Црна Хроника

Тетовец измамен за 250 евра со лажни ветувања за „туѓа нега“

Во Секторот за внатрешни работи Тетово 66-годишен жител на тетовско село пријавил дека бил измамен од лице со иницијали С.Н., кое му ветило дека ќе му обезбеди социјална помош во форма на „туѓа нега“.

Според пријавата, измамата се случила во јуни годинава, кога осомничениот му рекол на оштетениот дека неговата сопруга наводно работи во Центарот за социјални работи во Тетово и е член на комисија за доделување на ваква помош. Со тоа го довел во заблуда и му побарал 250 евра за да му „заврши работа“, ветувајќи дека парите ќе бидат надоместени кога ќе се одобри помошта.

Откако ги добил парите, лицето престанало да се јавува и не ја исполнило ветената услуга. Случајот бил пријавен на 31 октомври, по што полицијата започнала со мерки за целосно расчистување и документирање на измамата.

Од СВР Тетово апелираат граѓаните да не наседнуваат на вакви ветувања и секогаш да пријавуваат сомнителни понуди за посредување во државни институции.

Црна Хроника

4News: Приведен поранешниот државен правобранител – истрага за сериозни коруптивни сомнежи

Поранешниот Државен правобранител на Македонија, Фехми Стафа, вечерва е приведен во рамки на полициска акција, поради сомневања за тешко коруптивно кривично дело. Апсењето на поранешниот висок функционер, кој беше задолжен за заштита на државниот имот, предизвика силни реакции во јавноста.

Засега нема официјално соопштение од институциите, но според првични информации, постојат сериозни индиции за вмешаност во коруптивни активности.

Според неофицијални и непотврдени сознанија од истрагата, Стафа е лишен од слобода под сомнение за примање поткуп. Извори блиски до истражните органи наведуваат дека станува збор за сума од неколку десетици илјади евра, која наводно била побарана или примена со цел извршување или неизвршување службено дејствие.

Во овој момент не се соопштени детали за начинот и околностите под кои е извршено апсењето, ниту дали предметот опфаќа и други осомничени лица. Се очекува Министерството за внатрешни работи и надлежното Јавно обвинителство во текот на ноќта или утрешниот ден да информираат за случајот и за правната квалификација на делото.

Стафа на функцијата државен правобранител беше именуван како предлог на Алтернатива, а во јавноста беше поврзуван и со ДУИ. Во изминатиот период против него биле поднесувани и повеќе пријави до Финансиската полиција.

Државниот правобранител е институција задолжена за застапување и заштита на имотните и правните интереси на Република Македонија пред судовите и органите на државната управа.

Извор: 4news.mk

Црна Хроника

Осум повредени во сообраќајка на патот Гостивар–Тетово

Денеска (13.12.2025) во 20:05 часот на патот Гостивар-Тетово после клучка ,,Камењане”, настанала сообраќајна незгода помеѓу патничко возило ,,Мерцедес” со австриски регистарски ознаки и патничко возило ,,БМВ” со тетовски регистарски ознаки. Во незгодата со повреди се здобиле осум лица кои со возила на итна медицинска помош се пренесени во Клинички центар Тетово. Поради вршење на увид, сообраќајот се одвива по една коловозна лента.