Инфо +

Боуви, Фројд, Шабан, Запа, Армнстронг – можните нови имиња на улици во Скопје

Советот на Град Скопје на претстојната седница ќе расправа за дополнување на листата на имиња на улици, плоштади, мостови и на други инфраструктурни објекти на подрачјето на Град Скопје. Меѓу предложените личности според кои во иднина може да се именуваат улици во
главниот град се: музичките групи „Леб и сол“, „Лева патика“ и „Бис-без“, светските рок-икони Дејвид Боуви и Френк Запа, скопскиот легендарен Кројач Ангелковски, неодамна починатиот политичар Фаик Абди, американскиот астронаут Нил Армстронг, косовскиот политичар Ибрахим Ругова, српскиот и југословенски актер Љубиша Самарџиќ, Шабан Трстена, Кензо Танге, Зигмунд Фројд и Свети Сава.

Со усвојувањето на ова дополнување, постоечкиот регистер на имиња се предлага да биде дополнет со вкупно 571 име. Листата опфаќа имиња на истакнати личности од областа на градското, националното и светското културно и историско наследство, поважни настани од македонската и светската историја, имиња дадени според топоними на градови во земјата и регионот и други имиња.

Со ова дополнување на листата предвидено е да се зголеми бројот на имиња на женски личности и настани кои оставиле белег во историски и културен контекст, како и на припадниците на немнозинските заедници кои живеат во Скопје, но и на бројот на топоними со регионално и светско значење.

Од вкупно 571 име, 479 се имиња на истакнати личности од кои 79 се имиња на жени, додека, пак, останатите 92 имиња се имиња на поими кои означуваат поважни настани, топоними и други поими. Во дополнувањето на листата вратени се и имињата на улиците од периодот на
солидарноста и изградбата на повоено Скопје, а кои беа отстранети со претходни одлуки на Советот на градот.

Град Скопје спроведе онлајн анкета во летото 2019 година на која граѓаните ги дадоа своите предлози за имиња на градските улици, а листата беше дополнета и со други формално доставени иницијативи.

Во листата се вклучени имињата на народни херои и други носители на позначајни државни одликувања, познати личности и настани од светската историја, имињата на скопските градоначалници, ректори на скопскиот универзитет, академици, државници, стопанственици, научници, спортисти, уметници и др.

Согласно Законот за определување на имињата на улици, плоштади, мостови и други инфраструктурни објекти Името на улица, плоштад, мост и на друг инфраструктурен објект може да биде определено со географско, етнографско, историско и друго обележје, име на истакната личност од областа на историјата, науката и културата, други погодни имиња, како и име на значаен настан и датум, врз основа на листа на имиња.

Законот предвидува две одделни постапки за утврдување на имиња и нивно задавање не конкретни топоними. Листата на имиња ја утврдува Советот на Град Скопје, по претходно добиена согласност од Владата. При утврдувањето на листата на имиња од страна на Советот на градот Скопје, општините од подрачјето на градот Скопје даваат мислење по неа.

По добиената согласност од Владата Советот на Град Скопје ја усвојува листата, а дури потоа може да се пристапи кон менување на конкретни имиња на улици, плоштади, мостови и други инфраструктурни објекти, коишто се менуваат со посебни одлуки на Советот.

Сите идни промени на имиња на улици, плоштади, мостови и на други инфраструктурни објекти на подрачјето на Град Скопје согласно овој закон предвидено е да се црпат исклучиво од оваа листа.

Свет

Зеленски: САД и други партнери да не вршат притисок за избори во Украина

Украинскиот претседател Володимир Зеленски денеска нагласи дека Украина не може да поднесе притисок околу одржувањето избори во моментот и ги повика партнерите, вклучително и САД, да не инсистираат на ова прашање.

Во видео обраќање, Зеленски изјави дека водел „важна дискусија“ со пратениците во парламентот за правните и безбедносните аспекти на изборите и дека секој притисок од странство во оваа фаза не е пожелна опција. „Тоа не е лесно, но притисокот по ова прашање дефинитивно не е она што ни треба“, нагласи тој.

Зеленски посочи дека Украина е подготвена да организира избори во рок од три месеци, но само доколку се обезбеди безбедноста на гласачите, со помош на САД и другите сојузници. Тој реагираше и на коментарите на американскиот претседател Доналд Трамп, кој сугерираше дека украинската влада го користи војниот конфликт како оправдување за одложување на изборите.

Иако законски изборите се забранети за време на војна, Зеленски се соочува со дополнителен притисок од странство, додека Русија продолжува со воздушни напади, а милиони Украинци се раселени и речиси еден милион војници е распоредено на фронтот.

Свет

Руските сили се сè поблиску до Доњецк, но постарите Украинци не сакаат да ги напуштат своите домови

97-годишната Катерина Ломова од Добропоље, Донецка област, одбива да го напушти својот дом и покрај тоа што руските сили се приближуваат и секојдневно го гаѓаат регионот со артилерија, бомби и дронови. Нейната решителност ја симболизира судбината на многу постари жители кои се држат до своите домови, иако се изложени на голема опасност.

Екипата на спасувачи „Бел ангел“ редовно патролира низ областа, обидувајќи се да ги убедат жителите да се евакуираат. Главната патека е заштитена со мрежи против дронови, додека изгорени автомобили и уништени куќи сведочат за разурнувањата. Некои жители се подготвени да заминат, додека други, како Ломова, остануваат непоколебливи.

„Не, не – не сакам да одам сега. Можеби подоцна, но не сега“, вели Ломова, додека нејзината роднина од Шпанија се обидува да ја убеди преку видеоповик. И покрај можноста за безбеден транспорт до Краматорск и подоцна до Павлодар, таа останува во својот дом.

Според извештаите, некои семејства кои веќе биле евакуирани подоцна се вратиле во своите оштетени куќи, ризикувајќи ги животите на себе и на децата. Генадиј Јудин од „Бел ангел“ предупредува дека постарите лица често не ја сфаќаат целосно опасноста и со тоа ја загрозуваат сопствената безбедност.

Во меѓувреме, руските сили продолжуваат со засилено напредување во Донбас, додека украинските жители, како Ломова, се држат до единственото што им останало – својот дом.

Свет

Украина изведе масовен удар врз Русија

Украина изврши масовен дронски напад насочен кон Москва и повеќе региони во западна Русија, јавуваат извори.

Големи групи дронови биле лансирани истовремено, а нивните траектории покажуваат удари длабоко во територијата околу руската престолнина.

Овој напад се смета за една од најобемните операции со долги дострелни беспилотни летала од почетокот на војната, насочен кон важни инфраструктурни и логистички цели.

Засега нема официјални информации за жртви или материјална штета.

Извор: @sentdefender