Рускиот министер за надворешни работи Сергеј Лавров денес испрати силна порака до европските лидери, нагласувајќи дека Москва „нема намера да ја нападне Европа“, но дека ќе биде подготвена да реагира доколку дојде до ескалација.

Лавров изјави дека Русија е подготвена дури и правно да го документира отсуството на агресивни намери кон Европската Унија и истакна дека Москва со години предлага дијалог за паневропска безбедност. Според него, Русија останува подготвена за разговори „ако партнерите од Европа се подготвени сериозно да седнат на маса“.

„Ние немаме агресивни планови против ниту една членка на НАТО или ЕУ. Подготвени сме да дадеме писмени гаранции во правна форма“, изјави Лавров, пренесува Газета.ру, додавајќи дека таквите гаранции мора да бидат взаемно договорени.

Тој упати критика кон европските влади, кои, како што рече, се однесуваат „отворено милитаристички“, и предупреди дека „доколку Европа избере борба, Русија е подготвена уште сега“.

Изјавите на Лавров доаѓаат по неодамнешните реакции на Кремљ за можните европски воени ангажмани во Украина и за иницијативите за конфискација на руските средства. На 27 ноември, претседателот Владимир Путин во Бишкек изјави дека загриженоста на европските лидери околу „руска инвазија“ е неоснована, повторувајќи дека Москва не планира напад врз ЕУ.

Рускиот претседател Владимир Путин заедно со началникот на Генералштабот Валериј Герасимов денеска објавија дека руските сили го зазеле источниот украински град Северск, пренесе ДПА. Според Путин, ова отвора можност за „успешни напади во други правци“ во регионот Донбас.

Украинските власти засега официјално не ги коментираа информациите.

Руската армија наведе дека следна цел ќе биде Славјанск, град кој пред почетокот на војната во 2022 година имал над 100.000 жители. Путин ја пофали „динамиката“ на фронтот и ги поздрави војниците, оценувајќи дека „стратешката иницијатива е целосно во рацете на руската војска“.

Тој повтори дека заземањето на регионите Доњецк, Луганск, Херсон и Запорожје „напредува“, без да се осврне на тековните мировни разговори или планот на американскиот претседател Доналд Трамп. Иако претходно ги нарече предлозите на Трамп „основа за разговори“, Путин истакна дека Русија може да ги постигне своите цели на бојното поле доколку Киев ги одбие условите на Москва.

Рускиот лидер повтори дека Москва бара Украина да го предаде целиот Донбас во замена за прекин на огнот – услов што Киев категорично го отфрла.

Москва во септември 2022 година соопшти дека го анектира Донбас и го внесе во рускиот устав, иако сè уште нема целосна контрола врз регионот.

Литванија го усвои државниот буџет за 2026 година, кој донесува рекордно зголемување на средствата за одбрана, мотивирано од продолжениот воен конфликт во Украина и растечките безбедносни закани во регионот.

Според планираните проекции, одбранбениот буџет следната година ќе достигне 5,38 проценти од БДП – највисоко ниво од закрепнувањето на независноста од Советскиот Сојуз. Во апсолутни бројки, тоа значи дека државата ќе издвојува 4,79 милијарди евра, што е зголемување од 43 проценти во однос на 2025 година, соопшти Министерството за одбрана.

Со оваа финансиска рамка, Литванија влегува во групата земји од НАТО кои најмногу вложуваат во одбраната во однос на својот национален доход. Најголем дел од средствата ќе бидат наменети за модернизација на вооружените сили, набавка на нови напредни системи, јакнење на воздушната одбрана и проширување на воената инфраструктура.

Клучен приоритет останува распоредувањето на германската Оклопна бригада 45, која треба да биде трајно стационирана во Литванија до 2027 година, како дел од засиленото присуство на НАТО на источниот фронт. Германија во моментов активно ја формира и опремува единицата.

Литванија, која се граничи со руската ексклава Калининград и со Белорусија, долго време укажува дека руско-украинскиот конфликт претставува директна закана за нејзината национална безбедност. Како последица, државата ги засилува одбранбените капацитети и ја јакне борбената подготвеност согласно новите безбедносни околности во регионот.