛОБОДУВАЊЕ НА ТЕРИТОРИЈА КАРПОШ

Хумано решение за безбеден живот

Личен став на Сотир Лукровски, кандидат за градоначалник на Општина Карпош

Граѓаните на Скопје, а особено на Општина Карпош, со години живеат со чувство на страв и несигурност поради сè поголемиот број на улични кучиња. Многумина избегнуваат вечерни прошетки, родителите се плашат да ги пуштат децата сами надвор, а постарите лица се затвораат во своите домови. Ова не е начин на живот што го заслужуваме ние, граѓаните на Карпош. Крајно време е, со конкретни мерки, да се реши овој проблем, а не како досега, да се игнорира!

Јас, Сотир Лукровски, во мојата програма имам хумано и одржливо решение за сите бездомни кучиња во Карпош. Хуманото и ефикасното решение e перманетно засолниште за уличните кучиња! Овој проблем не се решава со игнорирање или со сурови мерки. Во текот на мојата кампања ги слушнав сите можни предлози, но малкумина понудија вистинско, долгорочно решение – перманентно и хумано отстранување на сите бездомни кучиња од територијата на Карпош.

Јас лично имам две кучиња и не дозволувам никакво нечовечно постапување кон животните. Меѓутоа, моето решение е јасно, спроведливо и фер. Тоа се темели на ангажман на приватно прифатилиште, каде што секое куче ќе биде третирано со грижа, почит и човечност.

Во прифатилиштето, кучињата ќе бидат првенствено стерилизирани и вакцинирани. Секое кутре ќе имаат редовна исхрана и чиста вода, ветеринарна грижа и хигиенски услови за престој, и најважно, можност за вдомување и нов живот.

Клучот на успехот лежи токму во вдомувањето – преку соработка со странски организации, љубители на животни и доброволци, особено туристи од северно европските земји, со кои ќе овозможиме многу од овие животни да најдат свои нови семејства. Ова е четиригодишен проект, со јасен план, контрола и одговорност. Со ваков четиригодишен пристап, обезбедуваме двоен бенефит – граѓаните повторно ќе се чувствуваат безбедно затоа ппто кутрињата ќе се дислоцираат уште во првите 6 месеци, а животните ќе имаат достоинствен и убав живот.

Мојата визија и решение за Карпош е општина без страв, општина со љубов кон животните и почит кон човекот. Општината мора да биде пример за европско управување – со хуман, модерен и одговорен пристап кон секој проблем. Карпош е далеку од некаква Паланка и не смее да дозволи сегашното (дваесет години глутници по улиците) да стане нормално. Тоа јас нема да го дозволам!

Преку партнерство со приватно засолниште за кучиња – повеќегодишен договор за деловна соработка, и редовна контрола од општинските служби, ќе воспоставам транспрентен систем кој е и одржлив, и етички исправен.

Партиципацијата на граѓаните е суштински дел од овој проект. Ги повикувам сите жители на Карпош да ми се придружат во оваа мисија. Да покажеме дека еднаш можеме, да живееме во безбеден и нормален Карпош. Да создадеме општина каде што децата повторно ќе играат на улиците без страв, старите лица ќе шетаат со спокој, а секое улично кутре ќе има место каде ќе биде згрижено, нахрането и сакано.

Јас сум убеден сум дека примерот што Карпош ќе го постави, брзо ќе биде прифатен и од останатите општини – и во Скопје, и низ цела Македонија.

Овој проект не е само мерка – ова е визија за безбеден и хуман Карпош.
Со правилен пристап, транспарентност и грижа, можеме да го решиме проблемот кој повеќе од две децении создава страв, поделби и непријатност.

Карпош без страв. Карпош со љубов!

Скопје

Меџити ја пречека Елиса Спиропали во Чаир – фокус на регионалната соработка

По официјалната посета, градоначалникот на Општина Чаир, Изет Меџити, ја пречека и Елиса Спиропали во просториите на општината.
Средбата се одржа во пријателска и конструктивна атмосфера, при што беа разгледани актуелните регионални случувања, улогата на албанската дипломатија во јакнењето на меѓународните односи, како и значењето на подлабоката меѓуинституционална соработка во насока на заедничките интереси.

Според Меџити, посетата на Спиропали во Чаир испраќа јасна порака за политичка блискост, институционална поддршка и директно внимание кон Албанците во Северна Македонија. Воедно, таа претставува потврда за заемната волја за интензивирање на соработката меѓу двете земји.
Фокусот на разговорите бил ставен на развојот, интеграцијата и јакнењето на вредностите кои ги поврзуваат двете држави, при што беше нагласена потребата од продолжување на отворената комуникација и партнерскиот пристап во иднина.

