Свет

Изненадување во Киев

Претседателот на Украина, Володимир Зеленски, му соопштил на секретарот на американската армија, Ден Дрискол, дека е подготвен да соработува со администрацијата на претседателот Доналд Трамп на новиот мировен план, објави „Аксиос“, повикувајќи се на американски и украински претставници.

Иако планот бара значајни отстапки од Украина – вклучително и отстапување дел од контролирана територија на Русија – Зеленски не го одбил и се согласил на почетни преговори. Неговата канцеларија соопшти дека во наредните денови очекуваат разговор со претседателот Трамп.

Дрискол на средбата во Киев му предал копија од планот на украинскиот претседател. Од Кабинетот на Зеленски наведуваат дека тој ги истакнал „основните принципи важни за украинскиот народ“, а двете страни се согласиле да работат на одредбите на планот за да се постигне праведен крај на војната.

Еден американски функционер изјавил дека Зеленски и Дрискол се договориле за „агресивен рок за потпишување“. Делегацијата на Дрискол првично била испратена за разговори за воена технологија и стратегија, но Белата куќа побарала да помогне и во отворање преговори во име на американскиот претставник Стив Виткоф и државниот секретар Марко Рубио.

Мировниот план, подготвен од Виткоф и други американски функционери во координација со Русија, предизвика силни реакции во Киев и европските главни градови, особено поради одредбите кои се оценуваат како поволни за Москва, меѓу нив и ограничувања на украинската армија по завршувањето на војната.

Украина досега секогаш ги отфрлала ваквите предлози, предупредувајќи дека Русија може да ги користи за подготвување идна агресија. Европските партнери, пак, не биле консултирани при изработката на планот.

САД во изминатите денови се обидуваат да ги уверат Украина и европските сојузници дека документот е „жив“ и подложен на промени. Во утрински телефонски разговор, Виткоф му рекол на германскиот министер за надворешни работи Јохан Вадефул дека станува збор за „рамка на идеи“ која може да се прилагодува.

Преговорите доаѓаат во чувствителен момент за Зеленски, кој се соочува со најсилниот политички притисок на домашен терен од почетокот на инвазијата. Корупциски скандали во врвот на власта ја поттикнаа опозицијата да бара стабилизација на институциите или формирање влада на национално единство.

Зеленски вечерва ќе се сретне со пратениците од својата партија, само неколку часа по разговорот со Дрискол. Дел од американските функционери сметаат дека домашниот притисок може да го направи подготвен за болни компромиси, додека други аналитичари предупредуваат дека политичката неизвесност го ограничува неговиот маневарски простор за отстапки кон Москва.

Свет

Американски разузнавачи: Путин сака целосна контрола над Украина и пошироки територии во Европа

Американските разузнавачки служби предупредија дека рускиот претседател Владимир Путин има намера да ја окупира целата Украина и да ја прошири контролата над делови од Европа што некогаш припаѓале на Советскиот Сојуз, и покрај тековните мировни преговори.

Украинската разузнавачка служба, предводена од генерал-потполковникот Кирило Буданов, исто така оцени дека Русија продолжува да има амбиции за проширување на територијата.

Според шест извори запознаени со податоците на американската разузнавачка служба, воените цели на Путин остануваат непроменети, што е спротивно на изјавите на американскиот претседател Доналд Трамп и неговите преговарачи дека Путин бара крај на конфликтот. Европските лидери, како и американските експерти, веруваат дека Путин има намера да контролира целата Украина и територии од поранешниот Советски Сојуз, вклучително и некои членки на НАТО.

„Разузнавањето отсекогаш велеше дека Путин сака повеќе“, изјави Мајк Кугли, демократски член на Комитетот за разузнавање на Претставничкиот дом. „Европјаните се убедени во тоа. Полјаците се апсолутно убедени, а балтичките земји мислат дека се првите кои го знаеле тоа.“

Во моментов, Русија контролира околу 20% од украинската територија, вклучувајќи ги анектираните покраини Луганск, Донецк, Запорожје, Херсон и Крим. Трамп, како дел од предложениот мировен договор, врши притисок врз Киев да повлече дел од своите сили од мал дел од Донецк, што Зеленски и мнозинството Украинци категорично го отфрлаат.

