Украина започна со распоредување на до 15.000 вооружени борбени роботи, познати како „тивки убијци“, објави британскиот „Дејли Мирор“, повикувајќи се на извори од Украина.

Овие роботи војници се дизајнирани за поддршка на трупите во рововите и како помош во градските борби, а, како што се надеваат украинските воени команданти, тие би можеле да претставуваат клучен пресврт во борбите кои се сѐ повеќе водат од ровови и на кратки дистанци, и да претставуваат напредок во високотехнолошкото војување, пишува весникот.

Роботите се опремени со оружје и сензори, можат да се движат по нерамен терен и да функционираат и преку ден и преку ноќ. Еден од најистакнатите модели е „Лутиот“, вооружен со пушка кал. 7,62 мм (истиот кал. користи и АК47), а се користи за извидување, поддршка на напади и прецизно огнено дејствување.

Украинските сили им доделиле специјална улога на овие мобилни оружја во воената тактика – за напади од неочекувани правци и за отвлекување на вниманието на руските трупи, наведува британскиот весник.

Роботите се контролираат на далечина, што овозможува на операторите да бидат безбедни, додека драстично го намалуваат ризикот за луѓето, што е особено важно поради големите украински загуби, се вели во текстот.

Министерството за одбрана на Украина инвестирало дури 120 милиони фунти (повеќе од 140 милиони евра) во роботизирани воени системи само во првиот квартал на 2025 година.

Ова е најголема инвестиција во воената автоматизација досега, а Киев верува дека масовната употреба на роботи ќе ја промени моменталната ситуација на фронтот во нивна корист.

Американскиот претседател Доналд Трамп ја одби понудата од претседателката на Европската комисија, Урсула фон дер Лајен, за договор во врска со царините.

Трамп изјави дека за да добие одложување на царините, Европската Унија треба да се согласи да купи американска енергија во вредност од 350 милијарди долари, отфрлајќи ја понудата на Брисел за „нула за нула“ царини на возила и индустриски производи.

Ова следува по понудата на Урсула фон дер Лајен, која предложи укинување на царините за автомобили и индустриски добра увезени од САД, под услов Трамп да возврати со истата мерка. На прашањето дали оваа понуда е доволна, Трамп одговори: „Не, не е“.

„Имаме дефицит со Европската Унија од 350 милијарди долари и тој брзо ќе исчезне“, изјави Трамп, додавајќи дека еден од начините да се промени тоа е ЕУ да купува енергија од САД. „Можеме да собереме 350 милијарди долари за една недела. Мораат да купат и да се обврзат дека ќе купат слична количина енергија“, истакна тој.

Оваа понуда на Фон дер Лајен дојде откако Трамп минатата недела воведе царини од 20 проценти за Европската Унија и минимален данок од 10 проценти за други трговски партнери. Како резултат на овие мерки, финансиските пазари глобално изгубија милијарди долари, а европските акции доживеаја најголем пад од почетокот на пандемијата на Ковид-19, пренесува Политико.

Трамп нагласи дека царините можат да бидат постојани или предмет на преговори, но под услов: „Ако можеме да направиме навистина фер и добар договор за САД, а не добар за другите. Сега Америка е на прво место“, рече тој. Своето објаснување го дополни со следните зборови: „Нашата земја беше најсилна од 1870 до 1913 година. Знаете ли зошто? Се беше засновано на царини. Немавме данок на приход. Тогаш, во 1913 година, некој генијалец дојде на идеја да им наплати на луѓето во нашата земја, а не на странските земји кои крадат од нашата земја“, пренесува Н1.

На референдумот одржан крајот на март, дури две третини од жителите на Париз (66 проценти) ја поддржаа идејата да се претворат уште 500 улици во француската престолнина во зони без автомобили, додека 34 проценти од гласачите беа против.

Сепак, според медиумите, на овие избори излегле само 4 проценти од 1,4 милиони регистрирани гласачи.

Со оглед на тоа дека преку истата трансформација досега веќе минале повеќе од 200 улици, кога планот ќе биде реализиран, бројот на пешачки улици во Париз ќе се зголеми на повеќе од 700. Тоа ќе биде повеќе од десетина проценти од сите улици во Градот на светлината.

Покрај тоа што автомобили претходно беа забранети во 218 улици, на 70 од нив биле создадени нови зелени површини, кои го прават животот и јавните простори во Париз попријатни, одржливи и поздрави, пренесува порталот Клима 101.

Одлуката кои улици ќе бидат претворени во пешачки зони ќе биде донесена во консултација со локалното население. Како што е најавено, во секој од 20-те арондисмани, односно административни окрузи, планирано е да се отстранат автомобили од околу 25 улици.

Овој референдум ќе резултира со елиминација на дополнителни 10.000 паркинг места, како додаток на 10.000 кои веќе беа отстранети од 2020 година.

Станува збор за последен во серијата потфати под водство на актуелната градоначалничка Ана Идалго, чија цел е да се намали загадувањето на воздухот, бучавата и штетните емисии во Париз, додека на местото на автомобилите и паркинг местата ќе се создаде зеленило.

Во минатото, жителите на Париз веќе се изјасниле за слични прашања: на референдумот од 2023 година излегоа со забрана за изнајмување електрични тротинети, а минатата година беше воведено поскапување на цените на паркингот за големи теренски возила.

Иако се реализираат овие промени, Париз заостанува зад европските престолнини кога станува збор за зелена инфраструктура, која вклучува приватни градини, паркови, дрвореди и мочуришни предели.

Според податоци од Европската агенција за животна средина, само 26 проценти од главниот град на Франција е покриен со зелена инфраструктура, додека просекот за европските престолнини изнесува 41 проценти.