Инфо +

Од вечерва на полноќ повторно полициски час

Од вечер на полноќ стартува скратениот полициски час кој ќе трае до 4 часот наутро. Со одлука на Владата во вторникот, рестриктивните мерки се олабавуваат до 18 мај.

Работното време на угостителските објекти е продолжено до 23:30 часот, но тие и понатаму ќе бидат отворени само на летните тераси, а исклучок од ова ограничување се угостителските објекти на Меѓународниот аеродром Скопје и Аеродромот „Св.Апостол Павле“ во Охрид, како и делот за исхрана во хотелите, мотелите, хостелите и пансионите за лицата кои се сместени во овие објекти.

Од вчера со работа започнаа и вежбалните, фитнес клубовите, спортските центри, салите за вежбање и игротеките, но во овие објекти е задолжително почитување на протоколите за работа. Се дозволува и организирање на инвент настани, но за нив, ќе важат истите протоколи од претходно, односно до 30 проценти исполнетост на капацитетите во внатрешноста на објектите и до 50 проценти исполнетост на отворен простор. Спортските настани и понатаму ќе се организираат без физичко присуство на публика.

Како дел од олабавувањето на мерките е и укинувањето на забраната за користење на годишни одмори за здравствените работници и зголемувањето на бројот на деца во градинките. Согласно одлуката на Владата, дозволено е бројот на деца во воспитните групи до две години да се зголеми на 15, а кај воспитните групи од 2 до 6 години на 20 деца.

Предлогот за олабавување на мерките во понеделникот го донесе Комисијата за заразни болести врз основа на епидемиолошката состојба, односно намалениот број на новозаразени и ослободувањето на поголем дел од болничките капацитети.

Поради намалениот број пациенти со Ковид-19 од вчера изутрина се затворени ковид – центрите во неколку клиники во Скопје и дел од капацитетите за ковид пациенти во болниците во другите градови. Затворени се ковид – центрите на клиниките за кардиологија, за ОРЛ, за очни болести и Институтот за физикална терапија.

Од почетокот на неделава без ковид – пациенти се и Клиниките за урологија и Пластична хирургија кои веќе почнаа со редовен хируршки програм. Во петок ќе се затвори и ковид – центарот на Клиниката за трауматологија при ТОАРИЛУЦ, а од понеделник Клиниката за ортопедија и Клиниката за трауматологија почнуваат со редовен хируршки програм, соопшти вчера Министерството за здравство.

На инфективните одделенија во Скопје и во болниците во другите градови се лекуваат 649 пациенти со Ковид-19 и има околу 900 празни болнички кревети во ковид – центрите.

Според вчера објавените податоци од Институтот за јавно здравје, регистрирани се 150 нови случаи со Ковид-19. Пријавени се вкупно 16 починати пациенти, од кои најмладиот е 50-годишен скопјанец. Регистрирани се и 487 оздравени пациенти

Вкупната бројка на Ковид-дијагностицирани лица во земјава од почетокот на епидемијата изнесува 154.372, бројката на оздравени пациенти е 139.266, на починати е 5.151, а бројот на активни случаи изнесува 9.955.

Свет

Берлин распоредува германски војници на источната граница на Полска

Германија ќе испрати контингент војници во Полска со цел да помогне во зајакнувањето на безбедноста на источната граница, во време на зголемена загриженост поради безбедносните закани од Русија.

Како што соопшти портпарол на германското Министерство за одбрана, ангажманот на припадниците на Бундесверот ќе биде ограничен на инженерски задачи. Тие ќе работат на изградба на утврдувања, копање ровови, поставување бодликава жица и изработка на противтенковски пречки.

Контингентот ќе брои околу 50 војници, а мисијата е планирано да започне во вториот квартал од наредната година и да трае до крајот на 2027 година.

Од Министерството нагласуваат дека за ова распоредување не е потребно одобрување од германскиот парламент, бидејќи војниците нема да бидат изложени на директен вооружен конфликт или ризик по нивниот живот и здравје. Вообичаено, секое испраќање германски сили во странство бара парламентарна согласност, освен во вакви случаи.

Полска, која важи за еден од најгласните поддржувачи на Украина во конфликтот со Русија, во мај најави дополнителни мерки за зајакнување на границите со Белорусија и руската енклава Калининград.

