Црна Хроника

Татко и две ќерки во осумдневен притвор по хаосот со стадо од 500 крави во Трново

Тројца жители на селото Жидилово – татко и неговите две ќерки – добија мерка притвор од осум дена по акцијата на полицијата во кривапаланечкото село Трново. Случајот е поврзан со нивното стадо од над 500 крави и серијата инциденти кои, според обвинителството, со месеци создаваат немир кај локалното население.

Според информациите од МВР, приведувањето е извршено на 2 декември 2025 година, околу 16 часот, на локацијата „Самоков“. Лицата Г.Ѓ. (57) и неговите ќерки А.Ѓ. (30) и А.Ѓ. (22) биле лишени од слобода од полициски службеници од Крива Паланка.

Јавниот обвинител веднаш побара притвор за сите тројца, наведувајќи опасност од бегство и можност за повторување на делото како клучни причини за мерката.

Според обвинителството, семејството континуирано ги малтретирало жителите и соседите, и покрај бројните реакции и интервенции од надлежните институции. Во последниот инцидент, за кој се сомничат, тие спречиле службени лица – инспектори од Агенцијата за храна и ветеринарство и униформирани полициски службеници – да го спроведат решението за одземање на крупниот добиток.

Истражните органи продолжуваат да ги утврдуваат сите детали и околности поврзани со случајот.

Црна Хроника

ВИДЕО Сообраќајка на автопатот Куманово-Скопје

Вечерва на автопатот Куманово–Скопје кај Стајковци се случила тешка сообраќајна несреќа. Засега нема официјални информации дали има повредени или жртви, а според првичните фотографии од местото на настанот може да се забележи значителна материјална штета.

Според очевидци, во несреќата учествувало патничко возило „Мерцедес“, кое по силниот удар завршило со сериозно оштетен преден дел. Полицијата е на терен и врши увид, по што ќе бидат познати повеќе детали за причините што довеле до несреќата.

Видеото може да го погледнете на 4news.mk

Црна Хроника

Полицијата во Тетово со засилени сообраќајни контроли

На 04.12.2025 во периодот од 11:30 часот до 15:00 часот, полициски службеници од Полициската станица Тетово, Отсекот за криминалистичка полиција, Отсекот за превенција и Полициската станица за безбедност на патниот сообраќај Тетово спроведоа активности за подобрување на јавната безбедност на подрачјето на СВР Тетово, за контрола на возачи и возила кои вршат јавен превоз на ученици и пронаоѓање на предмети и недозволени средства кои потекнуваат или се наменети за вршење на кривични дела. Притоа, во 12:50 часот на улица „Илинденска“ е сопрено патничко возило „фолксваген транспортер“ со тетовски регистарски таблички, управувано од Д.С.(47) од с.Бродец тетовско, и констатирано е дека врши јавен превоз на патници без да поседува лиценца издадена од надлежен орган. Додека, во 13:10 часот на ул.„Илинденска“, при преглед кај А.С.(30) од с.Нераште, тетовско, биле пронајдени и одземени дрвен предмет и нож. По документирање на случаите, против нив ќе бидат поднесени соодветни поднесоци.

Црна Хроника

Полицијата го лоцираше украденото „Ауди“ за неколку часа – младиот тетовец уапсен!

На 05.12.2025 во 00:10 часот во с.Волковија, тетовско, полициски службеници од СВР Тетово го лишија од слобода Г.С.(25) од с.Волковија. Кај него е пронајдено патничкото возило „ауди“ со тетовски регистарски таблички, сопственост на И.Ј.(49) од с.Брвеница, тетовско, за кое претходно беше пријавено дека било одземено. Возилото ќе биде вратено на сопственикот, а Г.С. е задржан во полициска станица и по документирање на случајот ќе му биде изготвен соодветен поднесок.