Република

Родителите на жртвите од дискотеката „Пулс“ бараат новиот јавен обвинител да ја преиспита истрагата

Кочани – Родителите на загинатите во трагичниот пожар во дискотеката „Пулс“ вчера, на одржаниот „Марш за ангелите“, упатија барање до новоименуваниот јавен обвинител да ја преиспита истрагата и обвинението за случајот, оценувајќи дека досегашната постапка не ги дала очекуваните резултати.

Тие изразија незадоволство од начинот на кој била водена истрагата од страна на обвинителството, посочувајќи дека не се утврдени сите одговорности за трагедијата во која животот го загубија десетици млади луѓе, а голем број беа повредени.

На маршот беше побарано истрагата да се прошири и да се опфатат сите лица кои, директно или индиректно, можат да сносат одговорност за настанот, како и да се даде јасно образложение за одлуките што досега биле донесени во предметот.

Родителите порачаа дека нивната борба е насочена кон вистината и правдата и дека ќе продолжат со јавни собири сè додека не се обезбеди целосно и транспарентно расветлување на случајот.
Маршот помина мирно, со пораки за одговорност и правда, а учесниците уште еднаш нагласија дека нема да се откажат од барањето за темелна и независна истрага за трагедијата што ја потресе целата јавност.

Република

Шестоседот на Попова Шапка од денес повторно во функција

Жичницата шестосед на Ски центарот Попова Шапка од 26 декември, ќе биде отворена за прошетки и скијачки активности, соопштија од центарот. Сепак, за целосно уживање на ски-патеките се очекуваат свежи снежни врнежи кои ќе го овозможат официјалното отворање на зимската сезона.

„Со подобрување на условите, планираме официјално отворање на зимската сезона и со нетрпение очекуваме да ве пречекаме за сезона исполнета со спорт, забава и незаборавни искуства“, велат од Ски центарот Попова Шапка.

Климатските услови засега остануваат стабилни, но скијачката заедница со нетрпение ја очекува првата сериозна снежна покривка.

Република

Тоневски: Ново кошаркарско игралиште за учениците во Злетово

Заврши асфалтирањето на кошаркарското игралиште во подрачното основно училиште „Кирил и Методиј“ во Злетово. Со овој зафат е создадена основата за целосно уредување на спортскиот простор кој ќе биде наменет за учениците и младите од населбата.

По стабилизирање на временските услови, предвидено е поставување мултифункционална спортска подлога, нови кошеви, клупи за одмор, како и уредување на пристапни патеки до теренот.

Проектот е финансиран од страна на ООУ „Браќа Миладиновци“, во соработка со Општина Пробиштип.

Градоначалникот Тони Тоневски истакна дека вложувањата во спортската инфраструктура се директна инвестиција во здравјето и правилниот развој на децата, нагласувајќи дека општината ќе продолжи со поддршка на вакви проекти во сите населени места.

Република

Повеќе села во тетовско утре ќе останат без електрична енергија

Поради планирани интервенции на електродистрибутивната мрежа, утре (26 декември) без струја ќе останат делови од повеќе села во тетовскиот регион.

Според најавата, прекинот е планиран во периодот од 09:00 до 14:00 часот во селото Желино, и тоа објектите од центарот кон Горната џамија. Во истиот временски интервал без електрична енергија ќе бидат и делови од селото Гајре, особено објектите во близина на џамијата.

Во селото Ново Село (Желино) прекинот ќе трае од 09:00 до 14:30 часот и ќе ги опфати објектите на влезот во селото, кај училиштето, како и објектите кон горниот дел од селото.

Исто така, од 09:00 до 14:30 часот без струја ќе бидат и делови од селото Групчин, додека во селото Цепчиште прекинот е најавен од 09:00 до 14:00 часот.

Надлежните служби апелираат до граѓаните навремено да ги прилагодат своите обврски и да имаат разбирање додека траат планираните работи на мрежата.