Македонија

Ревизија открила сериозни злоупотреби во Прилепската болница: Јавно обвинителство отвори истрага

Државниот завод за ревизија ја заврши ревизијата на финансиските извештаи и усогласеноста на работењето на Јавната здравствена установа Општа болница со проширена дејност Прилеп за 2024 година, при што беа изразени неповолни мислења за точноста и објективноста на финансиските извештаи, како и за усогласеноста на финансиските трансакции со законската регулатива.

Ревизијата откри сериозни неправилности во работењето на болницата. Дел од обврските биле евидентирани и платени ненавремено, селективно и без контроли, а кон поединечни добавувачи биле извршени авансни плаќања без приложени фактури во износ од над 8 милиони денари. Набавки на стоки и услуги во износ од 15,7 милиони денари биле спроведени без постапка за јавна набавка, а во некои постапки била утврдена несоодветна примена на Законот за јавни набавки.

Особено проблематична е набавката на медицинска опрема во износ од 26,9 милиони денари, дел од која, иако не е неопходна, не е ставена во употреба. Исто така, ревизијата утврди неправилности во благајничкото работење: не се издадени фискални сметки за здравствени услуги во износ од 4,4 милиони денари, а 5,5 милиони денари примени во готовина не биле уплатени на сметката на болницата, туку директно исплатени преку благајната, спротивно на Законот за платежни услуги и платни системи.

Готовинските средства биле користени за исплати на физички лица без договори за дело, за гориво без доказ за користење возила, како и за репрезентација и други расходи без поткрепувачка документација. Благајничкиот максимум од 60 илјади денари не бил почитуван, при што во одделни периоди во благајната имало и до 2,3 милиони денари наплатена партиципација.

До крајот на 2024 година, болницата имала побарувања во износ од 20,4 милиони денари, постари од три години, без активности за нивна наплата. Ревизијата покажала и неправилности во ангажманот на 131 лице по договор на дело, со исплати од 41,9 милиони денари, при што дел од договорите не ги содржеле конкретните износи на надоместокот.

Дополнително, болницата не ја испочитувала обврската да се регистрира како даночен обврзник по основ на ДДВ, при што од 6,74 милиони денари фактурирани за закуп на просторот, не се платени 1,21 милиони денари ДДВ. Сметководствената и материјалната евиденција не биле усогласени, а не бил спроведен целосен попис на средствата, обврските и побарувањата.

За утврдените неправилности и сомнеж за незаконско користење на средства, Државниот завод за ревизија издал препораки за нивно отстранување, а на 22 октомври 2025 година, Основното јавно обвинителство – Прилеп отвори истрага против 32 физички и правни лица за злоупотреби во јавните набавки и управувањето со јавни средства во Општата болница „Борка Талески“.

Извор: vecer.mk

Македонија

Ахмети: Јас ја уништив Југославија

Лидерот на ДУИ, Али Ахмети, денеска на брифинг со новинарите испрати жестоки пораки до политичките опоненти, но и до „незадоволните“ во своите редови. Тој најави нови, ригорозни услови за влез во идна влада, вклучувајќи промена на начинот на избор на Влада и Уставни судии, а истовремено упати отворена закана доколку биде приморан да го активира „Планот Б“.

„Не сум претставник на мачки, туку на лавови“

Можеби најсината порака од брифингот беше неговото предупредување за тоа што би се случило доколку политичката ситуација не се развива според „Планот А“ (развој и напредок).

„Ако излезам на улица, никогаш нема да се вратам дома. Јас не сум претставник на мачки, туку на лавови“, дециден беше Ахмети.

Во свој стил, тој се осврна на своето минато, тврдејќи дека никој во Македонија не го познава национализмот подобро од него.

„Нема никој во Македонија кој знае подобро од мене како да прави национализам. Јас ја уништив Југославија и 20 години го спроведував проектот 1981 – 2001“, рече лидерот на интегративците.

Нови услови: Бадентер во Уставен и двојно мнозинство за Влада

Ахмети постави нови „црвени линии“ за идните коалицирања. Тој бара нов „Национален договор за развој“, но со конкретни системски измени:

Избор на Влада: Да се воведе принцип на „двојно мнозинство“ (Бадентер) при изборот на владин кабинет.
Уставен суд: Бадентеровиот принцип да се применува и при одлучувањето во Уставниот суд.

Според него, ова ќе биде услов за учество во какво било идно управување со државата. Тој додаде дека Охридскиот договор е компромисен и не е совршен, оставајќи простор за негова надградба.

„Кој сака нека си оди“

Во однос на внатрепартиските турбуленции по 5-тиот Конгрес, Ахмети покажа ноншалантност. Тврди дека незадоволството е сведено на „две-три лица“ кои останале без функции.

„Оние кои си одат затоа што немаат функции, нека си одат“, порача Ахмети, додавајќи дека Абдил Селам Селами веќе се извинил и останува лојален на партијата.

За Села, Тачи и бизнисмените

Ахмети ги коментираше и односите во „Европскиот фронт“:

За Мендух Тачи: Има договор и тоа не му штети на Фронтот.
За Зијадин Села: Ахмети смета дека Села се обидува да изгради сопствениот идентитет бидејќи се чувствува во сенка на ДУИ, но не верува во шпекулациите дека Села ќе го поддржи Невзат Бејта за градоначалник на Гостивар.

Лидерот на ДУИ упати критики и кон стопанските комори, обвинувајќи ги дека „создаваат поделби и ги поддржуваат олигарсите“.

За напролет, ДУИ најави нов, тематски конгрес, на кој ќе се дефинира новата идеолошка матрица на партијата по консултациите со базата.

Извор: 4news.mk

Македонија

Магливо утро, дожд најавен навечер

Времето денеска ќе биде променливо облачно. Во претпладневните часови по одделни котлини ќе има појава на магла. Попладне, а особено кон крајот на денот и во текот на ноќта, се очекуваат повремени локални врнежи од дожд, додека на планинските предели дождот ќе преминува во снег. Ќе дува слаб до умерен ветер од југоисточен правец.

Во Скопје времето ќе биде променливо облачно и тивко, со појава на магла. Кон крајот на денот и во текот на ноќта се очекуваат повремени врнежи од дожд.

Македонија

Владата донесе одлука за прогласување на кризна состојба на целата територија на Македонија

Владата на денешната редовна 138 владина седница, на предлог на Управувачкиот комитет за координација и управување со системот за управување со кризи донесе одлука за постоење на кризна состојба во снабдувањето со електричната енергија на целата територија на државата во рок од 7 дена од денот на влегување во сила на оваа одлука.

Како што информиравме во текот на претходните денови, оваа одлука произлегува поради неможноста за набавка на мазут кој е неопходен во делот на производството.

Задолжителните резерви на нафтен дериват ќе се отстапат без надоместок, а АД ЕСМ за трошењето на нафтениот дериват мазут има обврска да доставува извештај со Владата и до Министерство за финансии.