Црна Хроника

Телефон пронајден во ќелијата на Нехат Нухи – Обвинет за „Онкологија“

При рочиштето за случајот „Онкологија“, обвинителството соопшти дека при претрес во затворската ќелија на поранешниот економски директор на клиниката, Нехат Нухи, бил пронајден мобилен телефон. Двајцата обвинети во случајот – поранешните директори Виктор Васев и Нухи – остануваат во притвор.

Нухи во судницата тврдеше дека телефонот не му припаѓа и дека го нашол во ќелијата.

„Телефонот не е мој, го најдов таму. Го користев само за апликации, затоа што како човек имам потреба од контакт со семејството,“ изјави обвинетиот, додавајќи дека полицијата се однесувала недостојно за време на претресот.

Судењето продолжи со сведочење на вработена задолжена за финансиското и шалтерското работење на клиниката. Таа посочи дека Нухи ѝ ја одзел надлежноста за подготовка на налози кон добавувачите, а дека поранешниот директор Васев не побарал дополнителни средства од Фондот за здравствено осигурување, што резултирало со сериозни долгови.

Одбраната возврати дека сведокот има конфликт на интереси, бидејќи нејзиниот сопруг бил вработен во веледрогерија, како и дека била незадоволна од прераспоредување на работното место. Според адвокатот Боби Спирковски, нејзините искази биле „субјективни и мотивирани од лични емоции“.

Обвинението ги товари Васев и Нухи дека со незаконски набавки и присвојување лекови ја оштетиле државата за околу 36 милиони евра.

Црна Хроника

Исчезна 30-годишен скопјанец

На 15.12.2025 во 01:50 часот во Полициската станица Гази Баба, И.Т.(51) од с.Инџиково, скопско, пријави дека од домот се оддалечил неговиот син А.Т.(30).

Се преземаат мерки за пронаоѓање на лицето.

Црна Хроника

Примил мито од 50.000 евра за да влијае кај судија – МВР со детали

Полициски службеници по наредба на јавен обвинител од Основното јавно обвинителство за гонење на организиран криминал и корупција го лишија од слобода Ф.С. поради сторено кривично дело – Примање награда за противзаконито влијание.

Во периодот од октомври до 13.12.2025 година осомничениот примил вкупен износ од 50.000 евра за да посредува и да го искористи своето реално влијание за да интервенира кај судија во Апелациониот суд Скопје и за со поткуп кон судијата да влијае за да се изврши службено дејствие што не би смеело да се изврши.

Првично, осомничениот побарал 100.000 евра за да влијае за укинување на мерка притвор определена кон лице кое е недостапно на органите на прогонот и против кого ОЈОГОКК води друга постапка за кривични дела против јавните финансии, платниот промет и стопанството. На 06.10.2025 година примил дел од побараниот износ и тоа 30.000 евра, што му ги предала сестрата на лицето во бегство. На 13.12.2025 година директно побарал и примил уште 20.000 евра како дел од поткупот што го барал за да го даде на судијата.

Непосредно по примањето на паричните средства осомничениот е лишен од слобода и кај него се пронајдени парите.

Црна Хроника

Лажен полицаец измами старица за 23.300 евра, уапсен на граница

Полицијата од Опатија уапси 46-годишен хрватски државјанин кој измами 79-годишна жена за 23.300 евра. Измамникот се претставувал како полицаец и ја убедил старицата дека истражува хакерски напад врз нејзините банкарски сметки. Тој ја натера да ги подигне сите свои пари за наводна проверка на истрагата.

На 12 декември, жртвата му ги предала парите пред својата куќа, по што измамникот се обидел да ја напушти земјата. Благодарение на брза и координирана акција на полицијата, тој бил уапсен на граничниот премин во Брод-Посавина, а целата украдена сума веднаш била вратена на сопственичката.

Против осомничениот е поднесена кривична пријава, тој е предаден на надзорникот на притвор, а истрагата продолжува.