Свет

Белата куќа: Мировниот план на Трамп е добар и за Украина и за Русија

Мировниот план на САД, кој го поддржува претседателот Доналд Трамп и за кој се преговара со Русија и Украина, е „поволен за двете страни“, соопшти Белата куќа, отфрлајќи ги критиките дека премногу се усогласува со барањата на Москва.

Портпаролката Каролин Левит изјави дека специјалниот пратеник на претседателот, Стив Виткоф, и државниот секретар Марко Рубио „тивко“ работеле на планот околу еден месец.

„Планот е во тек и подложен на измени, но претседателот го поддржува. Тоа е добар предлог и за Русија и за Украина, и веруваме дека може да биде прифатлив за двете страни“, рече Левит на брифингот. Таа додаде дека Вашингтон одржува „добри разговори“ и со Киев и со Москва за да утврди што би можеле да прифатат двете држави.

Ова е прва официјална потврда од Белата куќа за нацрт-планот што, според украински претставници, Вашингтон му го доставил на украинскиот претседател Володимир Зеленски. Деталите до кои дошол AFP покажуваат дека предлогот содржи дел од максималистичките барања на Москва за прекин на војната – вклучително и предавање територии и намалување на украинските вооружени сили.

Левит не сакаше да навлегува во детали, но негираше дека планот е неповолен за Киев. Таа потврди дека Рубио и Виткоф минатата недела се сретнале со украински претставници.

Портпаролката додаде дека Трамп е „сè пофрустриран“ од двете страни, но останува посветен на завршување на конфликтот. Републиканскиот претседател ветува дека ќе ја стави точката на војната во рок од 24 часа откако ќе ја преземе функцијата во јануари.

„Свесни сме за критиките и скепсата, но сакам да потсетам на историските успеси што претседателот и неговиот тим ги постигнаа на Блискиот Исток“, додаде таа, мислејќи на кревкото примирје меѓу Израел и Хамас во Газа.

„Веруваме дека нешто слично е возможно и меѓу Русија и Украина и работиме интензивно тоа да го оствариме“, заклучи Левит.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.