Францускиот претседател Емануел Макрон денеска ќе одржи средба во Елисејската палата со претставници на сите економски сектори погодени од новите американски царини.

Американскиот претседател Доналд Трамп објави воведување на основна царинска стапка од 10 отсто за сите увозни производи, со дополнителна стапка од 20 проценти за Европската Унија. Ова отвори нова трговска војна, со потенцијално сериозни последици за глобалната економија, инфлацијата и економскиот раст.

Француските производители на вино и жестоки пијалаци веќе предупредија дека нивниот извоз во САД ќе се намали за најмалку 20 отсто, откако новите тарифи беа објавени.

Макрон ќе се обиде да утврди заеднички пристап кон ситуацијата и можни одговори за заштита на европските компании од овие мерки.

Претставникот за инвестиции на Владимир Путин, Кирил Дмитриев, се состана вчера со американски официјални претставници во Вашингтон, додека администрацијата на Трамп ги разгледува деловните зделки со Москва, иако Русија продолжува да води војна против Украина. САД мораа да ги укинат санкциите против Дмитриев се со цел тој да може да присуствува на состанокот.

Дмитриев е највисокиот руски функционер што отпатува во САД за државен бизнис по започнувањето на војната во 2022 година. Не е познато што разговарал со американските официјални лица, но има блиски односи со тимот на Трамп од изборите во 2016 година, кога беше откриено руско мешање во корист на Трамп.

Иако вчера администрацијата на Трамп не ја вклучи Русија во списокот на земји со нови царини, Украина доби царина од 10%. Сепак, американски сенатори предлагаат секундарни санкции за земјите што ја поддржуваат Русија, доколку Москва продолжи да ги нарушува мировните преговори.

Предлог-законот предлага царини од 500% на увозот од земји што купуваат гориво и ураниум од Русија. Ова законодавство, што предвидува високи царини на клучните руски извозни производи, се смета за значаен чекор во обидите да се стави крај на агресијата на Путин.

Сенаторите Линдзи Греам и Ричард Блументал се главни спонзори на нацрт-законот што ќе воведе санкции против Русија и земјите кои ја поддржуваат. Романко од „Разом ние стоиме“ изјави дека законот може да го намали приходот на Кремљ од фосилни горива, но исто така смета дека САД мора да забранат на американските компании како Шлумбергер да работат во рускиот сектор за фосилни горива. Само целосното затворање на приходите од нафта и гас може да го ослаби Путин и да донесе мир во Украина.

Бугарските воздухопловни сили го добија својот прв борбен авион F-16, кој вчера слета во 3. воздухопловна база Граф Игњатиево. Станува збор за двоседот F-16D Блок 70, со ознака „301“, чија официјална примопредавање беше извршена на 31 јануари оваа година.

Според Министерството за одбрана на Бугарија, авионот го напуштил производствениот погон на 31 март, а до Бугарија пристигнал во две фази. Најпрво, од фабриката во Гринвил, Јужна Каролина, прелетал преку Атлантскиот Океан до Шпанија заедно со два авиони наменети за Словачка, а потоа продолжил кон Бугарија.

За време на летот, авионот бил дополнуван со гориво од танкер KC-135 на Националната гарда на Тенеси. До пристигнувањето во Бугарија, леталото носело американски воени ознаки, кои по слетувањето биле заменети со обележја на бугарското воено воздухопловство. Истовремено, започнати се стандардните царински и даночни процедури.

Ова е првиот од неколкуте авиони F-16 што Бугарија ги купи како дел од модернизацијата на својата авијација, со цел да ги замени старите советски авиони МиГ-29.