Република

Димитровски: Битола никогаш не била поголемо градилиште – над 50 километри нови и реконструирани улици и патишта

Секретарот на Општина Битола, Борче Димитровски, јавно реагираше на тврдењата на дел од советниците дека „ништо не е направено“ во Битола во изминатите три и пол години. Во пресрет на седницата на Советот, закажана за понеделник, 14 јули, на која треба да се разгледува ребалансот на буџетот за 2025 година, Димитровски преку јавна објава изнесе детален список на капитални и инфраструктурни зафати реализирани од 2022 година наваму.

„Најчесто користениот збор последниве години е ‘ребаланс’. Но, кога ќе се отвори секој извештај за реализација на програмите – фактите говорат сами за себе“, пишува Димитровски, додавајќи дека се реализирани или се во финална фаза преку 60 инфраструктурни проекти. Според него, вкупно се изградени или реконструирани улици и патишта во должина од над 50 километри.

Меѓу најзначајните зафати се изградбата на нови улици и локални патишта во повеќе населени места (Дихово, Брусник, Буково, Егри, Лажец, Оптичари, Трново, Магарево), реконструкцијата на фреквентни улици во урбаното јадро (како „Македонска фаланга“, „Цане Василев“, „Даме Груев“, „Христо Узунов“, „Солунска“, „Наум Наумовски Борче“, „Стив Наумов“, „Индустриска“ и други), како и изградба на нови сообраќајни и јавни содржини (кружни текови, паркинзи, колектори, мостови, велосипедски патеки и паркови).

Посебно се истакнуваат доизградбата на северната трибина на стадионот „Петар Милошевски“ и првиот вечерен натпревар одигран во историјата на стадионот со вклучени рефлектори, на 3 ноември 2024 против ФК Вардар. Исто така, значаен дел од проектите се реализирани со финансиска поддршка од ЕБОР и Министерството за животна средина, а дел од нив се очекува да продолжат со нови фази, условени од одлуките на Советот.

„Никогаш не се работело повеќе – фактите се јавни, транспарентни и проверливи. Но, на крајот граѓаните се тие што треба да го кажат последниот збор“, истакна Димитровски, додавајќи дека Битола е една, најубава, и дека само заедно може да стане уште поубава.

Република

Битола го одбележа Денот на својот заштитник: Литургија и литија во чест на Св. Нектариј Битолски

Со света архиерејска литургија и свечена литија, денес во Битола беше одбележан Денот на Свети Нектариј Битолски, заштитник на градот. Верници од Битола се собраа во храмот „Свети Великомаченик Димитриј“, каде што се одржа Светата Божествена Литургија во чест на преподобниот Нектариј, кој се упокоил на 5 декември 1500 година.

На литургијата присуствуваа градоначалникот на Битола, Тони Коњановски, како и претседателот на Советот на Општина Битола, Бојан Бојкоски, заедно со бројни верници.

По завршувањето на богослужбата, голем број присутни верници пристапија кон Светата Причест. Потоа, согласно долгогодишната традиција, низ повеќе битолски улици се одржа свечена литија, во која учествуваа бројни граѓани.

По повод празникот, градоначалникот Тони Коњановски упати честитка до битолчани, посакувајќи Свети Нектариј Битолски постојано да биде нивен духовен заштитник и водилка.

„На сите сограѓани им го честитам Денот на Заштитникот на градот – Свети Нектариј Битолски. Неговата заштита нека биде постојано со нас. Секојдневието да го исполнуваме со љубов, меѓусебно почитување и добрина, вредности со кои ќе ја градиме иднината на Битола и на генерациите што доаѓаат“, порача градоначалникот Коњановски.

Република

УТРЕ БЕЗ СТРУЈА ДЕЛ ОД ТЕТОВО И СЕЛОТО ДОБРОШТЕ

Утре, 19 декември 2025 година, поради планирани работи на електродистрибутивната мрежа, без електрична енергија ќе останат дел од град Тетово и едно тетовско село.

Во периодот од 09:00 до 14:00 часот, прекин во снабдувањето со струја ќе имаат корисниците на улица 114 кај СИЗ во Тетово.

Во исто време, од 09:00 до 14:00 часот, без електрична енергија ќе биде и дел од селото Доброште, поточно објектите кои се наоѓаат во близина на старата џамија.

Од надлежните информираат дека прекинот е поради планирани интервенции со цел подобрување на сигурноста на електроснабдувањето.

Република

Три децении пријателство: Македонија слави 30 години дипломатски врски со 14 земји

Во свечена атмосфера во Министерството за надворешни работи и надворешна трговија, денес беа одбележани три децении од воспоставувањето на дипломатските односи на Република Македонија со 14 земји, меѓу кои Соединетите Американски Држави, Грција, Австралија, Саудиска Арабија, Романија, Молдавија, Индија, Естонија, Украина, Казахстан, Монголија, Азербејџан, Литванија и Израел.

Свои обраќања на настанот имаа заменик-министерот за надворешни работи и надворешна трговија, Зоран Димитровски, како и амбасадорката на Романија, Адела Моника Аксинте.

Во своето обраќање, заменик министерот Димитровски истакна дека денес се слави „триесетгодишно патување на просперитет и взаемно почитување“ кое започнало во 1995 година. „Во тие рани години на нашата независност, секое воспоставување на дипломатски односи беше вистински камен-темелник во градењето на нашата државност. Тие први чекори го одбележаа нашиот непоколеблив пат кон западноевропските вредности и нашите аспирации за интеграција во евроатлантското семејство“, нагласи Димитровски.

Свечениот настан беше прилика да се потсети на значењето на долгорочната соработка и пријателството меѓу Република Македонија и земјите партнери, како и на заедничките вредности кои ги градат меѓусебните односи во изминатите три децении.