Северна Кореја ја организирала првата работилница за инструктори на национално ниво, чија задача е да поттикнуваат лојалност кон лидерот Ким Џонг Ун меѓу децата и младите, јавија денеска државните медиуми во таа земја.

Во главниот град Пјонгјанг, од среда до сабота, се одржала обука за инструктори од целата земја, на која биле повикани да ја исполнат својата одговорност во воспитувањето на младите револуционери и патриоти, пренесува севернокорејската новинска агенција KCNA.

Обуката се одржала во рамките на активностите на националниот синдикат за деца и млади, кој вклучува ученици на возраст од седум до 16 години.

Овој синдикат, основан во 1946 година, се проценува дека има околу три милиони членови, според јужнокорејската агенција Јонхап.

Обуката и работилницата се организирани по инструкции на Ким, а неговото обраќање било прочитано на собирот, иако не се дадени други детали.

За време на обуката била разгледувана улогата на инструкторите како политички заштитници на младината, која е безгранично лојална и верна на севернокорејскиот лидер Ким, наведува KCNA.

„Децата треба да се научат да ја ценат вредноста на организацијата од најмала возраст и да се навикнат на доброволно учество во нејзините активности“, изјавил еден од говорниците на собирот.

Во текот на оваа обука биле разгледани и образовни методи, како и недостатоците на проектите чија цел е зајакнување на детскиот синдикат и неговата улога, известила севернокорејската новинска агенција.

Портпаролот на јужнокорејското министерство за обединување, Ку Бјунг Сам, оцени дека овој собир може да се толкува како обид за заострување на идеолошката контрола над сите слоеви на населението и зајакнување на нивната лојалност.

Економијата на Германија веќе неколку години бележи благ пад, но тоа сѐ повеќе влијае на пазарот на труд. Невработеноста расте трета година по ред, а според проценките, секој месец се губат повеќе од 10.000 работни места.

Растот на невработеноста во Германија најмногу се забележува во затворањето на работни места во индустрии, кои традиционално имаат повисоки плати.

Експертите укажуваат дека во индустријата секој месец се губат повеќе од 10.000 работни места, особено во автомобилскиот сектор, кој е дополнително погоден од новите американски царини на увозот на автомобили, пишува RTS.

Но, и без овие царини, германската индустрија се наоѓа во криза, а сѐ повеќе компании ја селат својата производствена активност во странство.

Како што велат, доминантната причина за тоа се трошоците за производство. Конкретно, од почетокот на војната во Украина, бизнисмените се оптоварени со високи цени на струја, гас и нафта, потоа растечките даноци, но и еден стар проблем – комплицираната и опсежна бирократија.

Сепак, Германците ги селат своите производствени капацитети во Азија и поради повисокото ниво на роботизација и автоматизација на производството.

„Филмови од нашите фабрики во Кина им ги прикажувам на нашите колеги од други делови на светот, поради високото ниво на автоматизација, стандардизација и роботизација. Развојот во Кина во последните шест, седум години беше извонреден во поглед на воведување технологија во производството. Во последните неколку години инвестирани се милијарда јуани во производни капацитети во Кина. И ќе продолжиме така“, изјави Мигел Борего, генерален директор на Thyssenkrupp.

Индустријалците сметаат дека Германија има потреба од пресврт во трката за инвестиции. Токму такви реформи ветува потенцијалниот иден канцелар на Германија, Фридрих Мерц.

И пред да стане канцелар, тој успеа да направи уставни измени во стариот состав на Бундестагот, кои ќе ѝ овозможат на неговата влада да се задолжи за повеќе од 1.000 милијарди евра во следните години, а тие средства да ги искористи за наоружување, инфраструктура и климатски проекти.

„Војната и очекувањата за воените потреби се користат како привремен лек за германската економија. Но тоа е лош знак. Секогаш мораме да имаме на ум дека воената потрошувачка на крајот се поддржува со даноци. Ако сакаме да го зголемиме военото инвестирање, треба да ги зголемиме даноците за поединци и бизнисите, или да го намалиме другото трошење и приоритетите, како што се образованието, истражувањето и развојот. Тоа се области кои на долг рок ја одржуваат конкурентноста на економијата. Длабоко жалам за политиката на владата во оваа област“, изјави Рајнер Ротфус, пратеник од AfD во Бундестагот.

Во Германија, изгледа дека постои согласност дека нејзината економија западнува во процес на деиндустријализација, освен во секторот за производство на оружје. Но, се повеќе се слуша дилемата дали Германија всушност го менува моделот на економски успех, така што наместо автомобили, во иднина ќе произведува и извезува тенкови.

Бројот на жртви од земјотресот во Мјанмар се искачи на 2.065 лица, додека повеќе од 3.900 лица се повредени, а над 270 се водат како исчезнати, јави Ројтерс, повикувајќи се на државниот телевизиски канал на земјата.

Земјотресот, кој го погоди Мјанмар во петокот, на 28 март, со јачина од 7,7 степени според Рихтеровата скала, е еден од најсилните во последниот век.

Соседните земји, вклучувајќи ја Индија, Кина и Тајланд, испратија помошни материјали и тимови за спасување, а помош пристигна и од Малезија, Сингапур и Русија.

Соединетите Американски Држави понудија хуманитарна помош во вредност од 2 милиони долари „преку организации за хуманитарна помош со седиште во Мјанмар“, соопштија официјални претставници. Покрај тоа, тим за итни случаи од УСАИД, кој се соочува со значителни намалувања на фондовите под администрацијата на Трамп, беше распореден во Мјанмар.

Според прогнозите на Американската геолошка служба, бројот на загинати може да достигне 10.000 лица, а економските загуби од земјотресот би можеле да го надминат годишното економско производство на земјата.