Балкан

Облакодерот „Вјесник“ под ризик – експертите препорачуваат итно рушење

Потпретседателот на хрватската влада и министер за просторно планирање, градежништво и државен имот, Бранко Бачиќ, заедно со претставници на Град Загреб и експерти од Хрватскиот центар за земјотресно инженерство, одржаа состанок во врска со облакодерот „Вјесник“, кој минатата недела беше зафатен од голем пожар.

Бачиќ потврди дека облакодерот ќе биде урнат поради сериозните статички оштетувања и ризикот од уривање. „Сите инспекции укажуваат дека конструкцијата е делумно нестабилна. Пожарот ја оштети арматурата и столбовите, а временските услови дополнително го влошуваат ризикот“, рече Марио Урош од Центарот за земјотресно инженерство.

Особено е загрозен источниот дел од облакодерот, каде што бетонот почнал да пука. „Колку повеќе време поминува, толку е поголем ризикот од уривање“, додаде Урош.

Бачиќ нагласи дека експертите ќе подготват проект за безбедно рушење и ќе разгледаат компании со искуство од хрватскиот и европскиот пазар. „Веднаш започнуваме активности за отстранување на зградата. Потребно е време за подготовка, но процесот ќе се спроведе колку што е можно побрзо“, истакна тој.

Тој додаде дека зградата е осигурана и дека трошоците за отстранување ќе се разгледаат во соработка со другите сопственици, додека државата ќе се погрижи за уредување на поранешните простории на „Вјесник“ на соодветен начин.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.