Македонија

МАКЕДОНИЈА СТАНУВА АКТИВЕН ФАКТОР НА РЕГИОНАЛНИОТ ЕНЕРГЕТСКИ ПАЗАР

Министерката за енергетика, рударство и минерални суровини Сања Божиновска оцени дека енергетскиот сектор во државата влегува во најдинамичниот период на реформи досега. На „Форумот за слобода“, меѓународен политички настан организиран од Унијата на млади сили и партнерските младински организации, таа ги презентираше реализираните проекти и идните приоритети.

Божиновска потсети дека министерството стартувало од нула, со паралелна потреба да се воспостави институционален систем, да се стабилизира состојбата и да се дефинира јасна стратегија.

„Денес можам да кажам дека Македонија по долго време има јасна енергетска насока, конкретни проекти и регионални партнери кои нè гледаат како сериозен играч“, истакна министерката, додавајќи дека енергетиката е област каде нема место за импровизации.

Меѓу досегашните резултати ги издвојува гасниот интерконектор со Грција, договорената соработка со Србија за нов интерконектор, финализираното електроенергетско поврзување со Албанија и новиот темелен Закон за енергетика. Усвоени се и закони за обновливи извори, геологија и рударство, како и за енергетска ефикасност. Забрзани се постапките за приклучување на ветерни и соларни капацитети, а подготвен е и тригодишен план за енергетски ефикасно реновирање на јавни објекти, заедно со мастер-план за идните мрежни инвестиции.

Во панел-дискусијата Божиновска нагласи дека регионалната интеграција е предуслов за стабилен енергетски систем. „Самостојност без поврзаност повеќе не значи сигурност. Само земјите кои се дел од глобалниот мрежен систем можат да бидат стабилни“, рече таа.

Министерката оцени дека Македонија го менува пристапот и регионалната позиција. Интерконекторот со Грција, како што наведе, го отвора патот кон европските пазари и нови извори на гас, додека со Србија и Албанија веќе е воспоставена рамка за функционална соработка.

Говорејќи за транзицијата од јаглен, Божиновска повтори дека затворањето на термоенергетските капацитети мора да биде внимателно планирано. Таа рече дека земјата е посветена на зелена транзиција, но без ризични и брзи потези.

„Произведуваме над 40% електрична енергија од обновливи извори, но тоа важи кога има сонце, ветер или вода. Енергија ни треба и навечер и во услови на слаба хидрологија. Интерконекторите се нашето осигурување, а паралелно инвестираме во ефикасност и обновливи извори. Секој заштеден киловат е киловат што не мора да го произведеме“, порача министерката.

Таа заклучи дека во енергетскиот сектор нема простор за драматични скокови, туку само за стабилни, прецизни и пресметани чекори кои гарантираат сигурност за граѓаните и економијата.

Македонија

Стабилно време со магла до понеделник, дожд од вторник

До понеделник се очекува стабилно и претежно тивко време низ земјава, со појава на магла во утринските часови и зголемена облачност на некои места.

Утре, 18 декември, времето ќе биде променливо облачно со сончеви периоди, додека претпладне на одредени места ќе се појави магла. Ветарот ќе биде слаб и променлив.

Во Скопје се очекува слично време, со претежно тивко време и појава на магла во котлинските делови претпладне.

Стабилното време ќе се задржи до понеделник, а од вторник се најавуваат локални врнежи од дожд.

Македонија

Над 40 државни институции преминаа на електронско управување со документи

Повеќе од 40 институции во државата веќе го користат националниот Документ менаџмент систем (ДМС), што овозможува побрзи и поефикасни услуги за граѓаните, соопшти министерот за дигитална трансформација Стефан Андоновски во изјава за медиумите.

Според него, поврзувањето на институциите и општините преку единствен дигитален систем претставува суштинска реформа во функционирањето на државната администрација, со фокус на поедноставени и подостапни јавни услуги.

Андоновски информираше дека за само четири месеци е двојно зголемен бројот на институции кои користат електронска архива и електронски систем за управување со документи. Дополнително, преку државната платформа за интероперабилност, само во ноември биле реализирани 2,6 милиони трансакции, што претставува значителен раст во однос на просекот во текот на 2024 година.

Министерот посочи и дека за 20 проценти е зголемен бројот на институции и компании приклучени на платформата за интероперабилност, што директно придонесува за намалување на административните процедури и потребата граѓаните да доставуваат документи од една до друга институција.

„Овие резултати значат помалку хартија, помалку чекање и помалку простор за корупција. Дигиталната трансформација не ја третираме како ИТ-проект, туку како реформа во корист на граѓаните, со јасни и фер процедури“, истакна Андоновски.

Тој додаде дека целта е институциите да функционираат брзо, разбирливо и еднакво за сите, а Министерството за дигитална трансформација останува посветено принципот „граѓаните на прво место“ да стане стандард во работењето на државата преку конкретни и мерливи резултати.

Македонија

Собранието ги усвои клучните закони за проектот „Безбеден град“

Собранието во рамки на попладневниот дел на 76. седница без расправа ги донесе измените и дополнувањата на повеќе закони кои се дел од пакетот потребен за целосно функционирање на системот „Безбеден град“. Со 65 гласа „за“ и ниту еден „против“ или „воздржан“, пратениците усвоија измени на Законот за извршување на санкциите, Законот за полиција, Законот за возила и Законот за безбедност на сообраќајот на патиштата, сите по скратена постапка.

Пратеникот Бојан Стојановски од ВМРО-ДПМНЕ истакна дека законот е дел од шесте законски измени кои обезбедуваат имплементација на еден од најзначајните проекти во историјата на Македонија, кој започна пред неколку недели и практично ќе стартува од 1 февруари.

Законот за прекршоци, исто така дел од пакетот, воведува посебна постапка за прекршоци констатирани со технички средства и уреди за снимање, вклучително електронска достава преку текстуални пораки или е-пошта, 50% намалување на глобата при доброволно плаќање во рок од осум дена, како и автоматско суспендирање на возачката дозвола по акумулирање на три забрани во четири години. Пратеничката Моника Трајанова од ВМРО-ДПМНЕ објасни дека измените ќе го зголемат ефектот на превенцијата, ќе намалат административни трошоци и ќе ја зголемат ефикасноста на постапките.

Стојановски додаде дека законите овозможуваат одземање на возило на несовесни возачи, како и подобрување на процесот на издавање возачки дозволи, со зголемена транспарентност и контрола врз членовите на комисијата која ги доделува дозволите.

Во рамки на истата седница, пратениците го усвоија и Законот за концесии и јавно-приватно партнерство, исто така по скратена постапка, со што се овозможува поефикасно реализирање на инфраструктурни и други јавни проекти.