Балкан

Вучиќ тврди: Вонредна состојба не се разгледува, ќе има други мерки

Претседателот на Србија, Александар Вучиќ, изјави дека владата располага со доволен број законски мерки за справување со протестите, нагласувајќи дека воведување вонредна состојба не било разгледувано. Во обраќањето од Палатата Србија, Вучиќ најави дека „во наредните денови“ ќе се донесат „изненадувачки одлуки“ во врска со протестите, но додаде дека прогласување на вонредна состојба е последна мерка и комплицирана процедура која бара согласност на претседателот, премиерот и Народното собрание.

И покрај тоа што се обиде да ја смири јавноста, неговата порака дека владата има „доволно мерки“ делува како сигнал за можни нови репресивни дејства. Потпретседателот на Новиот полициски синдикален сојуз, Милан Думановиќ, побара оставки на неколку високи полицајци заради нивното делување на протестите, истакнувајќи дека сегашната ситуација создава тензија и недоверба меѓу граѓаните и полицијата.

Адвокатот Владимир Терзиќ предупреди дека Вучиќ, со поддршка на дел од владините структури, може повторно да злоупотреби овластувањата од член 200 од Уставот и да прогласи вонредна состојба без одлука на Собранието, како што тоа се случи во 2020 година. Според него, тоа би довело до сериозно ограничување на основните слободи, вклучувајќи движење, протест и слободно изнесување мислење, со цел да се задушат протестите во Србија.

Терзиќ додава дека дел од полицијата веќе е подготвен да оди на боледување за да избегне директен судир со граѓаните, додека лојалистите на власта, заедно со паравоени и партиски структури, би продолжиле со репресивни дејства против демонстрантите. Сето тоа според него укажува на можна подготовка за поголема контрола и ограничување на граѓанските права во блиска иднина.

Балкан

Инцидент во Лерин: Македонска песна забранета на празнична прослава

За време на празничната прослава на Коледе во Лерин (Флорина), настап на македонската народна песна „Софка на татко“ беше прекинат по интервенција на градоначалникот Василеос Гианакис. Музичкиот бенд „Ендопика“ бил укажан дека не смее да пее на македонски јазик и дека песната може да се изведе исклучиво во инструментална форма.

Според активистот Павле Васкопулос, ваквите случаи на притисок и дискриминација не се новина за Македонците во Леринско, Костурско и Воденско. Тој истакна дека граѓаните кои јавно зборувале за своите права често биле етикетирани како „скопски агенти“. Телевизија 24 побара став од Општина Лерин, но до објавувањето на прилогот одговор не е добиен.

Црлиот текст може да го прочитате на Телевизија 24

Балкан

Снежно невреме го зафати регионот

Обилни снежни врнежи денес ја зафатија територијата на општина Кладово, а сите расположиви екипи се на терен и работат на расчистување на патиштата.

Градоначалникот Саша Николиќ ја посети локацијата заедно со дежурните служби за да се увери дека активностите се одвиваат според планот. „Сите надлежни служби, како и расположивата механизација, се на терен. Моментално се работи на расчистување на патот во населбата Пропажешќе, како и на патниот правец до Петрово Село“, изјави Николиќ за РИНА.

Тој апелираше до возачите да ја прилагодат брзината и вниманието на условите на патот и да ги следат препораките на надлежните служби. „Ги молам граѓаните да бидат дополнително внимателни во сообраќајот“, нагласи градоначалникот.

Балкан

Честитка по повод Божик упати Македонско друштво “Илинден“-Тирана до поглаварот на Албанска православна црква и до сите верници

По повод Христовото раѓање – Божик, македонското друштво “Илинден“-Тирана упати честитка до поглаварот на Албанска православна црква неговото блаженство г.г.Јоан, архиепископ на Тирана, Драч и цела Албанија и до сите верници кои го прославуваат Божик според Грегоријанскиот календар.

Дозволете ми во мое лично име, од името на друштвото и на сите Македонците во Република Албанија, Вам лично и членовите на светиот архиерејски Синод, на преподобното монаштво и свештенство како и на сите православни верници, да Ви го честитам големиот христијански празник, Раѓањето Христово – Божик, и да ви посакам здравје, среќа, благосостојба, се вели во честитката потпишана од претседателот на друштвото, Никола Ѓурѓај.

Во неа се наведува дека Божик е празник кој секој христијанин го дочекува во кругот на семејството радувајќи се и славејќи го животот. И оваа година, се додава, Божик нека биде инспирација сплотени со отворени срца и чиста мисла да помислиме на сите оние на кои им е потребна материјална и духовна поткрепа и безрезервно да им ја понудиме нашата помош.

Токму во духот на христијанството, дозволете уште еднаш да посакам во срцата на сите верници да се всели мирот и спокојството, радоста и разбирањето и да продолжиме да даруваме безусловна љубов и почит кон ближните. Христос се роди, навистина се роди, стои во честитката на македонското друштво “Илинден“-Тирана.