Балкан

Софија подготвува преземање на рафинеријата во Бургас: Лукоил без право на одлучување

Бугарската влада предложи измени на законската рамка со кои ќе може да ја преземе контролата врз рафинеријата во Бургас, управувана од рускиот нафтен гигант „Лукоил“, со цел да се заштити енергетскиот систем од евентуални последици од американските санкции, пренесуваат локални медиуми, повикувајќи се на Ројтерс.

Рафинеријата во Бургас е единствениот капацитет за преработка на нафта во Бугарија и долго време беше стратегиски дел од меѓународното портфолио на „Лукоил“. Санкциите на САД и Велика Британија врз руските нафтени компании, поради војната во Украина, ја ставија рафинеријата под директен ризик.

Според нацрт-измените, ќе биде назначен специјален администратор кој ќе ја преземе оперативната контрола врз рафинеријата и ќе го води процесот на продажба. Во тој процес, „Лукоил“ нема да има право на глас, ниту можност да поднесе жалба.

„Ова е логичен чекор. Денес ќе поднесеме предлог-закон за назначување специјален администратор“, изјави поранешниот премиер и лидер на ГЕРБ, Бојко Борисов, чија партија е дел од владејачката коалиција.

Според експертите, мерката има за цел да спречи можни прекини во снабдувањето со нафта и да го заштити Бугарскиот енергетски систем.

„Привремено преземање на оперативната контрола овозможува енергетска стабилност и намалување на ризикот од директни или секундарни санкции“, објасни Мартин Владимиров од Центарот за проучување на демократијата во Софија.

„Лукоил“ веќе е под притисок да ја продаде рафинеријата. Според информации на РИА, компанијата ја проценила на околу две милијарди долари. Бугарија уште во 2023 година воведе законска можност за назначување државен администратор во критични енергетски објекти.

Процесот на продажба ќе биде спроведен по донесувањето на законските измени, за што се очекува парламентарна расправа во наредните недели.

Балкан

Турскиот парламент во хаос: Пратеници се туркаат и тепаат за време на расправата за буџет

Дискусијата за предлог-буџетот за 2026 година во Големото национално собрание на Турција вчера прерасна во физички судир меѓу пратениците. По вербални напади и остри обвинувања, дебатата ескалираше до туркање и удирање меѓу парламентарците.

Инцидентот избувна откако пратеникот на владејачката Партија на правдата и развојот (АКП), Мустафа Варанк, изнесе провокативни изјави насочени кон лидерот на опозициската Републиканска народна партија (CHP), Озгур Озел. Варанк го нападна Озел поради фотографии направени на гробот на поранешниот пратеник Камер Генч, што предизвика бурна реакција од заменик-претседателот на пратеничката група на CHP, Гокхан Гунајдин.

„АКП намерно предизвикува контроверзии за време на расправата за буџетот“, рече Гунајдин, додека расправата прерасна во жестоки обвинувања поврзани со наследството на Мустафа Кемал Ататурк. По дополнителни провокации, напнатоста кулминираше со десетминутна физичка пресметка во пленарната сала, додека обезбедувањето и други пратеници се обидуваа да ги раздвојат учесниците.

И покрај инцидентот, пратениците продолжија со работата и го усвоија и предлог-законот за буџетот за 2026 година со 320 гласа „за“ и 249 „против“, како и завршната сметка за 2024 година со 316 гласа „за“ и 247 „против“.

Претседателот Реџеп Таип Ердоган го поздрави усвојувањето на буџетот за 2026 година, истакнувајќи: „Сакам предлог-законот за буџетот на централната држава за 2026 година, кој вечерва беше усвоен во Големото национално собрание на Турција, да биде од корист за нашата земја, нашиот народ и нашата економија“.

Brawl erupts in Turkish parliament on last day of budget talks

Балкан

Евзони под блокада: Граница затворена за сите возила

Од 18:40 часот Граничниот премин Евзони е целосно затворен за сите видови возила кои сакаат да влезат во Грција, соопшти АМСМ. Исклучок се прави само за камиони што веќе се наоѓаат во меѓуграничниот простор.

Причината за блокадата се протестите на грчките земјоделци, кои веќе неколку недели организираат масовни блокади на повеќе патни правци во земјата. Земјоделците изразуваат незадоволство и со овој радикален потег го изразуваат својот револт кон владејачките политики.

Иако на влезот кон Грција сообраќајот е стопиран, камерите на преминот Богородица покажуваат дека на излез од Македонија нема чекање – возилата слободно поминуваат кон границата.

Сообраќајот во овој момент е во потполна застојна состојба, а граѓаните и превозниците се соочуваат со неизвесност околу продолжувањето на преминот.

Балкан

Косово доби моќно оружје

Косово го примило германскиот противтенковски систем „Панцерфауст 3“ како дел од билатералната безбедносна соработка, објавија косовските медиуми. Испораката има за цел зајакнување на одбранбените капацитети на Косовските безбедносни сили (КБС) и нивна постепена модернизација во согласност со стандардите на евроатлантските партнери.

Косовските власти потенцираат дека системот ќе се користи исклучиво за одбранбени цели и професионална обука. „Панцерфауст 3“ е еден од најнапредните противтенковски системи што ги користат неколку европски армии. Договорот со Германија се оценува како дополнителен доказ за поддршката на Берлин за стабилноста и безбедноста во регионот.