Спорт

Министерот Борко Ристовски ги пречека македонските боксери по успешниот настап на ЕП (У23) во Ереван

Министерот за спорт, Борко Ристовски, оствари средба со младите боксери Ален и Адриан Рустемовски и Јоаким Јовановски, тренерот Јове Петровски и со претседателот на Националната боксерска федерација, Кристијан Андреевски, по успешниот настап на македонските претставници и двата освоени медали на Европското првенство во бокс (У23) што се одржа во Ереван, Ерменија.

Ален Рустемовски го освои сребрениот медал во категоријата до 57 килограми, покажувајќи извонредна техника, борбеност и спортски дух. Во финалето, тој го загуби мечот од рускиот боксер Лурли Аветијан.

Неговиот брат, Адриан Рустемовски, се закити со бронзен медал во категоријата до 60 килограми, откако во полуфиналето беше поразен од Хамзат Матиев, исто така од Русија.

Министерот Ристовски им го честита големиот успех и изрази гордост што овие млади спортисти достоинствено ја претставуваа Македонија на едно од најзначајните континентални натпреварувања.

-Нашите млади боксери покажаа дека македонските спортски таленти можат рамноправно да се борат со најдобрите во Европа. Тие се голема надеж и иднина на македонскиот бокс. Министерството за спорт ќе продолжи да ги поддржува младите спортисти кои достоинствено ја преставуваат Македонија на спортските борилишта – изјави министерот Ристовски.

Министерството за спорт им упатува искрени честитки на сите членови на репрезентацијата за постигнатиот успех и за афирмацијата на македонскиот спорт на европската сцена.

Спорт

Македонија, доколку се пласира на СП, ќе игра со Мексико, Јужна Африка и Јужна Кореја

Доколку Македонија обезбеди пласман на Светското првенство 2026 година, нашата репрезентација ќе биде дел од групата А, заедно со селекциите на Мексико, Јужна Африка и Јужна Кореја.

Пред тоа, националниот тим се соочува со тежок предизвик – полуфинале од баражот против Данска. Во случај на победа, нашата репрезентација ќе игра со победникот од дуелот Република Ирска – Чешка во финалето на плеј-офот.

Спорт

Меси размислува за пауза од Светското првенство 2026

Аргентинската фудбалска легенда Лионел Меси најави дека постои можност да го пропушти Светското првенство кое ќе се одржи следното лето, нагласувајќи дека можеби ќе го следи турнирот од трибините, наместо да настапува на теренот.

„Се надевам дека ќе можам да бидам таму. Веќе реков дека би сакал да учествувам. Но, во најлош случај, ќе бидам присутен и ќе го гледам во живо, што сепак ќе биде посебно“, изјави Меси, цитиран од ESPN.

Осумкратниот добитник на „Златната топка“ ќе наполни 39 години во јуни и додава дека сѐ уште има желба за натпреварување, но возраста и физичката подготвеност можат да влијаат на неговото учество на престојниот турнир.

Спорт

МАКЕДОНИЈА СЛАВИ ПРОТИВ ТУРЦИЈА НА ОТВОРАЊЕТО НА ТУРНИРОТ ВО АНКАРА

Женската ракометна репрезентација на Македонија стартуваше успешно на турнирот во Анкара, совладувајќи ја домашната селекција на Турција со 29:26. Натпреварот беше израмнет најголемиот дел од времето, со 12:12 на полувреме, но избраничките на селекторот Кристијан Грчевски го презедоа контролата во финишот и стигнаа до важен триумф.

Емилијана Ризоска блескаше со 11 постигнати гола, додека голманката Драгана Петковска се истакна со 10 интервенции, меѓу кои и одбрана на седмерец, што значително го насочи натпреварот во корист на Македонија.

Нашите ракометарки утре од 12 часот ќе играат против Словенија, а турнирот ќе го затворат в недела со дуел против Словачка, кој започнува во 10 часот.