Принц Вилијам ќе присуствува на погребот на папата Франциско – кралот Чарлс ќе остане дома поради кралскиот протокол

Принцот Вилијам оваа недела ќе отпатува во Ватикан како претставник на британското кралско семејство за да присуствува на погребот на папата Франциско, кој почина на 21 април на 89-годишна возраст. Меѓутоа, кралот Чарлс III нема да присуствува – и тоа не поради личен избор, туку поради строгиот кралски протокол.

Како што пренесува Cosmopolitan, кралот Чарлс „буквално нема дозвола да оди во Ватикан“ на вакви церемонии. Експертката за кралското семејство Кејти Никол, повикувајќи се на извор од Бакингемската палата за Vanity Fair, објаснува дека „кралот, според долгогодишна практика, не присуствува на погреби“.

Ова не е првпат наследникот на тронот да оди на погреб на папа во име на монархот – Чарлс, тогаш уште принц, во 2005 година присуствуваше на погребот на папата Јован Павле II, претставувајќи ја кралицата Елизабета II.

Интересен момент е што кралот Чарлс бил еден од последните светски лидери што го посетиле папата Франциско пред неговата смрт. Само неколку дена претходно, Чарлс бил во Ватикан. По неговата смрт, кралот испрати официјално сочувство:

„Мојата сопруга и јас бевме длабоко потресени кога ја чувме веста за смртта на папата Франциско. Иако тагуваме, некако ни олеснува сознанието дека неговата светост успеа да ја сподели својата последна велигденска порака со црквата и светот, на кој му служеше со толкава посветеност.“

Во пораката, кралот Чарлс го нарече папата Франциско „симбол на сочувство и обединетост“, човек кој остави длабока трага преку својата борба за верата, луѓето и планетата.

„Неговото убедување дека грижата за создаденото е суштински дел од верата во Бога допре многу луѓе ширум светот. Преку својата посветеност, тој навистина ги облагороди животите на многумина“, додаде Чарлс во изјавата.

Претседателот на Фудбалската федерација на Македонија, Масар Омерагиќ на покана од УЕФА и Фудбалската федерација на Турција, присуствуваше на свеченото отворање на новата регионална канцеларија на УЕФА во Истанбул.

Настанот се одржа во присуство на бројни високи претставници од светот на фудбалот, вклучувајќи ги и претседателот на Република Турција, Реџеп Таип Ердоган и претседателот на УЕФА, Александар Чеферин.

Свеченоста беше одбележана со присуство на речиси сите претседатели на фудбалските сојузи од регионот, што сведочи за значењето на овој стратешки проект за понатамошен развој и унапредување на фудбалската соработка во Југоисточна Европа.

ФФМ ја поздравува оваа иницијатива на УЕФА и изразува подготвеност за активна соработка со новата канцеларија во насока на реализација на заеднички проекти и унапредување на фудбалот во регионот.

Масар Омерагиќ – претседател на ФФМ:

“Преку оваа нова канцеларија, УЕФА ќе ја зајакне својата координација со земјите од регионот, а интеграцијата на европскиот фудбал ќе се продлабочи уште повеќе. Турција, држава со современи стадиони и инфраструктура, ќе биде домаќин на три големи настани на УЕФА во краток временски период, вклучувајќи ја и организацијата на ЕУРО 2032, а тоа е потврда за развојот и нивната посветеност во работата. Сакам да му изразам благодарност на претседателот на Турската фудбалска Федерација и на УЕФА за нивната соработка, поддршка и доверба.“

Александар Чеферин – претседател на УЕФА:

“Турција продолжува да покажува уште поголема амбиција и посветеност да се докаже како еден од светските лидери во организирањето глобални спортски настани. Со сè поголем број значајни турнири што се приближуваат, решивме да отвориме канцеларија во Истанбул за да имаме силно локално присуство и да обезбедиме безпрекорно одржување на престижните натпревари.“

Ибрахим Етем Хаџиосманоглу – претседател на ТФФ:

“Продлабочувајќи ја нашата соработка со УЕФА ќе продолжиме да преземаме чекори кои ги унапредуваат универзалните вредности на фудбалот. Се надевам дека овој значаен ден ќе биде успешен за нашата земја, нашата фудбалска заедница и за УЕФА. Сакам да ја изразам мојата благодарност до сите кои дадоа придонес за да го оствариме ова и на сите кои се присутни денеска и го споделија овој момент со нас”.

Мира Мурати – визионерката зад иднината на вештачката интелигенција

Емира „Мира“ Мурати, родена во Валона, Албанија на 16 декември 1988 година, денес е едно од водечките имиња во светот на вештачката интелигенција. Откако се школувала во Канада и потоа дипломирала на Колби колеџот и Дартмут во САД, кариерата ја водеше кон самиот врв на технолошкиот свет.

Во 2018 година ѝ се приклучи на „OpenAI“ и стана клучна фигура во развојот на проекти како ChatGPT, DALL·E и GPT-4. Покрај техничкото водство, кратко беше и в.д. извршна директорка на компанијата во ноември 2023 година, во еден од најтурбулентните моменти во историјата на OpenAI.

Во септември 2024 година, Мурати објави заминување од OpenAI со цел да создаде „време и простор за сопствени истражувања“. Само неколку месеци подоцна, во февруари 2025, го основа својот стартап Thinking Machines Lab – амбициозен проект фокусиран на подобрување на соработката меѓу луѓето и вештачката интелигенција.

Иако компанијата сè уште нема конкретен производ, интересот од инвеститорите е огромен. Според Business Insider, се очекува почетна инвестиција од 2 милијарди долари, што потенцијално може да ја направи компанијата вредна над 10 милијарди – сè поради угледот на Мурати и тимот од врвни инженери од OpenAI, Meta и Anthropic.

Мурати веќе е препознаена како една од највлијателните личности во ИТ, со место на листата на Time 100 и почесна титула од Дартмут. Со Thinking Machines Lab, таа не само што го турка технолошкиот напредок, туку и отвора нова етичка димензија во односот човек-АИ.