Свет

Трамп доби нова номинација за Нобелова награда за мир: „Го заврши војниот конфликт меѓу Камбоџа и Тајланд“

Камбоџа планира да го номинира американскиот претседател Доналд Трамп за Нобелова награда за мир, како признание за неговата помош во постигнувањето договор за прекин на огнот што го заврши неодамнешниот конфликт на границата со Тајланд, изјави заменик-претседателот на Камбоџа, Сан Чантол, пренесува Wall Street Journal.

Чантол изјави дека без интервенцијата на Трамп, Камбоџа и Тајланд веројатно не би постигнале договор за прекин на борбите во кои загинаа најмалку 45 луѓе од двете страни на спорната граница.

Минатиот викенд Трамп постави услов за укинување на високите „реципроцни царини“ кои закани да им ги наметне на двете земји – барајќи прекин на конфликтот. На средбата во Малезија во понеделникот, лидерите на Камбоџа и Тајланд се согласија на примирје кое главно се почитува, иако имаше извештаи за помали пресметки.

„Тој заслужува Нобелова награда, не само за работата во Камбоџа, туку и на други места“, рече Сан Чантол. Камбоџанската влада планира да го предложи Трамп пред Норвешкиот Нобелов комитет кој ја доделува наградата.

Вчера, администрацијата на Трамп објави дека Камбоџа и Тајланд ќе се соочат со царина од 19% на извозот во САД, што е значително намалување во споредба со претходната стапка од 36% и уште претходно најавените 49% за Камбоџа.

Поддршката за амбициите на Трамп да ја добие Нобеловата награда станува начин државите да добијат негова наклонетост, иако досега не успеал да реши поголеми конфликти во Газа и Украина. Израел и Пакистан веќе го пријавиле Трамп пред норвешкиот комитет, а неколку африкански земји исто така изразиле поддршка.

Сан Чантол додаде дека Камбоџа работи на целосен трговски договор со САД, а царината од 19% е дел од поширок договор што сè уште се преговара. Камбоџа веќе се согласила да ги укине сите претходни царини за увоз од САД, вклучувајќи автомобили, на што ќе изгуби околу 60 милиони долари приходи.

Покрај тоа, ќе купи 10 авиони Boeing 737 MAX 8 за националната авиокомпанија Air Cambodia, со можност за купување уште 10, рече Чантол.

Камбоџа се надева дека ќе добие посебни исклучоци од царината од 19%, особено за важната текстилна индустрија каде што поголем дел од вработените се жени.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.