Свет

Трамп најавува враќање на шеќерот во Кока-Кола

Американскиот претседател Доналд Трамп преку објава на неговата платформа Truth Social откри дека е во тек преговарачки процес со компанијата „Кока-Кола“, со цел замена на актуелниот засладувач – сируп од пченка – со шеќер од трска во нивните производи што се продаваат на американскиот пазар.

„Би сакал да им се заблагодарам на сите во менаџментот на Кока-Кола. Ова ќе биде многу добар потег од нивна страна, ќе видите. Само ќе биде подобро“, напиша Трамп.

Од компанијата „Кока-Кола“ негираа директна потврда за каква било промена, но признаа дека „доаѓаат иновации“ и најавија повеќе информации во периодот што следува.

Во САД веќе се продава варијанта на овој пијалок со шеќер од трска, популарно позната како „мексиканска Кока-Кола“, додека поголемиот дел од останатите производи се засладени со сируп од пченка, кој е поевтин поради владини субвенции за пченкарното производство.

Иако омилен пијалок на Трамп е Диет Кока-Кола, засладена со аспартам, неговата администрација – преку иницијативата „Направете ја Америка повторно здрава“ предводена од секретарот за здравство Роберт Ф. Кенеди помладиот – го врши притисокот врз прехранбената индустрија да ги исфрли вештачките состојки, бои и конзерванси од формулите на своите производи.

Неколку големи компании, како „ПепсиКо“, „Нестле“ и „Џенерал Милс“, веќе најавија дека до крајот на годината ќе преминат на производи без вештачки состојки, следејќи ја оваа федерална здравствена агенда.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.