Република

Коњановски: Децата ни донесоа сонце и покрај облачниот ден

По повод 3-ти декември, Меѓународниот ден на лицата со попреченост, Лајонс клубот Кабадаја организираше хуманитарен хепенинг под мотото „Сонцето свети за сите или обоиме во пријател“.

Настанот, кој се одржа во Битола, беше можност децата преку цртежи и пораки да изразат својата креативност и да покажат дека секое дете треба да биде дел од секојдневието – во играта, во училиштето, во домот и во општеството. Оваа година хепенингот се одржа по 15-ти пат, во соработка со ресурсниот центар „Кочо Рацин“ Битола, училиштата од градот, општината и Центарот за социјални работи.

Претседателката на Лајонс клубот, Емилиа Ѓероска, истакна дека целта не е само да се одбележи денот, туку преку процесот на подготовка децата да станат свесни дека сите деца, без разлика на различностите, имаат исто место под едно сонце.

Градоначалникот на Битола, Тони Коњановски, кој присуствуваше на настанот, рече дека и покрај облачниот ден, децата го донеле сонцето. „Ќе има и други настани за да покажеме дека сите сме еднакви, знаеме да ги почитуваме различностите и инклузијата е дел од образовниот процес, домот и општеството. Локалната самоуправа заедно со институциите се грижи овие деца да бидат дел од системот и да не почувствуваат разлика“, истакна Коњановски.

Тој ги покани децата за новогодишните празници на платото пред Офицерскиот дом заедно со Дедо Мраз на празнична дружба.

Директорката на Основното училиште со ресурсен центар „Кочо Рацин“, Драгана Кирковска, истакна дека општеството е инклузивно и дека децата се прифаќаат како во редовните така и во ресурсните училишта, додавајќи дека овој ден е потсетник дека сите светиме под исто сонце и треба постојано да се поддржуваме.

Република

Планирани прекини на струја утре во Тетовскиот регион

Повеќе населени места во Полошкиот регион утре ќе останат без струја поради изведување планирани технички зафати на електро-системот.

Во Тетово, прекинот е најавен за 5 декември од 06:00 до 06:30 часот и ќе ги опфати делови од село Челопек, целите села Милетино и Блаце, како и индустриските објекти во Челопек.

Во Групчин, електричната енергија ќе биде исклучена на 5 декември во периодот од 09:00 до 14:30 часот, а прекинот ќе го зафати дел од селото.

Истовремено, жителите на Селце ќе останат без струја од 09:00 до 14:00 часот, при што прекинот ќе важи за делови од населеното место.

Од надлежните апелираат граѓаните навреме да се прилагодат на најавените технички активности.

Република

Тетовските цариници спречија обид за увоз на 2000 кг фалсификат прашок за перење штетен за здравјето и животната средина

Царински службеници од ЦИ Тетово спречија обид за криумчарење на 2000 килограми фалсификат прашок за перење алишта со трговска марка Ариел, кој бил натоварен во Турција и наменет за увозник од Скопје. Станува збор за 200 вреќи од по 10 кг, кои ги повредуваат правата од интелектуална сопственост.

Одделението за нетарифни мерки и заштита на правата од интелектуална сопственост при Царинската управа го извести правниот застапник на носителот на правото, кој потврди дека прашакот е фалсификат и се согласи за уништување на стоката.

Против сторителот по завршување на постапката ќе биде поднесена соодветна пријава.

Царинските службеници истакнуваат дека секојдневните заложби во сузбивање на нелегалната трговија и шверцот се клучни за заштита на здравјето на граѓаните, како и за спречување на загадување на животната средина предизвикано од неконтролиран хемиски состав.

Република

Битола го отвора најголемиот зимски фестивал во Македонија – Зимска Приказна 2025/2026

Од 20 до 31 декември, Битола повторно ќе се преобрази во светлечка зимска бајка со осум локации полни со празнична магија. Од Плоштадот Магнолија, преку Широк Сокак, Офицерски и Пациото на музејот, па сè до Старата чаршија и Пелистер, градот ќе се претвори во голема сцена на култура, музика и улична уметност.

На посетителите им се подготвуваат детско кино под отворено небо, живи концерти, DJ сетови, зимски базар и гастрономски изненадувања, како и светлечки инсталации што ја нагласуваат архитектурата на Битола. Секоја локација ќе нуди различна атмосфера, создавајќи празнична целина што ги опфаќа сите генерации – од децата што веруваат во чудо, до семејствата и младите кои го бараат ритамот на градот.

Организаторите потенцираат дека Зимска Приказна не е само фестивал, туку празнична приказна што ја живее целата заедница, а оваа година Битола ветува уште посветла и повесела атмосфера за сите свои посетители.

Добредојдовте во Зимска Приказна на прагот на 2026 година!