Скопје

Ѓорѓиевски: Создавањето зелени работни места мора да биде национален приоритет

Градоначалникот на Скопје, Орге Ѓорѓиевски, денес учествуваше на конференција посветена на креирањето на зелени работни места во Македонија, организирана од австриската амбасада во Скопје. Настанот се одржа на покана на амбасадорот Мартин Памер, а на него присуствуваа и заменик-министерот за економија Марјан Ристески, заменик-шефот на делегацијата на ЕУ Бен Нупнау и аташето за социјална грижа во австриската амбасада Харолд Бреза.

Ѓорѓиевски, кој ова го означи како своето прво обраќање на конференција откако ја презеде функцијата градоначалник, изрази задоволство што токму темата за зелените работни места е во фокусот на овој меѓународен собир. Тој нагласи дека Скопје и останатите општини, во координација со Владата, мора сериозно да се зафатат со прашањето за управување со отпадот.

„Убеден сум дека Скопје, но и останатите општини во соработка со владата, ќе почнеме да се справуваме со отпадот на многу подобар и поцелисходен начин. Скопската депонија ‘Дрисла’ е во исклучително лоша состојба и силно ќе се залагаме таа да се трансформира по примерот на современите европски центри за третман на отпад,“ истакна Ѓорѓиевски.

Тој додаде дека клучен чекор е воведувањето на систем за селектирање на отпадот и негово поефикасно искористување како суровина, потенцирајќи дека искуствата од Австрија и другите европски земји може значително да помогнат во подобрување на македонските практики.

Градоначалникот посочи и неколку позитивни примери на локално ниво – поставување специјални контејнери за одделно собирање на стакло, пластика и хартија, машините за рециклирање пластични шишиња во училиштата и можноста за плаќање паркинг со собирање шишиња, како и иницијативата во Кисела Вода за поставување канти за селекција на отпад во колективните згради.

„Создавањето зелени работни места и одржливо управување со отпадот не се само еколошка, туку и економска шанса за Македонија,“ порача Ѓорѓиевски, заблагодарувајќи се на австриската амбасада за поддршката и можноста за размена на искуства.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.