-Доволно беше чекање, акцијата против корумпирани обвинители и судии почнува од понеделник, изјави денеска премиерот Христијан Мицкоски, одговарајќи на новинарски прашања по означување на почеток на реконструкција на спортска сала „Расадник“ во општина Кисела Вода.

Тој нагласи дека нема да функционираат како „естрада“ и да се понижуваат поединци, нема да се ангажираат специјални полициски единици при имплементација на планот кој ќе почне да се спроведува од понеделник.

-Не функционираме како естрада и сигурно дека нема сега да кажувам како што тоа во минатото се случуваше пред камери или пред медиуми и да носам специјални полициски единици, да понижувам луѓе, индивидуи итн. Имаме план, од понеделник почнуваме со имплементација. Доволно беше чекање, чекавме, дадовме шанса, доволно беше. Очигледно дека прежестоки се нападите наеднаш на дијареја, грчеви во цревата, главоболка, температура, анксиозност итн. кога ќе треба да се потпише последниот указ за да се спроведе правдата кај поедини обвинители, за жал, изјави Мицкоски.

Тој деновиве во повеќе наврати посочи дека е разочаран од однесувањето на поединци и неможноста за спроведување на правдата.

-Секогаш кога треба правдата да ја имплементираме некој добива дијареја, покачена температура или анксиозност од обвинителите и судиите, Мицкоски пред два дена по посетата на КОСТАЛ Македонија, посочувајќи дека е „жестоко разочаран од тоа што се случува“ и во периодот што следи најавува „робусна акција“ за справување, како што рече, ако треба и „на поинаков начин со тие корумпирани обвинители и судии“.

Во врска со последните настани, претседателот на Собранието, Африм Гаши, најостро го осудува секој чин на дивеење, без разлика на причината или основата што се користи за негово оправдување.

-Насилството и дивеењето никогаш не може да бидат решение или одговор. Уште помалку може да се користат како алатка за провокација со намера за создавање тензии и дестабилизација, се вели во соопштението од законодавниот дом.

Претседателот Гаши повикува на воздржаност, почит и конструктивна комуникација како единствениот пат за надминување на сите предизвици. Само преку меѓусебно разбирање и соработка можеме да обезбедиме мир и стабилност за сите граѓани во нашата заедничка држава.

Претседателот Гаши останува посветен на промовирање на демократски вредности и почитување на државните симболи.

Министерката за образование и наука, Весна Јаневска, денеска ја посети Општина Битола, каде оствари средба со градоначалникот Тони Коњановски. Главна тема на разговорот беше прогласувањето на СОТУ „Ѓорѓи Наумов“ за регионален центар за стручно образование во регионот Пелагонија, како и за унапредување на образовните процеси во општината.

Јаневска изрази задоволство што токму ова училиште е избрано за регионален центар, нагласувајќи дека по завршените анализи ќе се дефинираат потребните струки и профили, а истовремено ќе се пристапи кон инфраструктурно средување и модерно опремување на училиштето.

„Овој процес бара време, но СОТУ ‘Ѓорѓи Наумов’ ќе стане еден од осумте регионални центри што треба да се заокружат до 2027 година. Центрите во Охрид и Куманово веќе функционираат, а оној во Тетово е во фаза на изградба. И Битола ќе добие модерен образовен центар кој ќе биде од огромна корист за целиот регион,“ истакна министерката, додавајќи дека со ваквите центри учениците ќе стекнат високи компетенции и ќе бидат подготвени за вработување во локалниот пазар.

Градоначалникот Коњановски ја истакна важноста на оваа иницијатива, нагласувајќи дека со прогласувањето на СОТУ „Ѓорѓи Наумов“ за регионален центар, се прави голем чекор кон задржување на младите во регионот преку квалитетно образование и создавање на стручни кадри кои ќе одговараат на потребите на локалниот бизнис сектор.

„Образованието е приоритет за нас како локална самоуправа. Посветено работиме на подобрување на условите во училиштата, реконструкција на спортски сали и поставување на фотоволтаици. Овој проект е доказ за нашата заложба да направиме повеќе за нашата заедница и за иднината на младите,“ изјави Коњановски, заблагодарувајќи ѝ се на министерката за нејзината поддршка.

Со овој проект, Битола се позиционира како еден од водечките центри за стручно образование, што ќе има позитивен ефект врз локалната економија и квалитетот на живот во регионот.