Скопје

ВО ВТОР КРУГ ЌЕ СЕ ИЗБИРААТ ГРАДОНАЧАЛНИЦИ ВО СКОПЈЕ, АЕРОДРОМ, КАРПОШ, ЦЕНТАР И ШУТО ОРИЗАРИ

Во четири од десет скопски општини и во Градот Скопје граѓаните утре повторно ќе излегуваат на гласање за да изберат градоначалници во вториот круг од Локалните избори 2025.

Во втор круг ќе се гласа во општините Аеродром, Карпош, Центар, Шуто Оризари и во самиот Град Скопје.

Во трката за градоначалник на Град Скопје се кандидатот на ВМРО-ДПМНЕ и Коалицијата, Орце Ѓорѓиевски, кој во првиот круг освои 91.663 гласа или 39,41 проценти, и кандидатот на ПП Левица, Амар Мециновиќ, со освоени 30.665 гласа или 13,18 проценти. Во првиот круг во главниот град гласале 232.581 граѓанин, што претставува излезност од 49,04 проценти.

Во Општина Аеродром, во вториот круг се натпреваруваат актуелниот градоначалник и кандидат на ВМРО-ДПМНЕ и Коалицијата, Дејан Митески, кој освои 16.257 гласа (49,11%), и кандидатот на СДСМ и Коалицијата, Александар Трајановски, со 6.881 глас (20,78%). Право на глас имаат 68.772 избирачи.

Во Карпош во втор круг влегуваат Сотир Лукровски од ВМРО-ДПМНЕ и Коалицијата со освоени 10.284 гласа (34,51%) и актуелниот градоначалник Стевчо Јакимовски од ГРОМ и Коалицијата „Искуство за успех“ со 8.761 глас (29,40%).

Во Центар, градоначалничката трка продолжува меѓу актуелниот градоначалник и кандидат на СДСМ и Коалицијата, Горан Герасимовски, кој освои 8.535 гласа (38,19%), и Мирослав Лабудовиќ од Движењето ЗНАМ со 5.707 гласа (25,54%).

Во Шуто Оризари во втор круг ќе се соочат актуелниот градоначалник Курто Дудуш од Унија на Роми, кој доби 3.223 гласа (36,43%), и кандидатот на ВМРО-ДПМНЕ и Коалицијата, Ерџан Демир, со 1.841 глас (20,81%).

Во останатите шест скопски општини градоначалниците беа избрани уште во првиот круг. Втор мандат освоија актуелните градоначалници на Бутел, Гази Баба и Ѓорче Петров.

Во Бутел победи Дарко Костовски од ВМРО-ДПМНЕ и Коалицијата со 52,96% од гласовите, во Гази Баба Бобан Стефковски со 58,42%, а во Ѓорче Петров Александар Стојкоски со 56,07%.

Во Кисела Вода за градоначалничка е избрана Бети Стаменкоска-Трајкоска од ВМРО-ДПМНЕ со 57,20%, во Сарај Мухамет Елмази од Коалицијата Вреди со 50,28%, а во Чаир Изет Меџити од Коалицијата Вреди со 51,78% од гласовите.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.