Економија

The Banker повторно ја прогласува НЛБ Банка за ‘Банка на годината’, по дванаесетти пат наградувајќи ја нејзината визија и иновации

На престижната церемонија на финансискиот магазин „The Banker“ во Лондон, НЛБ Банка Скопје ја освои наградата „Банка на годината“ за 2025 година. Ова признание ја потврдува континуираната посветеност на банката кон извонредност, иновации и висококвалитетна услуга за клиентите.

Наградата „Банка на годината“ се смета за глобален стандард за достигнувања во банкарскиот сектор и се доделува на институции кои покажале исклучителни резултати, лидерство на пазарот и имплементација на стратешки иницијативи, технолошки иновации, програми за одржливост и ориентирани кон клиентите услуги.

НЛБ Банка Скопје се издвојува по силните финансиски резултати, фокусот на дигиталната трансформација, зелено финансирање и клиентски ориентирани решенија, освојувајќи ја оваа престижна награда по дванаесетти пат.

„Водени од очекувањата на клиентите за дигитални услуги, персонализација и одржливост, инвестиравме во напредни технологии и зелени иницијативи. Во изминатата година го унапредивме дигиталното банкарство и развивме решенија прилагодени на потребите на клиентите. Нашата цел е целосна дигитална трансформација, додека ја одржуваме довербата на клиентите и поттикнуваме иновации“, изјави Тони Стојановски, претседател на Управниот одбор на НЛБ Банка Скопје, нагласувајќи дека ова признание е уште една потврда за значајната улога на банката во финансискиот систем и економскиот развој на земјата.

Во текот на минатата година, НЛБ Банка значително инвестираше во дигитални решенија, обезбедувајќи безбедни и лесни за користење услуги за клиентите. Притоа, фокусот на технолошки напредок и одржлив раст ѝ овозможи на банката да понуди широк спектар иновативни производи и услуги, прилагодени на еволуирачките потреби на поединците и бизнисите. Засилената деловна активност и внимателното управување со ризици резултираа со зголемена нето добивка, како и раст на кредити и депозити, додека банката продолжува да вложува во општествено одговорни проекти и иницијативи.

Економија

Димитриеска – Кочоска: 97 милиони евра за клучни енергетски проекти

Денеска беа потпишани договори за државна гаранција и заеми во вкупна вредност од 97 милиони евра, со кои ќе се реализираат стратешки енергетски проекти што значително ќе ја променат енергетската слика на државата.

Министерството за финансии, преку издавање државна гаранција, овозможи финансирање од 87 милиони евра за проектот „Фотонапонска електроцентрала Битола 3“. Од оваа сума, 50 милиони евра се обезбедени од КфВ, а 37 милиони евра од Европската банка за обнова и развој. Дополнително, обезбедени се и 10 милиони евра за ревитализација на хидроелектраните.

Министерката за финансии Гордана Димитриеска – Кочоска изрази благодарност до меѓународните финансиски институции за континуираната поддршка, како и до тимот на АД ЕСМ за нивната посветеност во реализацијата на проектите.

Според неа, овие капитални инвестиции ќе придонесат за зајакнување на домашното производство на електрична енергија, ќе обезбедат посигурно и постабилно снабдување и ќе дадат силен поттик за економска стабилност и одржлив развој на државата.

Економија

Божиновска: Нема енергетска криза, државата има резерви од мазут!

Граѓаните нема да почувствуваат никакви прекини во снабдувањето со топлинска енергија, иако ЕСМ побара прогласување кризна состојба. Министерката за енергетика, Сања Божиновска, денеска на брифинг со новинарите порача дека државата има доволно резерви на мазут за да ги покрие потребите.

Барањето за кризна состојба ќе се разгледува на утрешната владина седница, но Божиновска нагласи дека тоа е технички чекор за да се активираат државните резерви. Причина за ова е триесетдневната неможност за редовна набавка на мазут од Грција поради тамошните протести.

„Нема да има никаква криза. Постои мазут во државата – ако не го земат од Грција, ЕСМ ќе го земе од државните резерви. За граѓаните ова нема да значи апсолутно ништо“, истакна министерката.

Економија

Нови цени на горивата од полноќ

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 1,18% во однос на одлуката од 19.12.2025 година.

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,00 ден/лит.

Малопродажната цена на ЕУРОДИЗЕЛ (Д-Е V) не се менува.

Малопродажната цена на Екстра лесното масло за домаќинство на (ЕЛ-1) се намалува за 2,00 ден/лит.

Малопродажната цена на Мазутот М-1 НС се намалува за 0,028 ден/кг и сега ќе изнесува 32,607 ден/кг.

Од 23.12.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 70,00 (денари/литар)

Моторен бензин ЕУРОСУПЕР БС – 98 72,00 (денари/литар)

Дизел гориво ЕУРОДИЗЕЛ БС (Д-Е V) 64,50 (денари/литар)

Масло за горење Екстра лесно 1 (ЕЛ-1) 63,50 (денари/литар)

Мазут М-1 НС 32,607 (денари/килограм)