Црна Хроника

Обвинителството ја истражува тешката сообраќајка кај Фариш – две лица загинати, петмина повредени

Основното јавно обвинителство Прилеп соопшти дека вечерва дежурен јавен обвинител извршил увид на местото на тешката сообраќајна несреќа што се случи во близина на Плетвар, на патниот правец Прилеп – Росоман, во близина на местото Фариш.

Според првичните информации, до трагедијата дошло при неправилно претекнување и судар на два автомобили кои се движеле во иста насока. Во несреќата животот го загубиле две лица, меѓу кои и возачот на едното возило, а пет други се здобиле со повреди.

Јавниот обвинител издал наредби за прибирање на сите материјални траги од местото на несреќата и ќе се спроведе вештачење на автомобилите, како и обдукција врз телата на загинатите.

Покрај тоа, кај преживеаниот возач ќе се направи тестирање за присуство на алкохол и психоактивни супстанции.

Од Обвинителството информираат дека се преземаат сите неопходни дејствија за целосно утврдување на околностите и причините кои довеле до сообраќајната несреќа.

Црна Хроника

Голема акција на полицијата – Запленета голема количина на оружје и муниција

Со навремена размена на информации и координирана соработка со бугарските безбедносни служби, спречен е обид за нелегален транспорт на оружје од Република Турција преку Република Бугарија кон Македонија.

На 24 декември 2025 година, преку SELEC Центарот, Единицата за недозволена трговија со оружје, опасни материи и радиоактивен материјал при Одделот за криминалистичка полиција, во соработка со Бугарската генерална дирекција за борба против организираниот криминал и Царинската агенција на Бугарија, презела координирани мерки за спречување на шверцот.

Во текот на ноќта меѓу 24 и 25 декември 2025 година, на граничниот премин „Капитан Андреево“, бил извршен претрес на товарно возило „Волво“ со македонски регистарски таблички. При контролата, во товарниот простор биле пронајдени и одземени три пушки, 20 пиштоли и вкупно 5.750 куршуми.

По целосно документирање на настанот и идентификување на сите инволвирани лица, надлежните институции најавуваат поднесување соодветна кривична пријава.

Црна Хроника

Драма во Скопје – масовна тепачка со опасни предмети меѓу две групи!

– На 23.12.2025 во 20:20 часот во СВР Скопје е пријавено дека на подрачјето на Гази Баба бил нарушен јавниот ред и мир со физичка пресметка помеѓу Ф.И.(38) и М.С.(38) од една страна и М.Н.(49) и Б.Н.(44) од друга страна, сите од Скопје, при што биле употребени и тврди предмети, стои во денешниот полициски билтен.

По целосно документирање на случајот ќе следува соодветен поднесок.

Црна Хроника

Возач нападнал полицајци при обид за апсење на патот Охрид-Струга

На 12 декември 2025 година, на регионалниот пат Охрид-Струга, полициски службеници од СВР Охрид дале знак за запирање на патничко возило управувано од Е.О. (27) од Охрид. Наместо да застане, возачот се обидел да удри полицајци и избегал од местото на настанот.

Подоцна истиот ден, во село Требеништа, општина Дебарца, Е.О. бил забележан повторно. При обидот за апсење, тој физички нападнал полицајци и повторно се обидел да избега.

СВР Охрид поднесе кривична пријава против Е.О. за напад врз службено лице при вршење работи од безбедноста. Инцидентот ја истакнува сериозноста и опасноста од непочитување на наредбите на полицијата и ризиците со кои се соочуваат службените лица.