Скопје

Жителите на Општина Аеродром сега можат директно да ја оценат работата на општината

Во обид да ја направи локалната самоуправа поотворена, поефикасна и поблиска до граѓаните, Општина Аеродром воведува нов, транспарентен и целосно анонимен начин на давање оцени и мислења за квалитетот на работењето на Општината и на секој вработен поединечно.

Целта на оваа иницијатива е директно вклучување на граѓаните во процесот на унапредување на локалната самоуправа, преку препознавање на позитивните практики, како и идентификување на областите каде постои простор за подобрување.

Анкетата е кратка, трае помалку од една минута и не собира лични податоци, а граѓаните можат лесно да учествуваат преку скенирање на QR-кодот поставен на официјалните банери на Општината. Со неколку клика, секој може да го изрази своето мислење и да даде оценка за работата на Општината.

„Секоја оцена и секое мислење од граѓаните ќе ни помогне да ги подобриме услугите и да ја зголемиме ефикасноста на нашето работење“, велат од Општина Аеродром, додавајќи дека активното учество на граѓаните е клучно за создавање на поодговорна и сервисно ориентирана локална самоуправа.

Општината ја изразува својата благодарност до граѓаните за довербата и за ангажманот во процесите кои го обликуваат идниот развој на заедницата.

Скопје

Дивоградбите го задушуваат Скопје: Професорите предупредуваат за сериозното загадување

Скопје и околината се соочуваат со сериозен проблем со загадувањето на воздухот, а опасноста не доаѓа само од познатите ПМ10 и ПМ2,5 честички. Како што посочија експертите на научната трибина организирана од Македонското еколошко друштво (МЕД), овие честички носат и други токсични супстанци кои, преку дишењето, директно навлегуваат во човечкиот организам и сериозно го загрозуваат здравјето.

„Проблемот не е само присуството на суспендирани цврсти честички, туку и токсичните материи што се врзуваат за нив и преку воздухот навлегуваат во телото. Индексот за квалитет на воздухот покажува сериозна неповолна состојба во Скопје“, рече д-р Марина Стефова, професорка на Институтот по хемија при ПМФ.

Според Стефова, загадувањето е најизразено во зимскиот период, кога температурната инверзија и зголеменото создавање на фини честички го прават воздухот густ и отровен. Но, штетните хемиски соединенија се присутни целата година, дури и кога нивното влијание не е толку очигледно.

Експертите истакнаа дека за решавање на проблемот се потребни сериозни мерки: намалување на емисиите од сообраќајот, намалување на користење на фосилни горива за греење, ограничување на производите со штетни хемикалии, зголемување на зелените површини, пошумување, едукација за еколошка одговорност и строга контрола на емисиите.

Скопје се издвојува како една од „жешките точки“ на загадување во регионален контекст, а високи нивоа на загадување се регистрираат и во Струмичката и Пелагониската Котлина, истакна проф. д-р Ивица Милевски од Институтот за географија при ПМФ.

„Градот е сместен во котлина, а непланската урбанизација дополнително го блокира природниот проток на воздухот низ Вардар. Наместо да се движи, воздухот се врти и создава ‘вртлози’ што го задржуваат загадениот воздух“, објасни Милевски. Тој додаде дека подобрувањето на состојбата бара радикални мерки насочени кон сообраќајот, индустријата, домаќинствата и урбаното планирање, како и повеќе зелени површини.

На трибината беше претставена и платформата Google Earth Engine, која овозможува прецизни и визуелни податоци за загадувањето, вклучувајќи јаглерод моноксид, азот диоксид и сулфур диоксид.

Најопасни се ПМ2,5 честичките, кои можат да навлезат длабоко во белите дробови и дури во крвотокот. Само во Европа, во 2023 година, тие биле причина за 206.000 смртни случаи. Азот диоксид, главно од сообраќајот, исто така предизвикува сериозни заболувања на срцето и белите дробови, со 34.000 смртни случаи во ЕУ само за минатата година.

На трибината се зборуваше и за перзистентните органски загадувачи (ПОПс) – супстанции кои се присутни секаде, од пестицидите во земјоделството до текстилните производи во секојдневна употреба. „Овие материи се исклучително трајни, се акумулираат во организмот и можат да предизвикаат канцер, нарушување на нервниот систем и проблеми со репродуктивното здравје“, истакна Сузана Андонова од Министерството за животна средина.

Проблемот е дополнително продлабочен од нефункционалниот систем за управување со отпад. Проф. д-р Трајче Стафилов посочи дека државата сè уште нема воспоставено ефективна мрежа на регионални депонии, што дополнително го загрозува здравјето и околината.