Поранешниот американски претседател Доналд Трамп се закани дека ќе воведе дополнителни 50% царини за кинескиот увоз, доколку Кина до утре не ги повлече контрамерките што ги објави минатата недела. Со тоа, вкупниот царински товар за некои производи би можел да достигне дури 104%.

Новите давачки би се додале на веќе постоечката стапка од 34%, како и на претходно воведените 20% кои администрацијата на Трамп ги активираше уште во јануари. Таквото зголемување би значело драстично покачување на трошоците за американските компании, особено оние што зависат од увоз на кинески производи.

Ова не е првпат Трамп да се закани со високи царини во трговски конфликти. Во минатото, тој најави 200% давачки за европскиот алкохол и 50% за канадскиот челик и алуминиум, но тие мерки не беа целосно спроведени по постигнати компромиси.

Сепак, односите со Кина остануваат постојано затегнати, и тоа не само за време на неговата администрација. И покрај сигналите од Вашингтон за отворање на преговори, вклучително и во контекстот на платформата TikTok, кинеските власти досега не покажале подготвеност за дијалог.

Во северна Грција ќе се изгради првиот тематски парк во светот посветен на Александар Велики, легендарниот крал и војсководец на античкото македонско кралство. Целта на проектот е да се поттикне туризмот во регионот.

Најавата беше објавена минатата недела на конференција за недвижности и туризам од страна на Григорис Аванидис, проектен менаџер во компанијата DreamWorkers, која се занимава со развој на тематски паркови.

„Александар Тематски Парк“ ќе се гради на површина од осум хектари, помеѓу Сера и Кавала, во близина на античкиот град Амфиполис – локација каде во 2014 година беше откриена гробницата Каста, едно од најзначајните археолошки откритија во 21 век.

Паркот ќе понуди комбинација од внатрешни и надворешни атракции прилагодени за целото семејство, кои ќе спојуваат интерактивно учење и забава. Деталите ќе бидат дополнително објавени во текот на годината, а изградбата се очекува да започне во 2026 година со предвидена инвестиција над 10 милиони евра.

Околу 1.000 бетонски бункери со ровови, противтенковски ровови, складишта за муниција и засолништа за снабдување се дел од заедничкиот план за утврдување на источните граници на балтичките земји во должина од 965 километри.

Станува збор за десетгодишен проект за зајакнување на одбраната од Русија, за кој може да биде касно, велат официјалните лица во регионот.

Тие стравуваат дека мировниот договор во Украина може да го насочи вниманието на Москва на најизложениот дел од источното крило на НАТО, пренесува британскиот весник „Телеграф“.

„(Владимир) Путин нема да не остави да чекаме тие 10 години“, рече Габриелијус Ландсбергис, кој беше министер за надворешни работи на Литванија до ноември.

Според него, најопасниот период за Балтикот ќе биде непосредно по прекинот на огнот во Украина.

Неговите коментари дојдоа по слични предупредувања од лидерите на балтичките земји дека прекинот на огнот може да има несакани последици.

Кремљ веќе ги изложи своите планови за зголемување на военото производство и прераспоредување на трупите на североисточната граница на НАТО ако Доналд Трамп постигне примирје.

За да ги зајакнат своите „активни сили“, балтичките земји, Полска и Финска неодамна објавија дека ќе се повлечат од меѓународниот договор за забрана на противпешадиски мини.

Литванија исто така неодамна излезе од договорот за касетни бомби.

Регионалните лидери истакнуваат дека сакаат слобода на избор за користење нови системи за наоружување поради заканата од Русија.

„Стратешката порака“, според Довиле Сакалене, литванскиот министер за одбрана, е дека сме „подготвени да користиме апсолутно сè“ за одбрана од „инвазија“.

Во неодамнешниот извештај на данската разузнавачка служба се наведува дека кога ќе заврши или ќе се замрзне војната во Украина, Русија ќе може брзо да се вооружи повторно, да ги преорганизира своите сили и да води војна против НАТО.

Се проценува дека за шест месеци Москва ќе биде „подготвена да води локален конфликт во земја која граничи со Русија“.

За две години ќе биде „подготвена за регионална војна против неколку земји во регионот на Балтичкото Море“.

За пет години ќе може да води „голем конфлик“ во Европа (без учество на САД), се наведува во извештајот.