Свет

Лавров: Западот ја турка Европа кон нова голема војна

Рускиот министер за надворешни работи, Сергеј Лавров, предупреди дека западните земји се подготвуваат за голем воен судир и дека Европа ја губи својата безбедносна стабилност поради, како што рече, „агресивните планови на НАТО“.

Говорејќи на Меѓународната конференција за евроазиска безбедност во Минск, Лавров изјави дека Алијансата ги проширува своите активности кон Арктикот и Тихиот Океан со цел да ја изолира Русија и да ја ограничи Кина.

„Русија нема намера да нападне ниту една земја членка на НАТО или Европската унија. Подготвени сме тоа и формално да го гарантираме, но европските лидери избегнуваат да разговараат за вистински колективни безбедносни гаранции,“ рече Лавров, пренесува РИА Новости.

Тој ги обвини западните сили дека се обидуваат да ја претворат Евроазија во „феуд на НАТО“, додека Москва и нејзините партнери, меѓу кои Кина, Индија и Иран, се залагаат за нова „панконтинентална структура на рамноправност и неделива безбедност“.

„За разлика од Западот, ние веруваме дека стабилноста може да се постигне само ако сите земји имаат еднакви права, а не преку доминација на неколку привилегирани држави,“ истакна рускиот министер.

Осврнувајќи се на војната во Украина, Лавров ги обвини европските членки на НАТО дека намерно ја продолжуваат конфликтната состојба преку постојано снабдување на Киев со оружје и финансиска поддршка.

„Европските лидери се трудат да го убедат Вашингтон да се откаже од дипломатско решение и да продолжи со политиката на конфронтација,“ додаде тој.

Според Лавров, Русија останува отворена за дијалог за нова безбедносна рамка во Евроазија, но само под услов таа да се заснова на суверена еднаквост и взаемна почит, наместо на „диктат од Западот“.

Свет

Карлсон тврди: Можно е Трамп вечерва да најави воен судир со Венецуела

Американскиот новинар Такер Карлсон изјави дека постои можност американскиот претседател Доналд Трамп вечерва да ѝ објави војна на Венецуела, повикувајќи се на информации добиени од член на американскиот Конгрес.

Во подкастот „Sudging Freedom“, Карлсон рече дека на конгресмени им било соопштено дека војната е „неизбежна“ и дека наводно би можела да биде објавена во вечерашното обраќање на претседателот за состојбата на нацијата, закажано за 21 часот по источно време.

„На членовите на Конгресот вчера им беше кажано дека војната е неизбежна и дека ќе биде објавена вечерва во 9 часот. Кој знае дали тоа навистина ќе се случи. Не знам и не сакам да претерувам со информации кои и самиот ги имам во ограничена мера. Но, еден член на Конгресот ми го кажа ова утрово“, изјави Карлсон.

Во меѓувреме, САД се подготвуваат за обраќањето на претседателот Трамп до нацијата, кое привлекува големо внимание поради шпекулациите за можни крупни надворешнополитички најави.

Свет

Москва најавува тужби против европски банки поради замрзнатите средства

Централната банка на Русија најави дека ќе покрене судски постапки против европски банки во руски арбитражен суд, барајќи надомест за, како што наведува, нелегалното блокирање и обидите за користење на нејзините замрзнати средства.

Во соопштението на регулаторот се истакнува дека Банката на Русија ќе бара обештетување за целосниот износ на замрзнатите средства, како и за изгубениот приход што произлегол од нивното блокирање. Овој чекор, според институцијата, е дел од пошироката стратегија за заштита на нејзините финансиски интереси.

Најголемиот дел од руските средства што се под санкции се наоѓаат на сметките на белгискиот депозитар Euroclear. Според финансиските извештаи, вкупната вредност на средствата на Euroclear Bank на крајот на септември изнесувала 227 милијарди евра, од кои 193 милијарди евра се поврзани со санкционирани руски средства.

Руската централна банка веќе поднела тужба против Euroclear во московскиот арбитражен суд, обвинувајќи ја институцијата за „нелегални дејствија“ и оспорувајќи ги плановите на Европската Унија за користење на замрзнатите руски средства. Во тужбата се бара исплата од 18,1 билиони рубљи, односно околу 192,2 милијарди евра.

Според дипломатски извори во Брисел, околу 18 милијарди евра од замрзнатите средства се чуваат на сметки во неколку француски приватни банки. Дополнителни износи се депонирани и во германски банки, како и на сметки во Шведска, Кипар и Луксембург.

Весникот Фајненшл тајмс, повикувајќи се на неименувани извори, објави дека околу седум милијарди евра од руските средства се наоѓаат и во приватни банки во Белгија.

Свет

КЛУЧЕН СОСТАНОК ЗА СУДБИНАТА НА УКРАИНА

Челниците на Европската унија се среќаваат денеска во Брисел на еден од најнапнатите самити во последните години, со цел да се договори клучна одлука за финансирање на Украина за 2026. и 2027. година.

Клучни информации:

Премиерот на Белгија: „Не сакаме сами да го носиме ризикот, бараме неограничени гаранции.“
Премиерот на Полска, Туск: „Става е едноставна: или пари денес, или крв утре.“
Главното прашање: Како да се обезбедат најмалку 90 милијарди евра за финансирање на Украина во следните 2 години, по повлекувањето на САД од делот од помошта.
На маса е таканаречениот репарационен заем, кој би се темелел на замрзнатата имотна сопственост на Руската централна банка и би овозможил на Украина беспроцентен заем преку Европската комисија.
Белгија засега предводи отпор на планот поради правниот ризик поврзан со Euroclear, каде се наоѓа поголемиот дел од руската имотна сопственост.
Унгарија тврди дека планот со руска имотна сопственост е повлечен, додека високи функционери на ЕУ наведуваат дека тој сè уште е актуелен.
Европската комисија и дел од земјите-членки предупредуваат дека самитот мора да заврши со договор, бидејќи неуспехот на планот би ја оставил Украина без клучни средства и Белгија без заштита од правни ризици.