Балкан

ТИНЕЈЏЕРИ ГО ЗАПАЛИЛЕ ОБЛАКОДЕРОТ „ВЈЕСНИК“ ВО ЗАГРЕБ – ПОЛИЦИЈАТА ГИ БАРА ВИНОВНИЦИТЕ

Пожарот што ја зафати легендарната зграда „Вјесник“ во Загреб бил предизвикан од група тинејџери на возраст од 16 и 17 години, потврди полицијата. Малолетничка од групата самата се јавила и признала дека тие вечерта се качиле на врвот на напуштената зграда, но поради заклучена врата не можеле да продолжат понатаму. Во еден момент еден од младите запалил картон, што за кратко време предизвикало голем пожар, по што сите избегале.

Повеќето од тинејџерите живеат во близина на „Вјесник“. Полицијата отвори кривична истрага, а едно лице веќе е уапсено. Надлежните не објавуваат повеќе детали за да не се попречи истрагата.

Пожар што траел 17 часа – зградата можна за рушење

Пожарот избувнал на 17 ноември околу 23 часот на горните катови и брзо се проширил низ целата зграда. Над 100 пожарникари се бореле со огнот повеќе од 17 часа. Температурите достигнале и над 1.000°C внатре во објектот, што ја оштетило носивоста на зградата. Поради опасност од уривање, пожарникарите морале да се повлечат и да гаснат само однадвор.

Се сомнева дека брзото ширење на пожарот се должело и на нефункционални противпожарни системи и оштетени вентилациски шахти.

Комплицирана сопственост и милионски долгови

„Вјесник“ со години е оптоварен со судски спорови, залози и долгови вредни милиони евра. Имотот е поделен меѓу повеќе сопственици, вклучувајќи компании, медиумски куќи и институции како Хрватскиот олимписки комитет. Дел од залозите во последните години преминале под контрола на „Фортенова груп“.

Иако пожарот предизвика голема штета, правните експерти истакнуваат дека вредноста на имотот не исчезнува целосно – голем дел од вредноста е во земјиштето.

Што следува?

Сега се отвора прашањето дали „Вјесник“ ќе се обновува или ќе се руши. Пожарот уништи дел од опремата и просториите, меѓу кои и студиото на радио „Лаганини ФМ“. Владата, како најголем сопственик, најави мерки, но иднината на објектот останува неизвесна.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.