Скопје

Загриженост во Влае: расте бројот на заболени ученици од основното училиште „Димо Хаџи Димов“

Се зголемува бројот на ученици од основното училиште „Димо Хаџи Димов“ во скопската населба Влае кои последните два дена бараат лекарска помош. Синоќа на Клиниката за детски болести биле примени уште тројца ученици со дијареа, повраќање и висока температура, со што бројката значително порасна.

Директорот на училиштето Мемеди соопшти дека првичните сомнежи упатуваат на можност за труење, но од Институтот за јавно здравје нагласуваат дека конечните резултати ќе бидат познати по обработката на земените примероци, што се очекува утре.

Обемна истрага: храна, вода и работни површини под детални анализи

Поради сериозноста на ситуацијата, ИЈЗ спроведе вонреден инспекциски надзор. Земени се примероци од млеко, мусли, мусака со месо и кроасани, како и мостри од вода од различни локации во училиштето. Дополнително, направени се брисеви од кујната, приборот, училниците и работните пултови.

Директорката на ИЈЗ, д-р Марија Андонова, истакна дека седум од засегнатите ученици воопшто не јаделе во училиштето, што го отвора сомнежот кон други можни извори. Биле примени и телефонски пријави од наставници, но без официјална документација.

Испитани биле и трите лица вработени во кујната – со брисеви од раце, грло и нос – за да се утврди евентуален човечки фактор на контаминација. Првите физичко-хемиски анализи на водата не покажале неправилности, но микробиолошките резултати ќе бидат готови за 48 часа.

Можен вирус или паразит – институциите разгледуваат повеќе сценарија

Со цел да се прошири спектарот на испитувања, Институтот побара дополнителен материјал од Клиниката за детски болести. Според лекарите, не е исклучена можноста за вирусен или паразитарен извор, независно од храната.

Општина Карпош: смирен пристап и проширен надзор во девет училишта

Од училиштето информираат дека денеска нема нови случаи со потешки симптоми и дека наставата се одвивала во најголем дел нормално. Градоначалникот на Карпош, Сотир Лукровски, апелираше да не се шири паника, напоменувајќи дека и самиот бил со стомачни тегоби последните денови.

Поради инцидентот, во уште девет училишта во општината е активиран вонреден надзор со исти протоколи за анализа на храна, вода и работни површини.

Очекувања и следни чекори

„Сѐ што треба да се направи — се прави,“ изјави Андонова, најавувајќи дека по завршување на истрагата ќе се предложат нови стандарди за безбедност на храна и вода во училиштата и градинките. Предлозите ќе бидат ставени на јавна дискусија.

Истрагата продолжува во координација со АХВ, ДСЗИ и Центарот за јавно здравје. Засега останува нејасно дали се работи за труење со храна, заразен извор или друг агент. Родителите со нетрпение ги очекуваат резултатите, а јавноста бара брза и транспарентна информација.

Скопје

Секое застанување на булевар на „пет минути“ ќе се санкционира, вели Топаловски

Началникот на СВР Скопје, Сашо Топаловски, најави засилена контрола на паркирањето во главниот град. Во гостување во емисијата „Претрес“, тој појасни дека полициски возила опремени со камери, поврзани директно со системот „Безбеден град“, ќе патролираат по Скопје.

Секое застанување на булеварите каде што не е дозволено „паркирање на пет минути“ ќе биде санкционирано. „За несоодветно паркираните возила на паркиралиштата и булеварите… сите кои ќе помислат дека може да ја остават колата и да завршат некоја работа, создавајќи гужва на сообраќајницата, сега ќе бидат казнети. Колите ќе вртат по цел ден, на различни локации. Пораката до оние што планираат да бидат сообраќајни прекршители е дека тоа нема да биде исплатливо“, рече Топаловски.

СВР Скопје со оваа мерка најавува поголема дисциплина на булеварите и намалување на сообраќајниот метеж во градот.

Скопје

По „Димо Хаџи Димов“, ешерихија коли и по втор пат пронајдена во училишни намази

Агенцијата за храна и ветеринарство (АХВ) изрече парични казни против операторот со храна кој стопанисува со кујните во основните училишта во Општина Карпош, откако лабораториските анализи потврдија небезбедна храна во две училишта.

По неодамнешната вонредна инспекција, АХВ официјално ги доби резултатите од тестирањата на мострите храна и брисевите земени од кујната во ОУ „Димо Хаџи Димов“.

Лабораториските наоди потврдија дека послужената мусака не ги задоволува микробиолошките критериуми, при што е утврдено присуство на бактеријата Enterobacteriaceae.

Поради овој пропуст, операторот со храна е казнет со 600 евра, а одговорното лице со 300 евра во денарска противвредност.

По првичната инспекција и наредбата за генерално чистење и дезинфекција, кујната во „Димо Хаџи Димов“ останува затворена сѐ додека не се добијат нови лабораториски наоди од повторно земените брисеви, со кои треба да се потврди нејзината безбедност. Дополнително, сите вработени се упатени на вонредни здравствени санитарни прегледи.

Во рамки на превентивните вонредни контроли, АХВ изврши инспекција и во кујните на уште девет основни училишта во Карпош, со кои стопанисува истиот оператор.

При овие контроли, кај една мостра храна (намаз) е утврдено присуство на бактерија ешерихија коли, за што веднаш е наредено намазот да се исфрли од употреба. Иако два од тестираните брисеви беа позитивни, кај нив не е утврдено присуство на патогени бактерии.

За недоследностите утврдени при превентивните контроли во деветте училишта, операторот е казнет со уште две парични казни од по 900 евра (600 евра за операторот и 300 евра за одговорното лице).

Вкупна казна од 650 евра е изречена и за дополнителни пропусти, вклучувајќи:

Непоседување сертификат за завршен курс по хигиена за едно вработено лице.
Немање соодветни технички услови за работа (недостаток на топла вода) во две училишни кујни.

АХВ продолжува со засилени контроли за да обезбеди сигурност и здравствена безбедност на оброците на учениците.

Скопје

Меџити: Инклузијата на лицата со посебни потреби е заедничка одговорност

По повод 3 Декември, Меѓународниот ден на лицата со попреченост, градоначалникот на Општина Чаир, Изет Меџити, учествуваше на инаугурацијата на организацијата „INKLUDIVERSA“. Иницијативата има за цел создавање повеќе пристапни и поддржувачки простори за сите граѓани.

Меџити истакна дека заедницата има обврска да обезбеди инклузија и зајакнување на лицата со посебни потреби, со можности за еднаков развој на нивниот потенцијал.

– Општина Чаир секојдневно се залага за создавање на опкружување каде што децата и младите со посебни потреби ќе добиваат поддршка, грижа и реални можности за интеграција во сите сфери на животот – рече Меџити.