Балкан

Превртен чамец во реката Сава: Загинаа три лица при обид за нелегален премин во Хрватска

Три лица го загубија животот при превртување на чамец утрово на реката Сава, во близина на Славонски Брод, за време на обид за нелегален премин од Босна и Херцеговина во Хрватска. Во чамецот имало вкупно 14 странски државјани, потврди полицијата на прес-конференција.

Според официјалните информации, станува збор претежно за државјани на Кина, како и еден државјанин на Турција. Меѓу спасените е и државјанин на Босна и Херцеговина, кој веднаш бил приведен под сомнение дека бил вклучен во шверц на мигранти.

Еден маж се удавил на самото место, додека две жени им подлегнале на повредите во болница. Останатите патници се здобиле со полесни повреди и симптоми на хипотермија. Меѓу нив има шест мажи и седум жени, сите возрасни лица.

„Сите преживеани се под постојан надзор на медицинскиот персонал и полицијата. Третманот е во тек, а дополнителен предизвик претставуваат комуникациските бариери“, изјави директорот на болницата во Славонски Брод, Јосип Самарџиќ.

Полицијата соопшти дека на местото на настанот веднаш биле испратени патроли и служби за итна помош, кои успеале да извлечат 13 лица од студената вода на Сава, од кои едно без знаци на живот. Сите хипотермични лица биле пренесени и згрижени во болницата во Славонски Брод.

Во врска со трагедијата се истражува улогата на едно лице, државјанин на Босна и Херцеговина, кое моментално е хоспитализирано и се наоѓа под полициски надзор. Полицијата информира и дека продолжува потрагата по уште едно лице, откако неговиот пасош бил пронајден, а тоа лице не се наоѓа меѓу мигрантите кои биле донесени во болница.

Балкан

Тинејџер со нож тешко рани полицаец во Хрватска

Сплит е потресен од тешкиот инцидент во кој осумнаесетгодишен младиќ со нож повеќекратно го избоде полицаецот Анте Крижан (59), нанесувајќи му животозагрозувачки повреди. Окружното државно обвинителство во Сплит отвори истрага против напаѓачот за обид за тешко убиство и неовластено користење на туѓ подвижен имот, а судот му одреди притвор.

Нападот се случил во среда, 3 декември 2025 година, околу 22:45 часот, во сплитскиот кварт Билице, на улицата Пут Мостина. Полицаецот Крижан, кој во тој момент не бил на должност и бил во цивилна облека, се враќал дома по завршената смена во Првата полициска станица. Откако слушнал дека полицијата трага по осомничен осумнаесетгодишник кој се заканувал со нож во семејниот дом, тој забележал лице што одговарало на описот и се обидел да го спречи.

Во тој момент, младиот човек го нападнал со нож и му нанел повеќе од десет убодни рани во пределот на градите и стомакот. По нападот, осомничениот избегал, додека тешко ранетиот полицаец останал да лежи на улицата.

Екипите на Итната медицинска помош брзо интервенирале и го пренеле Крижан во Клиничкиот болнички центар во Сплит, каде што бил подложен на долготрајна и сложена хируршка интервенција. Поради тешките повреди, тој бил сместен на Одделот за интензивна нега и ставен во индуцирана кома, а неговиот живот бил во опасност. Неколку дена подоцна, од болницата соопштија дека состојбата му е значително подобрена, дека е разбуден, во контакт и исклучен од респиратор, но дека лекувањето продолжува.

Во меѓувреме, полицијата спроведе обемна потрага низ целата Сплитско-далматинска жупанија. Напаѓачот бил уапсен неколку часа по инцидентот, кога се вратил пред семејната куќа, каде што го чекале полициски службеници. Поради сомнежи за нарушена ментална состојба, тој најпрво бил сместен на психијатриско одделение, по што била спроведена кривичната постапка.

Обвинителството соопшти дека постои основано сомнение оти осомничениот, поради ментална болест, не бил способен целосно да го разбере значењето на своите постапки или да ги контролира, но дека со намера да лиши од живот повеќекратно го прободел полицаецот со нож, нанесувајќи му повреди опасни по живот.