Република

ВЛЕН: Волјата на граѓаните ќе се потврди на изборите во Гостивар и Врапчиште

Коалицијата ВЛЕН најави силен настап на претстојните локални избори што ќе се одржат на 11 јануари, со јасна стратегија и поддршка за кандидати кои, како што велат од коалицијата, ја претставуваат волјата на граѓаните.

Во Општина Гостивар, ВЛЕН ќе настапи со реден број 1 на гласачкото ливче, предводена од кандидатот за градоначалник Невзат Бејта. Во Врапчиште, пак, коалицијата ја поддржува независната кандидатура на Зулхајрат Демири, кој се наоѓа под реден број 5.

Од ВЛЕН посочуваат дека симболиката на броевите 1 и 5 е во духот на слоганот „Еден глас“, кој ја отсликува нивната политика заснована на одлуки што произлегуваат директно од граѓаните.

Коалицијата потсетува дека веќе остварила победа во 10 општини, што, според нив, претставува јасен сигнал дека албанските гласачи ја отфрлиле, како што ја нарекуваат, политичката манипулација позната како „референдум“. ВЛЕН оценува дека ова е доказ за промената што ја бараат граѓаните и за слабеењето на политичките структури кои, според нив, денес формално опстојуваат само во Гостивар и Врапчиште.

„11 јануари е датум кога оваа волја повторно ќе се потврди“, порачуваат од коалицијата, повикувајќи ги граѓаните на Гостивар и Врапчиште да се обединат и да гласаат – број 1 во Гостивар и број 5 во Врапчиште – за, како што наведуваат, победа и власт што работи во интерес на народот.

Република

Повеќе делови од Тетово утре ќе бидат без струја

Поради планирани прекини во електроснабдувањето, утре (24 декември 2025 година) повеќе делови од Тетово и околината ќе останат без електрична енергија.

Во Тетово, без струја ќе бидат објекти во населбата Поток во период од 09:00 до 14:00 часот. Дополнително, од 09:00 до 14:30 часот електрична енергија нема да имаат делови од градот, и тоа објекти на улицата Благоја Тоска во близина на Блок 82, како и објекти на улицата Киро Ристовски – Дрнц.

Планирани прекини ќе има и во околните населени места. Во селото Сараќино, делот кај црквата ќе биде без струја од 09:00 до 14:30 часот, додека во истиот временски период без електрична енергија ќе биде и дел од селото Озормиште.

Република

Учениците на „Кочо Рацин“ ја разубавија битолската „Зимска приказна“ со новогодишна приредба

Учениците од Основното училиште со ресурсен центар „Кочо Рацин“ ја збогатија битолската празнична магија со својата традиционална новогодишна приредба, дел од овогодинешната манифестација „Зимска приказна“.

На сцената во Центарот за култура, малите уметници ги оживеаја „Новогодишните желби на Анабел“ – приказна за мало теле што стана ирвас и момче кое повторно го најде својот глас, емотивна порака за добрината, надежта и љубовта.

Преку театарската игра и уметничките настапи, учениците посочија дека празниците се време не само за желби, туку и за дарување. „Да бидеме поддршка, да бидеме насмевка, да бидеме ѕвездена светлина. Нека оваа празнична приказна потсетува на вистинските вредности и ни дава верба во чудеса“, порачаа младите актери.

На настанот присуствуваше и градоначалникот на Битола, Тони Коњановски, кој заедно со директорката Драгана Кирковска доби благодарница, новогодишна честитка и украс изработени од учениците, како знак на признание за нивниот труд и посветеност.

Република

Во понеделник седница на Советот на Битола: буџет за 2026, ФК „Пелистер“ и поддршка за здруженија

За в понеделник, 29 декември, закажана е 4-та седница на Советот на Општина Битола, на која советниците ќе расправаат по вкупно 87 точки на дневниот ред.

Како прва точка е предвидено донесување заклучоци против дезинформациите поврзани со наводни мигрантски кампови. На дневен ред ќе се најде и Одлука за давање согласност и овластување за потпишување прелиминарен преддоговор за стратешко и инвестициско партнерство на ФК „Пелистер“ АД Битола.

Советот ќе одлучува и за давање на користење без надоместок простории во сопственост на Општина Битола, за период од 10 години, на Центарот за поддршка на лица со интелектуална попреченост „Порака“ Битола, КУД „Илинден“ Битола, Асоцијацијата за фолклор „Плетенка“ Битола и Здружението Ансамбл за фолклор „Гоце Делчев“ Битола.

Дополнително, ќе се разгледуваат и одлуки за користење без надоместок простории за период од три години за Центарот за развој на Ромската заедница „Баирска светлина“ Битола, како и за период од две години за Здружението на пензионери на Битола.

На последната седница на Советот во оваа календарска година, пред советниците ќе се најде и Буџетот на Општина Битола за 2026 година.

Од денеска започнаа и комисиските расправи, кои, како и седниците на Советот, можат да се следат во живо преку официјалниот Јутјуб канал на Општина Битола.