Балкан

Блокадите низ Грција продолжуваат, земјоделците ја одбија поканата за средба со Мицотакис и бараат конкретни мерки

Протестите и блокадите на патиштата во Грција продолжуваат, откако земјоделците одлучија да не ја прифатат поканата на премиерот Кирјакос Мицотакис за средба. И покрај повиците за дијалог од страна на владата, земјоделските здруженија оценуваат дека понудените разговори не носат конкретни решенија за нивните барања.

Земјоделците и понатаму ги држат блокирани клучните сообраќајници, автопати и гранични премини, инсистирајќи на итни мерки за намалување на трошоците за производство, поволни даночни услови и поддршка за справување со зголемените цени на горивата и енергенсите. Тие нагласуваат дека без јасни и обврзувачки гаранции, средбите со владините претставници би биле само формалност.

Од друга страна, грчката влада порачува дека е отворена за дијалог и дека веќе се разгледуваат одредени олеснувања, но предупредува дека долготрајните блокади нанесуваат штета на економијата и ја нарушуваат секојдневната мобилност на граѓаните.

Синдикалните организации на земјоделците најавуваат дека протестите ќе продолжат и во наредните денови, доколку не добијат конкретни предлози што ќе одговорат на нивните барања. Во меѓувреме, состојбата на патиштата низ земјата останува променлива, со периодични затворања и засилени полициски контроли.

Протестите на земјоделците во Грција траат веќе неколку недели и се дел од поширок бран незадоволство поради економските притисоци врз земјоделскиот сектор, кој се соочува со сериозни предизвици во услови на инфлација и раст на трошоците.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.