Украина формира Центри за подготовка на граѓани за национален отпор

Владата на Украина одобри план за формирање на „Центри за подготовка на граѓани за национален отпор“, иницијатива развиена од Министерството за одбрана во соработка со Кабинетот на претседателот.

Целта на овие центри е да се зајакне отпорноста на населението и да се подготви за евентуално учество во одбраната, доколку дојде до натамошна ескалација на војната. Центрите ќе се отворат во сите украински области, како и во главниот град Киев.

Обуката ќе ја водат претежно ветерани на украинските вооружени сили, а поддршка ќе даваат активни војници од територијалната одбрана и специјалните единици. Практично, граѓаните ќе се обучуваат за потенцијални сценарија на герилска борба, во случај да се јави потреба за таков вид отпор.

Центрите ќе располагаат со обука опрема, симулатори, радио-врски и макети од оружје. Одлуката доаѓа во момент кога Украина сè повеќе се потпира на мобилизација на населението, што укажува дека губитоците на фронтот ја тераат државата да размислува за проширена одбрана преку народни одреди.

Се потсетува дека уште во првите денови од руската инвазија, украинските цивили покажаа отпор – од употреба на Молотови коктели до директни судири со руските сили. Во Киев тогаш дури се делеше оружје на граѓаните, со цел тие да ја бранат својата земја.

Снимките од Херсон, каде цивили се соочија со руската армија, говорат за одлучноста на народот, иако резултатите беа трагични. Подоцна, бунтовите преминаа во мирни демонстрации.

Фактот дека иницијативата доаѓа директно од Кабинетот на претседателот укажува на тоа колку сериозно ја сфаќа ситуацијата Владимир Зеленски. Очигледно, тој најдобро го познава моменталниот капацитет на својата армија.

Претседателот на Република Српска, Милорад Додик, по денешниот обид за негово приведување излезе со остри изјави, нагласувајќи дека законите на Босна и Херцеговина повеќе нема да се применуваат на територијата на Република Српска, пренесе ХРТ.

Додик порача дека не се плаши од апсење и остро ги критикуваше Агенцијата за истраги и заштита (СИПА) и Судот на БиХ, нарекувајќи ги „окупаторска сила“ која, како што рече, нема да дозволи да делува во РС. „Ако мислат дека полицијата на Република Српска ќе се повлече, се лажат“, изјави Додик, додавајќи дека се чувствува доволно заштитен.

Тој истакна дека дојдено е време да се покаже кој навистина ги крши законите, а до инспекторите на СИПА упати порака дека „дури сега ќе видат што не можат да направат“.

Во своите изјави, Додик не застана тука – директно се закани и на високиот претставник во БиХ, Кристијан Шмит, велејќи дека „сега ќе види како се приведува некој за лажно претставување“, обвинувајќи го Шмит за „криминално и фашистичко однесување“.

Претседателот на ентитетот дополнително алармираше со тврдења дека Шмит подготвува закон кој се однесува на статусот на државната сопственост во БиХ. Според Додик, ако таков закон навистина се донесе, Република Српска веднаш ќе прогласи отцепување од БиХ.

„Ќе се одделиме и ќе го браниме нашиот имот“, рече тој, повторувајќи ја реториката за самостојност на ентитетот.

Полски министер за надворешни работи жестоко го критикува Путин: „Дали немате доволно земја?“

Полскиот министер за надворешни работи, Радек Сикорски, го искористи своето годишно обраќање во парламентот за жестоко да го критикува рускиот претседател Владимир Путин. Во својот говор, Сикорски го праша Путин: „Дали немате доволно земја?“

Оваа изјава следува по извештајот во медиумите дека Путин наводно понудил прекин на агресијата против Украина на постоечките борбени линии како дел од можното мировно решение, што го наговести потпретседателот на САД, Џеј Ди Ванс.

Полска е еден од најсилните сојузници на Украина, а Сикорски во својот говор директно го напаѓа Кремљ, велејќи: „Единаесет временски зони, а вие тоа не го сметате за доволно?“

Тој додава: „Посветете се на подобро управување со она што веќе го имате внатре во вашите граници, согласно со меѓународното право.“