Иако Белата куќа најавува „огромен напредок“ во мировните преговори, Путин на својата годишна прес-конференција не понуди компромиси и нагласи дека неговите услови мора да бидат исполнети. Според официјални податоци, руските сили напредувале за околу 6.000 квадратни километри оваа година.

Американски официјални лица, меѓу кои и државниот секретар Марко Рубио, признаваат дека е неизвесно дали Путин навистина сака мировен договор или неговата цел е целосна контрола над Украина.

Свет

Зеленски: Ситуацијата на фронтот станува сè потешка

Претседателот на Украина, Володимир Зеленски, изјави дека состојбата на фронтот е сериозна и дека бројот на руски сили се зголемува, што ја отежнува ситуацијата за украинските единици.

„Има се повеќе Руси, станува сè потешко. Пристигнав во Купјанск и ситуацијата беше навистина тешка. Линијата на фронтот беше многу блиску, но нашите вооружени сили го контролираат Купјанск“, изјави Зеленски за Полското радио. Купјанск е стратешка цел за руската армија.

Тој потенцираше дека руските трупи „вршат притисок“ и можат да уништат села или да продрат во одредени области. „Ќе направиме сè за да ги спасиме животите на нашите војници, бидејќи пред сè мора да ја зачуваме нашата вооружена сила. Ова не значи дека сме подготвени да се предадеме“, додаде Зеленски.

Претседателот посочи и проблеми со достапноста на одредени видови ракети, особено противвоздушни, поради различни причини, вклучително и доцнења во испораките. Тој истакна дека Украина се соочува и со тешкотии во снабдувањето со енергетски ресурси и системи за воздушна одбрана, но нагласи дека „ова не е обвинување против нашите партнери“.

Зеленски претходно, на 12 септември, ја посети линијата на фронтот во Купјанск, каде што им се заблагодари на украинските единици за нивната посветеност и резултати.

Свет

Руте: Русија е подготвена на големи жртви

Генералниот секретар на НАТО, Марк Руте, предупреди дека Русија претставува долгорочна безбедносна закана за Европа и дека е од клучно значење Украина да остане воено силна за да се спречи поширока дестабилизација на континентот.

Во интервју за белгискиот весник „Де Морген“, Руте истакна дека Москва е подготвена да поднесе огромни човечки загуби за минимални територијални добивки. Според него, Русија годинава зазела помалку од еден процент дополнителна територија во Украина, додека губела околу 25.000 војници месечно.

Тој посочи дека Русија издвојува приближно 40 проценти од државниот буџет за одбрана, што изнесува околу 200 милијарди долари годишно, што ѝ овозможува да стекне повеќе оружје од европските земји во рамките на своите економски можности. Руте предупреди и за сè поагресивното однесување на Русија на источниот дел од НАТО, вклучувајќи хибридни напади и развој на хиперсонични ракети.

Според безбедносните служби, постои ризик од напад врз една од членките на Алијансата во периодот меѓу 2027 и 2031 година.

Руте ги отфрли тврдењата дека САД ја суспендирале помошта за Киев, нагласувајќи дека испораките на оружје и разузнавачките информации продолжуваат со полн интензитет, со цел Европа да преземе поголем дел од финансискиот товар.

Тој потврди дека на негова иницијатива е постигнат договор европските земји и Канада да купуваат американско оружје и муниција за Украина. Руте оцени дека падот на Украина под руска контрола ќе бара значително поголеми трошоци за одбрана на долг рок и дека поддршката за Украина е најефикасниот начин да се спречи поширок конфликт.

Говорејќи за можен мировен процес, Руте посочи дека се водат интензивни разговори за силни безбедносни гаранции за Украина, дури и во случај на мировен договор без членство во НАТО, со цел да се спречи повторна руска агресија.

Тој додаде дека работи во координација со САД и европските сојузници за усогласување на ставовите за војната, оценувајќи дека зачувувањето на безбедноста на Украина е клучно за кредибилитетот на НАТО и долгорочната стабилност на Европа.