Свет

Трамп го менува дипломатскиот тим: Амбасадорката Агелер си заминува од Македонија

Амбасадорите на САД во најмалку 29 земји минатата недела добиле известување дека нивните мандати ќе завршат во јануари, објавија двајца официјални претставници на Стејт департментот кои побарале да останат анонимни. Оваа одлука е дел од големата реорганизација на американските дипломатски претставништва под администрацијата на претседателот Доналд Трамп.

Според официјалните извори, администрацијата ќе замени околу 30 дипломати од кариера на амбасадорски и други високи позиции во амбасадите ширум светот. Иако амбасадорите кои се повлечени не ја губат својата работа, тие ќе се вратат во Вашингтон и ќе имаат можност да преземат други должности доколку сакаат.

Сите амбасадори кои се засегнати биле назначени во времето на администрацијата на Џо Бајден, но останале на своите позиции по почетната „чистка“ на почетокот на вториот мандат на Трамп во јануари, која најмногу се однесуваше на политички именувани функционери. Од Стејт департментот не ја коментираа конкретната бројка на амбасадори, но нагласија дека се работи за рутински процес, бидејќи амбасадорот е „личен претставник на претседателот и е право на претседателот да осигура дека во овие земји се наоѓаат лица кои ја промовираат неговата агенда ’Америка на прво место‘“.

Најголеми промени се очекуваат во Африка, каде амбасадорските позиции ќе се менуваат во 13 земји: Бурунди, Камерун, Зеленортските Острови, Габон, Брегот на Слоновата Коска, Мадагаскар, Маврициус, Нигер, Нигерија, Руанда, Сенегал, Сомалија и Уганда.

Следи Азија со шест промени – Фиџи, Лаос, Маршалските Острови, Папуа Нова Гвинеја, Филипини и Виетнам. Во Европа се очекуваат промени во Ерменија, Северна Македонија, Црна Гора и Словачка.

На Блискиот Исток, амбасадорите ќе се менуваат во Алжир и Египет, а на Јужна и Централна Азија – во Непал и Шри Ланка. Промените ќе се одразат и во Западната хемисфера, каде ќе се менуваат амбасадорите во Гватемала и Суринам.

Ова е најголемата ротација на американски дипломати од почетокот на мандатот на Трамп, и експертите сметаат дека таа е дел од стратегијата за целосно усогласување на надворешната политика со визијата „Америка на прво место“.

Свет

Убиен висок руски офицер: Безбедносните служби на терен

Смртта на генералoт Фанил Сарваров во Москва претставува „ужасно и брутално убиство“, изјави денес портпаролот на Кремљ, Дмитриј Песков. Тој нагласи дека руските безбедносни служби ќе преземат сè што е неопходно во рамки на истрагата за случајот, пренесува РИА Новости.

Според Руски истражен комитет, Сарваров, кој бил началник на одделот за оперативна обука на Генералштабот на руските вооружени сили, бил тешко повреден кога експлозивна направа поставена под неговиот автомобил детонирала порано денес во Москва. Генералот им подлегнал на повредите на пат кон болница.

Во исто време, Песков ги отфрли тврдењата дека Русија наводно планира обнова на сферите на влијание на поранешниот Советски Сојуз. Тој реагираше на извештај на Ројтерс, кој се повикува на американски разузнавачки извори и тврди дека рускиот претседател Владимир Путин има планови за проширување на руското влијание во Источна Европа.

„Не знаеме колку се веродостојни тие информации. Дури и ако постојат такви извештаи, станува збор за погрешни претпоставки и заклучоци на разузнавачки служби. Тоа апсолутно не е точно“, изјави Песков.

Свет

Силни дождови и поплави во Франција – сообраќајот во колапс

Силно невреме го зафати југот на Франција, предизвикувајќи поплави, евакуации и сериозни нарушувања во сообраќајот. Околу 40 лица беа евакуирани во Монпелје, каде што поројните дождови доведоа до затворање на голем број улици, а трамвај заглави во надојдена вода.

Пет департмани, меѓу кои и Еро, се под портокалова временска тревога поради обилни врнежи и ризик од поплави. „Во тек се безбедносни интервенции“, соопшти префектурата на Еро за BFM.

Најпогодени се Монпелје, Сен Жак де Вед и Вилнев ле Маглон. Градските власти во Монпелје информираа дека се затворени парковите, гробиштата, зоолошката градина и божиќниот пазар, додека јавниот превоз и сообраќајот се значително отежнати.

За само еден час наврнале околу 40 милиметри дожд, а во последните шест часа количината достигнала и до 75 милиметри. Метеоролозите предупредуваат дека во долината Монпелје во наредните часови може да наврнат и до 120 милиметри дожд.

Во неделата особено тешко беше погодена општината Ларошет, каде што реката се излеа од коритото и достигна ниво од осум метри. И реката Еро е под портокалово предупредување поради зголемен водостој, со висок ризик од прелевање во секторот Агде.

Надлежните апелираат граѓаните да бидат максимално претпазливи, да се држат подалеку од водотеци, брегови и мостови, да ги избегнуваат поплавените патишта и да не влегуваат во подруми и подземни паркинзи, како и да го ограничат движењето.

Свет

Најголемата нуклеарна централа во светот повторно стартува во Јапонија

Гувернерот на префектурата Ниигата, Хидеи Ханазуми, денеска доби ново „зелено светло“ од локалното собрание, само еден месец откако ја поддржа повторната работа на најголемата нуклеарна централа во светот – Кашивазаки-Карива. Оваа одлука значи дека централата, затворена по катастрофата во Фукушима во 2011 година, ќе се врати во работа, предизвикувајќи бурни реакции меѓу граѓаните.

Пред зградата на собранието, околу 300 демонстранти, претежно постари граѓани, го изразија својот глас на протест против нуклеарната енергија. Со транспаренти на кои пишуваше „Не за нуклеарно оружје“ и „Се спротивставуваме на рестартирањето на Кашивазаки-Карива“, тие ги искажаа своите стравови од можни несреќи – како трагичната катастрофа во Фукушима, што значи дека стравовите постојат и по 12 години од немилиот настан.

Реакторот Кашивазаки-Карива, сместен 220 километри северозападно од Токио, беше еден од 54-те јапонски реактори кои беа затворени по разорниот земјотрес и цунами во 2011 година. Од тогаш, Јапонија постепено ги рестартира своите нуклеарни централи, како дел од напорите да ја намали зависноста од увозот на фосилни горива, но сеочите стравови од катастрофи како Фукушима и понатаму будат силни реакции кај јавноста.

Со рестартирањето на Кашивазаки-Карива, Токиската електроенергетска компанија (ТЕПКО) повторно ќе управува со реактор што се смета за клучен за енергетската независност на Јапонија. Според НХК, планираното активирање на првиот од седумте реактори е закажано на 20 јануари, отворајќи ново поглавје во историјата на јапонската нуклеарна енергија.