Република

Се чисти Градската река во Прилеп: Извадени над 300 кубни метри насип

Во рамките на акцијата за чистење на големото речно корито на Градската река во Прилеп, градежните активности продолжуваат на потегот покрај улицата „Кеј 1-ви Мај“ во населбите Чачорица и Бончејца. Досега се извадени повеќе од 300 кубни метри насип, а работите ќе продолжат сè до железничкиот мост на кејската улица. Следната фаза ќе опфати делницата кон мостот на улицата „Трајко Николоски“.

И покрај обилните врнежи во изминативе денови, состојбата со водостојот е стабилна и во моментот нема опасност од излевање на реката.

Градоначалникот Проданоски изрази благодарност до раководствата на јавните комунални претпријатија и до Подрачната единица на Водостопанство на Македонија – Прилепско Поле, кои активно придонесуваат за успешна реализација на акцијата со својата механизација.

Воедно, граѓаните се повикуваат да не фрлаат отпад во речното корито, бидејќи тоа предизвикува големи штети и можни хаварии. За таа намена се обезбедени соодветни локации каде отпадот може да се депонира безбедно.

Република

Во Битола свечено отворен почесен конзулат на Австрија

Со пригодна свеченост денеска во Битола беше отворен конзулатот на Австрија, а функцијата почесен конзул ќе ја врши битолчанецот Игор Божиновски.

Конзулатот на Австрија се наоѓа на улицата „Виенска“ во Битола.

На свеченоста која се одржа се обрати австрискиот амбасадор Мартин Памер, македонскиот министер за надворешни работи и надворешна трговија Тимчо Муцунски, конзулот Игор Божиновски и градоначалникот на Битола Тони Коњановски.

Градоначалникот Коњановски пред присутните ја истакна важноста на отворањето на уште еден конзулат во Битола, а со тоа и интензивирање на соработката со Австрија.

„Битола од денеска е побогата за уште еден конзулат, сега од пријателската држава Австрија, со што го враќаме епитетот Битола конзулски град“ истакна Коњановски пред присутните гости, дипломатскиот кор, пратеници и други гости.

Со ова Битола има седум почесни и два генерални конзулати.

Република

Битола го одбележа Денот на својот заштитник: Литургија и литија во чест на Св. Нектариј Битолски

Со света архиерејска литургија и свечена литија, денес во Битола беше одбележан Денот на Свети Нектариј Битолски, заштитник на градот. Верници од Битола се собраа во храмот „Свети Великомаченик Димитриј“, каде што се одржа Светата Божествена Литургија во чест на преподобниот Нектариј, кој се упокоил на 5 декември 1500 година.

На литургијата присуствуваа градоначалникот на Битола, Тони Коњановски, како и претседателот на Советот на Општина Битола, Бојан Бојкоски, заедно со бројни верници.

По завршувањето на богослужбата, голем број присутни верници пристапија кон Светата Причест. Потоа, согласно долгогодишната традиција, низ повеќе битолски улици се одржа свечена литија, во која учествуваа бројни граѓани.

По повод празникот, градоначалникот Тони Коњановски упати честитка до битолчани, посакувајќи Свети Нектариј Битолски постојано да биде нивен духовен заштитник и водилка.

„На сите сограѓани им го честитам Денот на Заштитникот на градот – Свети Нектариј Битолски. Неговата заштита нека биде постојано со нас. Секојдневието да го исполнуваме со љубов, меѓусебно почитување и добрина, вредности со кои ќе ја градиме иднината на Битола и на генерациите што доаѓаат“, порача градоначалникот Коњановски.

Република

УТРЕ БЕЗ СТРУЈА ДЕЛ ОД ТЕТОВО И СЕЛОТО ДОБРОШТЕ

Утре, 19 декември 2025 година, поради планирани работи на електродистрибутивната мрежа, без електрична енергија ќе останат дел од град Тетово и едно тетовско село.

Во периодот од 09:00 до 14:00 часот, прекин во снабдувањето со струја ќе имаат корисниците на улица 114 кај СИЗ во Тетово.

Во исто време, од 09:00 до 14:00 часот, без електрична енергија ќе биде и дел од селото Доброште, поточно објектите кои се наоѓаат во близина на старата џамија.

Од надлежните информираат дека прекинот е поради планирани интервенции со цел подобрување на сигурноста на електроснабдувањето.