Црна Хроника

Синот на Роб Рајнер обвинет за тешко двојно убиство: За убиство на своите родители му се заканува смртна казна

Холивудскиот сон на легендарниот режисер Роб Рајнер и неговата сопруга Мишел заврши на најтрагичен можен начин – во локва крв, во нивниот сопствен дом во Брентвуд. Окружниот обвинител на Лос Анџелес, Натан Џ. Хокман, денеска ја смрзна јавноста со потврдата: доколку биде прогласен за виновен, 32-годишниот Ник Рајнер може да се соочи со смртна казна или доживотен затвор без право на помилување.

Морничавата сцена ја открила ќерката на славниот пар, Роми Рајнер, која во неделата попладне ги пронашла безживотните тела на своите родители. Нејзиниот повик до полицијата во 15:40 часот не бил само повик за помош, туку и директно обвинување: таа веднаш посочила дека нејзиниот брат Ник е „екстремно опасен“ и дека тој е единствениот кој би можел да го стори ова злосторство.

Истрагата открива дека Ник Рајнер се обидел да ги сокрие трагите на своето злодело. Само неколку часа пред да бидат откриени телата, тој се пријавил во хотелот „Пирсајд Санта Моника“. Сцената што ја затекнал хотелскиот персонал следното утро била како од хорор филм: туш кабина преплавена со крв и крвави дамки на постелнината, што укажува на очајнички обид на убиецот да се измие од гревот пред да биде фатен.

Ник Рајнер во моментов се наоѓа во Централниот затвор во Лос Анџелес, каде што е сместен во посебна единица под постојан надзор поради ризик од самоубиство. Неговото прво појавување пред судија денеска беше одложено, бидејќи обвинетиот не бил во соодветна медицинска и ментална состојба да се соочи со правдата.

Додека Окружниот обвинител Хокман и началникот на полицијата Џим Мекдонел се подготвуваат за вонредна прес-конференција, јавноста останува згрозена од ладнокрвноста на злосторството. Човекот кој наводно ги избодел своите родители до смрт додека тие спиеле, сега го чека конечниот суд – кој за него може да биде фатален.

Црна Хроника

Уапсени лихвари – Полицијата со детали

Кривична пријава против двајца кавадарчани за сторено кривично дело “лихварство”

ОВР Неготино, до Основното јавно обвинителство Кавадарци, поднесе кривична пријава против Н.С.(59) и Р.С.(34), двајцата од Кавадарци, поради постоење основи на сомнение дека сториле кривично дело „лихварство“ по член 260 од Кривичниот законик. Според пријавнеото, тие во периодот од јуни 2023 до ноември 2025 година на лице од Неготино му давале пари на заем со писмени и усни договори, а за себе договарале несразмерна имотна корист во вкупна вредност од 167.000 денари. за што оштетениот доставил и докази. Со наредба од Основен суд Кавадарци извршен е претрес во нивниот дом и помошни простории, при што се пронајдени и одземени мобилни телефони, а од Н.С. се одземени тефтери со забелешки, по што двајцата се лишени од слобода.

Црна Хроника

Кривична пријава за поранешен градоначалник – МВР со детали

Кривична пријава за „несовесно работење во службата“ и „злоупотреба на службената положба и овластување“ против поранешниот градоначалник на Струмица и двајца вработени во општината

СВР Струмица, до Основното јавно обвинителство Струмица, поднесе кривична пријава против К.К.(35) и Б.Ш.(64), двајцата од Струмица, поради постоење основи на сомнение дека сториле кривично дело „несовесно работење во службата“ и против И.Г.(54) од Струмица поради постоење основи на сомнение дека сторила кривично дело „злоупотреба на службената положба и овластување“.
Пријавената И.Г., во својство на раководител на Одделението за администратирање на приходи при општина Струмица, постапувајќи спротивно на одредбите од Законот за даноците на имот, во четири наврати ги пречекорила своите овластувања со тоа што изготвила решенија за даночно ослободување од данокот на промет на недвижен имот при продажба на станови од станбена куќа со наменска класификација А1. Ваквото ослободување од плаќање било направено повикувајќи се на член 25 од Законот за даноците на имот, меѓутоа одредбите за таквото даночно ослободување се однесувале само за станбени згради и станови кои согласно класата на намени се со номенклатура А2.1, но не и за станбени куќи со номенклатура А1.1, за кои и биле изготвени решенијата. Исто така, И.Г. во три од четирите решенија, во отсуство на пријавениот Б.Ш., се потпишала и во полето Потврдил-контролирал.
Пријавениот Б.Ш., во својство на Раководител на Секторот за финансиски прашања при општина Струмица и пријавениот К.К., во својство на градоначалник на општина Струмица, постапиле несовесно при вршењето на своите службени овластувања и пропуштиле должен надзор при постапувањето по тие предмети и ги потпишале изготвените решенија за даночно ослободување изготвени од И.Г.. Со ваквите дејствија пријавените лица го оштетиле буџетот на општина Струмица за износ од 668.388 денари.

Црна Хроника

77-годишна жена жртва на измама – изгубила 8.000 евра!

Лишен од слобода измамник од охридско, измамил жена од струшко за сума од 8.000 евра

На 17.12.2025 во 11.40 часот во Струга, полициски службеници од Надворешната канцеларија за криминалистички работи Струга го лишија од слобода Н.С.(40) од с.Горно Лакочереј, охридско.
Тој се сомничи дека на 11.12.2025 измамил 77-годишна жена од струшко село за сума од 8.000 евра. Според пријавеното, на 11.12.2025 тој телефонски ја побарал жената, лажно се претставил и ѝ рекол дека нејзината ќерка прегазила дете на пешачки премин и дека ќе треба да плати за да ја пуштат, односно да ја ослободат од наводно обвинение. Откако се договориле жената му ги дала парите и тој заминал.
По преземени мерки и активности во соработка со Одделот за криминалистичка полиција-Сектор за општ и насилен криминал, тој е пронајден и лишен од слобода, а по целосно документирање на случајот, против него е поднесена кривична пријава поради постоење основи на сомнение за сторено кривично дело “измама”.