Скопје

Ѓорѓиевски: „Градскиот воз станува реалност – Скопје добива современ и еколошки транспорт“

Градскиот воз, еден од најзначајните инфраструктурни проекти за главниот град, е во завршна фаза и ќе биде целосно функционален за шест месеци. Градоначалникот на Скопје, Орце Ѓорѓиевски, заедно со премиерот Христијан Мицкоски, министерот за транспорт и врски Александар Николоски и директорот на Македонски железници Синиша Ивановски, денес извршија увид во текот на градежните работи.

Според Ѓорѓиевски, воведувањето на градскиот воз ќе претставува современа, брза и еколошка алтернатива за движење низ метрополата. Жителите од Драчево ќе можат да стигнат до центарот на градот за само 11 минути, додека патувањето од Зелениково ќе трае околу 25 минути.

„Ова значи побрз превоз, намалено сообраќајно оптоварување и почист воздух. Овој проект е инвестиција во здравјето и квалитетот на живот на граѓаните“, истакна градоначалникот.

Град Скопје активно учествува во реализацијата на проектот преку координација на градскиот автобуски систем со железничките линии. Најавено е усогласување на возниот ред, со што ќе се обезбеди непречено и брзо поврзување на различни делови од градот.

Ова е прва фаза од проектот. Во наредниот период се предвидува проширување на линиите кон Ѓорче Петров и Миладиновци.

Ѓорѓиевски упати благодарност до сите институции вклучени во процесот, со посебен акцент на премиерот Мицкоски.

„Ова е пример како се работи одговорно, посветено и во интерес на народот. Доаѓа време кое нема само да го чекаме – туку ќе го живееме“, додаде тој.

Скопје

Неплатените даночни обврски во Скопје надминаа 36 милиони евра, локалната власт апелира до граѓаните за редовно плаќање

Град Скопје алармира дека вкупните неплатени обврски кон градот по основ на данок на имот, данок на промет, данок на наследство и подарок, како и комунална такса-фирмарина, за периодот од 2020 до 2025 година, надминале 36 милиони евра. Овие податоци се евидентирани од страна на Секторот за даноци на имот и комунални такси при Градот.

Од градската администрација потенцираат дека приходите од даноците на имот и комуналните такси претставуваат значаен извор на средства неопходни за непречено функционирање на Скопје. Со овие средства се финансираат: основните градски услуги, инфраструктурни проекти, трошоците на јавните претпријатија и јавните установи, работата на средните училишта.

Град Скопје упатува јавен повик до сите даночни и таксени обврзници – правни и физички лица – кои сѐ уште не ги подмириле своите обврски за данок на имот, промет, наследство и подарок, како и комунална такса-фирмарина, тоа да го сторат во најкраток можен рок.

Граѓаните и компаниите имаат можност електронски да ги проверат и платат своите долгови преку официјалната платформа: https://danoci.skopje.gov.mk/gskopje/root/public/login.xhtml

За сите прашања и информации, Градот ги објави следниве контакт податоци, организирани по категории:

Данок на имот: 072/204-434, 02/3207-546, e-mail: anitan@skopje.gov.mk ; nuredin.nuredin@skopje.gov.mk

Данок на промет, наследство и подарок: 02/3297-298, 02/3297-296, e-mail: biljanna.manakoska@skopje.gov.mk

Комунална такса-фирмарина: 02/3297-314, e-mail: angelina.gievska@skopje.gov.mk

Даночно сметководство: 02/3297-298, 02/3297-296, e-mail: katerina.donev@skopje.gov.mk

Даночниот долг може да се подмири и на Даночните шалтери на Град Скопје, кои работат секој работен ден од 8 до 19 часот, како и во сабота на 13 декември.

Скопје

Сообраќајна драма во Карпош – Го удрил со ретровизор па го претепал

Во скопската општина Карпош, денес се случи насилен инцидент во сообраќајот — маж бил удрен со ретровизор од страна на друг возач, по што следувал физички напад, објави локалниот портал.

Според пријавите, сè започнало со расправија на улица, по што насилниот возач прво го удрил со ретровизор на возилото, а потоа ја продолжил агресијата и физички нападнал лице кое било во колона пешаци/возачи.

Засега, нема официјална информација дали е поднесена кривична пријава, но случајот е пријавен кај надлежните служби и полицијата врши проверки.

Градските власти и полицијата апелираат до граѓаните да ја зголемат вниманието — да се воздржуваат од насилство и да реагираат цивилизиранo во конфликтни ситуации, особено во сообраќај.

Скопје

Скопската железничка станица се враќа во живот по две децении

Еден од приоритетите на новата влада е вложувањето во инфраструктурата, вклучително и железничкиот сообраќај, како товарен така и патнички. Покрај набавката на нови локомотиви и вагони, значајна инвестиција е обновата на железничката станица во Скопје, која ќе ја врати својата функција од пред 15-20 години, кога објектот се руинираше и стана нефункционален.

Почна чистењето и средувањето на станицата, информираше директорот на Железница Инфраструктура, Синиша Ивановски. „Со цел враќање на автентичниот изглед на станицата, започнавме со отстранување на сите билборди, светлосни реклами и други информативни панели кои години наназад го нарушуваа изгледот на објектот“, напиша Ивановски на својата Фејсбук страница и им се заблагодари на компаниите кои се согласиле да ги тргнат билбордите.

Проектот ќе се реализира во фази и ќе заврши со генерално чистење на надворешниот изглед на станицата и поставување соодветна илуминација.